ជាតិ
សេដ្ឋកិច្ច
គ្រឹះស្ថានអង្គរ ផ្តើមអនុវត្តតម្លៃបណ្ណថ្មីចូលទស្សនារមណីយដ្ឋានអង្គរពីថ្ងៃទី ១ កុម្ភៈតទៅ
×![]()
ភ្នំពេញ៖ តម្លៃបណ្ណថ្មីចូលទស្សនារមណីយដ្ឋានអង្គរ ត្រូវចាប់ផ្ដើមអនុវត្តចាប់ពីថ្ងៃទី១ខែកុម្ភៈតទៅ។គ្រឹះស្ថានអង្ករ ដែលជាស្ថាប័នគ្រប់គ្រងចំណូលបណ្ណចូលទស្សនាតំបន់អង្ករ បានពន្យល់ពីការដំឡើងតម្លៃបណ្ណថ្មីនេះ។
តម្លៃបណ្ណចូលទស្សនាប្រាសាទអង្ករ ត្រូវបានដំឡើងពី២០ដុល្លារ ទៅ ៣៧ដុល្លារ សម្រាប់បណ្ណចូលទស្សនា១ថ្ងៃ, ៤០ដុល្លា ទៅ ៦២ដុល្លារ ចំពោះបណ្ណចូលទស្សនា៣ថ្ងៃមានសុពលភាព១០ថ្ងៃ និងពី៦០ដុល្លារ ទៅ ៧២ដុល្លារ មានសុពលភាព១ខែ។
គ្រឹះស្ថានអង្ករបានលើកឡើងពីមូលដ្ឋានមួយចំនួននៃការសម្រេចដំឡើងថ្លៃបណ្ណចូលទស្សនារមណីយដ្ឋានអង្ករ។ បើតាមសេចក្ដីប្រកាសព័ត៌មាន ដែលចុះថ្ងៃទី៣១ខែមករាឆ្នាំនេះ គ្រឹះស្ថានអង្ករបញ្ជាក់ថា ការដំឡើងថ្លៃនេះ ធ្វើឡើងដោយផ្អែកលើការសិក្សាច្បាស់លាស់ និងមានការស្ទាប់ស្ទង់មតិអំពីថ្លៃបណ្ណថ្មីពីសំណាក់ភ្ញៀវទេសចរដែលបានទស្សនារមណីយដ្ឋានអង្ករ ដែលភាគច្រើនមិនមានយោបល់ជំទាស់នោះទេ។ ហើយបើធៀបនឹងទៅនឹងតម្លៃបណ្ណចូលទស្សនារមណីយដ្ឋាននៅលើសកលលោក តម្លៃបណ្ណចូលទស្សនាអង្ករ គឺនៅទាបជាងគេនៅឡើយ។
សេចក្ដីប្រកាសព័ត៌មានដដែលនេះបន្ថែមថា តម្លៃបណ្ណចាស់ គឺបានអនុវត្តតាំងពីឆ្នាំ១៩៩៤មកម្លេះ បើគិតពីអតិផរណានៃតម្លៃប្រាក់ដុល្លារ ២០ដុល្លារ នៅឆ្នាំ១៩៩៤ គឺស្មើនឹងតម្លៃ ៣១,៥ដុល្លារនៅឆ្នាំ២០១៦ ។
ឈរលើគោលការណ៍តម្លៃភាព និងគណនេយ្យភាព ចំណូលដែលទទួលបានពីការលក់បណ្ណ ត្រូវបានបង់ចូលថវិកាជាតិទាំងស្រុងជារៀងរាល់ថ្ងៃ ដែលក្នុងនោះទឹកប្រាក់ ១៥ភាគរយ ពីការលក់បណ្ណត្រូវបានរក្សាទុកសម្រាប់ចំណាយលើការងារអភិរក្ស និងអភិវឌ្ឍន៍ហេដ្ឋារចនាសម្ព័ន្ធ ព្រមទាំងលើកកម្ពស់គុណភាពសេវាសាធារណៈនៅក្នុងតំបន់អង្ករ។ នេះបើតាមសេចក្ដីប្រកាសខាងលើ។
ក្នុងតម្លៃបណ្ណថ្មីនីមួយៗ ត្រូវបានបញ្ចូលទឹកប្រាក់ចំនួន ២ដុល្លារសម្រាប់ជាវិភាគទានចូលមូលនិធិមន្ទីរពេទ្យគន្ធបុប្ផាផងដែរ។
គួរបញ្ជាក់ថា រដ្ឋាភិបាលបានដកហូតការលក់សំបុត្រចូលទស្សនាប្រាសាទអង្ករពីក្រុមហ៊ុន សុខា របស់លោក សុខ គង់ ដើម្បីគ្រប់គ្រងដោយខ្លួនឯង ចាប់ពីខែមករាឆ្នាំ២០១៦ ។ របាយការណ៍ពីគ្រឹះស្ថានអង្ករឲ្យដឹងថា ការលក់សំបុត្រចូលទស្សនារមណីដ្ឋានអង្គរនៅឆ្នាំ២០១៦ បានជាង ៦២លានដុល្លារកើនឡើង ៤,២ភាគរយបើធៀបនឹងឆ្នាំ២០១៥ ៕
Tag:
គ្រឹះស្ថានអង្គរ
សំបុត្រទស្សនាអង្គរ
អង្គរ
© រក្សាសិទ្ធិដោយ thmeythmey.com
