ជាតិ
«បាតុភូតព្រះអាទិត្យរះចំកំពូលប្រាសាទអង្គរវត្ត» អាចនឹងកើតឡើងនៅថ្ងៃទី២០ ឬ២១ខែមីនាឆ្នាំនេះ
×![]()
ភ្នំពេញ៖ បាតុភូតព្រះអាទិត្យរះចំកំពូលប្រាសាទអង្គរវត្ត កើតឡើងចំនួន ២ដងនៅខែមីនា និងខែកញ្ញាជារៀងរាល់ឆ្នាំ។ ចំពោះលើកនេះ បាតុភូតនេះអាចនឹងកើតឡើងនៅថ្ងៃទី២០ ឬទី២១ខែមីនា។ នេះបើតាមសេចក្ដីជូនដំណឹងរបស់ក្រសួងទេសចរណ៍។
សេចក្ដីជូនដំណឹងដដែលនេះឲ្យដឹងថា៖«បាតុភូតព្រះអាទិត្យរះចំកំពូលប្រាសាទអង្គរវត្តនេះ ស្ដែងឲ្យឃើញពីអច្ឆរិយៈភាពនៃប្រាសាទអង្គរ ដែលត្រូវបានបុព្វបុរសខ្មែរយើងកសាង ដោយមានការគិតគូរអំពីស្ថាបត្យកម្ម និងការផ្សារភ្ជាប់ជាមួយនឹងធម្មជាតិយ៉ាងច្បាស់លាស់គួរឲ្យស្ងប់ស្ងែង»។
ចំពោះពេលវេលា បាតុភូតនេះ នឹងកើតឡើងនៅចន្លោះម៉ោង ៥ព្រឹក ទៅម៉ោង ៧ព្រឹក។ ជារៀងរាល់ឆ្នាំព្រឹត្តិការណ៍នេះ បានទាក់ទាញភ្ញៀវទេសចរជាតិ-អន្តរជាតិច្រើនកុះករមកទស្សនា និងផ្ដិតយករូបភាព។ នេះបើតាមសេចក្ដីជូនដំណឹងខាងលើ។
លោកបណ្ឌិត ច័ន្ទ រ័ត្ន ប្រធានសមាគមនៃអ្នកគណិតវិទ្យាកម្ពុជា និងជាប្រធាននាយកដ្ឋានស្រាវជ្រាវវិទ្យាសាស្ត្រនៃក្រសួងអប់រំ យុវជននិងកីឡា ដែលបានស្រាវជ្រាវឯកសារអំពីបាតុភូតនេះ ធ្លាប់បានប្រាប់សារព័ត៌មានថ្មីៗថា បាតុភូតនេះ គឺជាការគិតគូររបស់បុព្វបុរសខ្មែរដែលកសាងប្រាសាទអង្គរ ពោលគឺមិនមែនជារឿងចៃដន្យឡើយ៕
Tag:
ព្រះអាទិត្យរះចំកំពូលប្រាសាទអង្គរវត្ត
អង្គរ
© រក្សាសិទ្ធិដោយ thmeythmey.com
