ជាតិ
សេដ្ឋកិច្ច
ក្រុមសហគ្រិនកម្ពុជា និងជប៉ុន ចុះ MOU សហការលើផ្នែកពាណិជ្ជកម្ម សហគ្រិន
× ភ្នំពេញ៖ សមាគមសហគ្រិនវ័យក្មេងកម្ពុជា (YEAC) ដែលមានសមាជិកជាង ១៤០ ក្រុមហ៊ុន បានចុះអនុស្សារណៈនៃការយោគយល់គ្នា (MOU) ជាមួយក្រុមពាណិជ្ជករជប៉ុន ដើម្បីបង្កើនកិច្ចសហការជួយគ្នាទៅវិញទៅមកលើសកម្មភាពពាណិជ្ជកម្ម។
MOU សហការនេះ ធ្វើឡើងនៅក្រសួងពាណិជ្ជកម្ម កាលពីថ្ងៃទី១ខែកុម្ភៈ រវាង លោក សុខ ពិសិដ្ឋ ប្រធាន YEAC និងលោក Koji Okamura ប្រធានអង្គភាពសហគ្រិនវ័យក្មេងនៃសភាពាណិជ្ជកម្ម និងឧស្សាហកម្មជប៉ុន (YEG) ដែលមានសមាជិកជាង ៣ម៉ឺនក្រុមហ៊ុន។ ក្នុងពិធីនេះដែរក៏មានវត្តមាន លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម និងលោក Hidehisa Horinouchi ឯកអគ្គរដ្ឋទូតជប៉ុនប្រចាំនៅកម្ពុជា។
លោក សុខ ពិសិដ្ឋ បានថ្លែងប្រាប់អ្នកសារព័ត៌មានក្រោយពិធីចុះ MOU ថា ការចុះ MOU នេះ គឺដើម្បីរំលេចឲ្យកាន់តែច្បាស់ពីការចងសម្ព័ន្ធភាពរវាងសហគ្រិននៃសមាគម YEAC និង សហគ្រិននៃអង្គភាព YEG ។ លោកបញ្ជាក់ថា សកម្មភាពដែលក្រុមសហគ្រិននៃភាគីទាំងពីរបានធ្វើ និងបន្តពង្រឹងថែមទៀត គឺការចែករំលែកបទពិសោធន៍ និងសហកាវិនិយោគរួមគ្នា។ លោកបន្ថែមថា លោកនឹងដឹកនាំប្រតិភូសហគ្រិនមួយក្រុមមានសមាជិក ១៥ក្រុមហ៊ុនទៅទស្សនកិច្ចសិក្សានៅប្រទេសជប៉ុននៅឆ្នាំ២០១៧ នេះ តាមរយៈការជួយណែនាំ និងរៀបចំដោយក្រុមពាណិជ្ជករជប៉ុន YEG ។
លោក Koji Okamura មានប្រសាសន៍ថា ការស្គាល់ចិត្តគ្នា គឺជាការចាប់ផ្ដើមដ៏សំខាន់ ដើម្បីជំរុញឲ្យមានកិច្ចសហការពាណិជ្ជកម្មរវាងសហគ្រិនប្រទេសទាំងពីរ។ ជាមួយគ្នានេះដែរ លោកក៏បានបង្ហាញការចាប់អារម្មណ៍វិនិយោគលើវិស័យអចលនទ្រព្យនៅកម្ពុជា រួមជាមួយវិស័យកសិកម្ម និងឧស្សាហកម្មជាដើម៕
© រក្សាសិទ្ធិដោយ thmeythmey.com