ពីនេះ ពីនោះ
រូបត្លុក
តើអ្នកជាមនុស្សបង្កើតឱកាស, ស្វែងរកឱកាស ឬរង់ចាំឱកាស?
× មនុស្សម្នាក់ៗសុទ្ធតែមានចំណេះ ការត្រិះរិះ និងរបៀបធ្វើការងារផ្សេងៗគ្នា។ ការធ្វើកិច្ចកាធ្វើកិច្ចការដែលពួកគេពេញចិត្ត ហើយទទួលបានជោគជ័យ អ្នកខ្លះបានសម្រេចចិត្តរង់ចាំឱកាសមកដល់ទើបចាប់យក ហើយអ្នកខ្លះទៀតខំស្វែងរកឱកាសទើបអាចមានឱកាសហ្នឹងគេ រីឯមនុស្សមួយចំនួនទៀត ជាក្រុមមនុស្សដែលព្យាយាមបង្កើតឱកាសដោយខ្លួនឯង ដើម្បីធ្វើអ្វីមួយដែលពួកគេចង់ធ្វើ។ តើអ្នកជាមនុស្សបង្កើតឱកាស, ស្វែងរកឱកាស ឬរង់ចាំឱកាស?
មនុស្សបង្កើតឱកាស គឺជាមនុស្សមានជំនឿលើខ្លួនឯង និងមានគំនិតច្នៃប្រឌិតចង់បង្កើតអ្វីដែលខ្លួនចង់បាន ដោយមិនរង់ចាំឱកាសមកដល់ ឬប្រឹងរកឱកាសនៅទីណានោះទេ។ មនុស្សប្រភេទនេះ ភាគច្រើនតែងតែគិតបែបវិជ្ជមាន និងក្លាហានហ៊ានប្រថុយនឹងហានីភ័យនៃឱកាសដែលពួកគេបានបង្កើត។ ការបង្តើតឱកាសដោយខ្លួនឯងនេះ គឺកើតចេញពីទឹកចិត្ត, ចំណូលចិត្ត, ចំណេះដឹង និងទេព្យកោសល្យរបស់ខ្លួន ដោយឆ្ពោះទៅរកគោលដៅដែលពួកគេចង់បាន។
ចំណែកឯង មនុស្សស្វែងរកឱកាស គឺជាមនុស្សដែលមិនហ៊ានគិត និងមិនមានគំនិតចង់បង្កើតការងារ ឬបង្កើតអ្វីមួយដោយខ្លួនឯងនោះទេ ព្រោះពួកគេខ្លាចបរាជ័យ និងខ្មាសគេ។ មនុស្សប្រភេទនេះបានត្រឹមតែខ្មីឃ្មាតរកការងារធ្វើតាមរយៈមិនត្តភក្តិ, បងប្អូន និងតាមសេចក្តីប្រកាស់ជ្រើសរើសបុគ្គលិកតែប៉ុណ្ណោះ ទើបមានឱកាសដូចគេ។ ប៉ុន្តែ មនុស្សដែលមានភាពរួញរាបែបនេះ ក៏មិនប្រាកដថា ទទួលបានការងារល្អ ឬជោគជ័យខ្លាំងនៅក្នុងអាជីពរបស់ខ្លួនប៉ុន្មានដែរ។
រីឯ មនុស្សរង់ចាំឱកាស គឺជាមនុស្សដែលមិនសកម្ម ឬមិនយកចិត្តទុកដាក់លើអ្វីដែលខ្លួនគេចង់បានឡើយ។ មនុស្សប្រភេទនេះ ទាល់តែមានគេហៅមកធ្វើការ ឬដាក់កិច្ចការឱ្យធ្វើទើបមានឱកាសធ្វើ។ មនុស្សដែលរង់ចាំឱកាសមកដល់មុខទើបចាប់យកបែបនេះ ក៏មិនប្រាកដថា ទទួលបានការងារ ឬធ្វើកិច្ចការអ្វីមួយបានល្អដែរ ពីព្រោះពួកគេមិនសូវមានទំនុកចិត្ត, គំនិតច្នៃប្រឌិត និងក្លាហានក្នុងការធ្វើកិច្ចការទាំងនោះឱ្យបានស៊ីជម្រៅឡើយ។ ម្យ៉ាងទៀត ក្រុមមនុស្សដែលបង្កើតឱកាស និងស្វែងរកឱកាស គេបានចាប់យកឱកាសល្អៗ និងបោះជំហានទៅមុខយ៉ាងលឿនជាងក្រុមមនុស្សដែលរង់ចាំឱកាសទៀតផង៕
© រក្សាសិទ្ធិដោយ thmeythmey.com