ជាតិ
សង្គមជាតិ
ក្រុមការងារព្រឹត្តិការណ៍អង្គរសង្ក្រាន្តរកកិច្ចសហការនឹងអ្នកសារព័ត៌មានសម្រាប់ឆ្នាំ២០១៧
× សៀមរាប៖ ពិតណាស់ថា អ្នកសារព័ត៌មានបានរួមចំណែកយ៉ាងច្រើន ក្នុងការជួយផ្សព្វផ្សាយព្រឹត្តិការណ៍អង្គរសង្ក្រាន្ត ដែលជាព្រឹត្តិការណ៍ដ៏ធំប្រចាំឆ្នាំនៅកម្ពុជា។ ដើម្បីជំរុញការផ្សព្វផ្សាយឲ្យកាន់តែប្រសើរជាងមុននោះ ក្រុមការងារនៃព្រឹត្តិការណ៍អង្គរសង្ក្រាន្ត បានស្វែងរកកិច្ចសហការជាមួយក្រុមអ្នកសារព័ត៌មានខេត្តសៀមរាប សំដៅធ្វើយ៉ាងណាឲ្យការផ្សព្វផ្សាយព្រឹត្តិការណ៍អង្គរសង្ក្រាន្តនាឆ្នាំ២០១៧នេះ មានភាពទូលំទូលាយថែមមួយកម្រិតទៀត។
លោក សោម រតនា អ្នកនាំពាក្យព្រឹត្តិការណ៍អង្គរសង្ក្រាន្តនៅរសៀលថ្ងៃទី២៥ មករា ឆ្នាំ២០១៧នេះ បានលើកឡើងថា អ្នកសារព័ត៌មានខេត្តសៀមរាប ពិតជាបានរួមចំណែកសំខាន់ក្នុងការផ្សព្វផ្សាយពីព្រឹត្តិការណ៍សំខាន់មួយនេះ។ លោក រតនា បន្ថែមថា ជារៀងរាល់ឆ្នាំ អ្នកសារព័ត៌មានច្រើនបានផ្សព្វផ្សាយពីព្រឹត្តិការណ៍អង្គរសង្ក្រាន្ត ក្នុងន័យរួមគ្នាលើកកម្ពស់វិស័យវប្បធម៌ និងទំនៀមទំលាប់របស់ជាតិខ្មែរ។
តាមរយៈអ្នកនាំពាក្យដដែល ដែលបានបញ្ជាក់ប្រាប់ក្រុមអ្នកសារព័ត៌មានខេត្តសៀមរាប គឺថាព្រឹត្តិការណ៍អង្គរសង្ក្រាន្តនៅឆ្នាំ២០១៧នេះ នឹងមានកម្មវិធីថ្មីៗ និងប្លែកៗជាច្រើន ដើម្បីញុំាងឲ្យព្រឹត្តិការណ៍ដ៏ធំប្រចាំឆ្នាំនៅខេត្តសៀមរាបនេះ កាន់តែវិសេសវិសាលថែមទៀត។ យ៉ាងណា លោក រតនា មិនទាន់បញ្ជាក់ពីកម្មវិធីចម្រុះដែលមានក្នុងព្រឹត្តិការណ៍អង្គរសង្ក្រាន្តឆ្នាំទី៥នេះ ថាមានប៉ុន្មាននោះទេ ដោយលោកថា រង់ចាំដល់ថ្ងៃសន្និសីទសារព័ត៌មាន។
គួររម្លឹកថា ព្រឹត្តិការណ៍អង្គរសង្ក្រាន្តបានទាក់ទាញភ្ញៀវទេសចរជាច្រើន។ យោងតាមរបាយការណ៍ពីក្រសួងទេសចរណ៍ កាលពីលើកទីមួយឆ្នាំ២០១៣ ព្រឹត្តិការណ៍នេះទាក់ទាញភ្ញៀវទេសចរ ១៧ម៉ឺននាក់ លើកទីពីរ ឆ្នាំ២០១៤ ចំនួន ៣៨ម៉ឺននាក់ លើកទីបី ឆ្នាំ២០១៥ មានចំនួន ៩៧ម៉ឺននាក់ និងលើកទីបួន ឆ្នាំ២០១៦ គឺកើនឡើងដល់ទៅ ១,៣លាននាក់ ហើយគេរំពឹងថានៅឆ្នាំ២០១៧នេះ ចំនួននេះនឹងបន្តកើនឡើងទៀត៕
Tag:
ព្រឹត្តិការណ៍អង្គរសង្រ្កាន្ត
សោម រតនា
© រក្សាសិទ្ធិដោយ thmeythmey.com