ឧស្សាហកម្មធានារ៉ាប់រងអាយុជីវិតកើនឡើងខ្លាំងនៅឆ្នាំ២០១៦

ជាតិ

សេដ្ឋកិច្ច

ឧស្សាហកម្មធានារ៉ាប់រងអាយុជីវិតកើនឡើងខ្លាំងនៅឆ្នាំ២០១៦

08, Feb 2017 , 8:59 pm

រូបភាព

ដោយ:

ភ្នំពេញ៖ វិស័យធានារ៉ាប់រងរបស់កម្ពុជានៅឆ្នាំ២០១៦ កន្លងទៅ ទទួលបានកំណើនច្រើន បើធៀបនឹងឆ្នាំ២០១៥ ។ អ្វីដែលគួរឲ្យកត់សម្គាល់នោះគឺ ឧស្សាហកម្មធានារ៉ាប់រងអាយុជីវិត ដែលមានកំណើនដល់ ៩៥ភាគរយឯណោះ។ អ្នកជំនាញក្នុងវិស័យនេះប្រាប់ថា ការលូតលាស់សេដ្ឋកិច្ច និងការយល់ដឹងរបស់ពលរដ្ឋ គឺជាកត្តាជំរុញកំណើនទាំងនេះ។

ផ្អែកតាមរបាយការណ៍ប្រចាំឆ្នាំរបស់សមាគមធានារ៉ាបរងកម្ពុជា (IAC) ទឹកប្រាក់សរុបរបស់ឧស្សាហកម្មធានារ៉ាប់រង ដែលទទួលបានពីអតិថិជននៅឆ្នាំ២០១៦ មានចំនួន ១១៣,៦លានដុល្លារ កើនឡើង ៣៥,៦ភាគរយ បើធៀបនឹងឆ្នាំ២០១៥ ដែលមានទឹកប្រាក់ត្រឹមតែ ៨៣,៧លានដុល្លារ។ ក្នុងនោះឧស្សាហកម្មធានារ៉ាប់រងទូទៅបានកើនឡើង ១៤ភាគរយ ខណៈធានារ៉ាប់រងអាយុជីវិតកើន ៩៥ភាគរយ។

របាយការណ៍ឲ្យដឹងថា ធានារ៉ាប់រងអាយុជីវិតនៅឆ្នាំ២០១៦ ទទួលបានអតិថិជនថ្មីចំនួន ៥១០០០បណ្ណធានារ៉ាប់រងអាយុជីវិត។ ធានារ៉ាប់រងនេះបានចូលទីផ្សារកម្ពុជាចាប់តាំងពីឆ្នាំ២០១២ ហើយបច្ចុប្បន្នមានក្រុមហ៊ុនចំនួន ៥ ផ្ដល់សេវាធានារ៉ាប់រងអាយុជីវិតនេះ។

លោក ហ៊ុយ វ៉ាថារ៉ូ ប្រធានសមាគម IAC បានថ្លែងប្រាប់សារព័ត៌មានថ្មីៗថា ការរីកម្រើនក្នុងឧស្សាហកម្មមួយនេះ ដោយសារតែប្រជាជនកាន់តែយល់ដឹងពីអត្ថប្រយោជន៍នៃការប្រើប្រាស់សេវាធានារ៉ាបរង ទន្ទឹមនឹងការលូតលាស់សេដ្ឋកិច្ច ដែលបង្កើនប្រាក់ចំណូលរបស់ពលរដ្ឋ។

បើតាមលោក វ៉ាថារ៉ូ ឧស្សាហកម្មធានារ៉ាប់រងនេះនៅតែមានសក្ដានុពលកំណើននៅក្នុងទីផ្សារកម្ពុជា ខណៈវិស័យនេះនៅមានទំហំតូចនៅឡើយ បើធៀបនឹងទំហំសេដ្ឋកិច្ចជាតិ។ លោកលើកឡើងយ៉ាងដូច្នេះថា៖«វិស័យនេះគឺវាដើរស្របនឹងការអភិវឌ្ឍសេដ្ឋកិច្ច ហើយបើយើងមើលសេដ្ឋកិច្ចនៅតែមានកំណើនគួរឲ្យកត់សម្គាល់ និងវិនិយោគនៅតែមានសក្ដានុពល ចេះតែកើន ដែលបង្កើតឲ្យមានតម្រូវការសេវាធានារ៉ាប់រងបន្ថែមទៀត។

ក្រៅពីបង្កើតការងារ ឧស្សាហកម្មធានារ៉ាប់រងបានជួយច្រើនដល់វិស័យហិរញ្ញវត្ថុ។ លោក ហ៊ុយ វ៉ាថារ៉ូ បញ្ជាក់ថា ទឹកប្រាក់មួយចំនួនធំរបស់ក្រុមហ៊ុនធានារ៉ាប់រង ត្រូវបង្វិលទៅក្នុងចរន្តសេដ្ឋកិច្ច តាមរយៈការដាក់ប្រាក់បញ្ញើនៅក្នុងធនាគារ និងការទិញឧបករណ៍ហិរញ្ញវត្ថុផ្សេងៗ ៕