ជាតិ
សេដ្ឋកិច្ច
ក្រសួងពាណិជ្ជកម្ម ដាក់ផែនការសម្រួលការនាំចេញទំនិញដល់វិស័យឯកជន រូបភាពពីក្រសួងពាណិជ្ជកម្ម
× ភ្នំពេញ៖ ក្រសួងពាណិជ្ជកម្មបានដាក់ចេញវិធានការសម្រួលការធ្វើវិញ្ញាបនបត្របញ្ជាក់ប្រភពដើមទំនិញ (CO) និងផែនការមួយចំនួនទៀត ដើម្បីសម្រួលដល់វិស័យឯកជនក្នុងសកម្មភាពផលិតកែច្នៃផលិតផលសម្រាប់នាំចេញទៅក្រៅប្រទេស។
ឆ្លើយតបនឹងសំណើរបស់វិស័យឯកជននោះ ក្រសួងពាណិជ្ជកម្ម បានសម្រេចពិនិត្យ និងកែសម្រួលឡើងវិញ នូវរាល់នីតិវិធីផ្ដល់វិញ្ញាបនបត្របញ្ជាក់ប្រភពដើមទំនិញ (CO) តាមប្រព័ន្ធស្វ័យប្រវត្តិកម្មគ្រប់ដំណាក់កាល ដើម្បីធានាបំពេញឲ្យបានតាមក្របខណ្ឌពេលវេលាកំណត់ ៤៨ម៉ោង។
សេចក្ដីប្រកាសព័ត៌មាន របស់ក្រសួងពាណិជ្ជកម្ម នៅថ្ងៃទី៩ខែកុម្ភៈបានបញ្ជាក់ដូច្នេះថា៖ ក្រសួងពាណិជ្ជកម្មសូមរក្សាទុកការធ្វើអធិការកិច្ចលើ CO សម្រាប់ទំនិញដឹកជញ្ជូនតាមរថយន្ត ឆ្លងកាត់ព្រំដែនកម្ពុជា និងបញ្ជូនឡើងយន្តហោះនៅប្រទេសជិតខាង ដោយសារវាជាផ្នែកមួយនៃការអនុវត្តវិធានការប្រភពដើមទំនិញ ដើម្បីទប់ស្កាត់ការបន្លំប្រភពដើមនានាពីប្រទេសទី៣ ។
ជាមួយគ្នានេះ ក្រសួងពាណិជ្ជកម្មស្នើដល់វិស័យឯកជនពន្លឿនការដាក់ពាក្យស្នើសុំអធិការកិច្ច នៅពេលដែលទំនិញត្រូវផលិតបាន ១០ភាគរយ ឬ ២០ភាគរយ ដើម្បីចំណេញពេលវេលា។ ហើយក្រសួងគ្រោងចរចាជាមួយប្រទេសជិតខាងក្នុងពេលឆាប់ៗខាងមុខ ដើម្បីបើកឲ្យមានការដឹកជញ្ជូនទំនិញតាមផ្លូវទឹកផងដែរ។ បន្ថែមពីនេះក្រសួងនឹងធ្វើវិសោធនកម្មមុខងារ និងការទទួលខុសត្រូវរបស់កាំកុងត្រូលនាពេលខាងមុខ ដើម្បីធានាការបំពេញប្រតិបត្តិការត្រួតពិនិត្យទំនិញ ឲ្យកាន់តែមានប្រសិទ្ធភាព។ នេះបើតាមសេចក្ដីប្រកាសក្រសួងពាណិជ្ជកម្ម៕
© រក្សាសិទ្ធិដោយ thmeythmey.com