ជាតិ
×![]()
ភ្នំពេញ៖ អាជ្ញាធរសាលារាជធានីភ្នំពេញ នឹងផ្លាស់ប្តូរទីតាំងទីលានប្រជាធិបតេយ្យថ្មីហើយជំនួសឈ្មោះថ្មីថា សួនច្បារប្រជាធិបតេយ្យវិញ នាពេលខាងមុខ ក្រោយពីសម្តេច ហ៊ុន សែន បានស្នើឲ្យផ្លាស់ប្តូរកាលពីចុងឆ្នាំ ២០១៦ កន្លងមក។
លោក ម៉េត មាសភក្តី បានឲ្យដឹងថា សួនច្បារប្រជាធិបតេយ្យថ្មីនេះ ស្ថិតនៅទីតាំងសួនច្បារសូគីម៉ិច ជាប់ដងទន្លេសាប ក្នុងខណ្ឌឫស្សីកែវ រាជធានីភ្នំពេញ។ នៅពេលសួរថា តើការផ្លាស់ប្តូរទីតាំងសម្តែងមតិ ចេញឆ្ងាយពីទីប្រជុំជនបច្ចុប្បន្ននេះ អាចប៉ះពាល់ដល់ការសម្តែងមតិពលរដ្ឋដល់សាធារណជនក្នុងរាជធានីភ្នំពេញដែរទេ?
អ្នកនាំពាក្យសាលារាជធានីភ្នំពេញរូបនេះ បានបដិសេធភ្លាមថា វាមិនប៉ះពាល់ដល់ការសម្តែងមតិដល់សាធារណជននោះទេ។ លោកនិយាយថា ទីតាំងថ្មីមានចម្ងាយប្រមាណ ១គីឡូម៉ែត្រពីស្ពានមិត្តភាពកម្ពុជា-ជប៉ុន (ស្ពានជ្រោយចង្វា)ប៉ុណ្ណោះ គឺស្ថិតក្នុងទីប្រជុំជន នៅរាជធានីភ្នំពេញដដែល។ ម្យ៉ាងទៀត លោកបន្ថែមថា បច្ចុប្បន្ននេះ សេរីភាពការសម្តែងមតិនៅកម្ពុជា បើកទូលាយណាស់ ពីព្រោះពលរដ្ឋអាច ប្រព័ន្ធផ្សព្វផ្សាយសង្គមដែលជួយរុញច្រានព័ត៌មានបន្ថែមទៅកាន់មនុស្សទាំងក្នុង និងក្រៅប្រទេសភ្លាមៗ ។
បន្ថែមលើសពីនេះ អ្នកនាំពាក្យសាលារាជធានីភ្នំពេញ បានប្រាប់សារព័ត៌មានថ្មីៗពីមូលហេតុដែលអាជ្ញាធរប្តូរថ្មី ពីព្រោះសួនច្បារប្រជាធិបតេយ្យមានសួនច្បារអមដោយផ្កា និងរុក្ខជាតិលើផ្ទៃដីទំហំចំនួន ជាង២ម៉ឺនម៉ែត្រក្រឡា។ «ចំនួននេះ ធំជាងមុនជាង ១ម៉ឺនម៉ែត្រក្រឡា ធៀបនឹងទំហំទីលាន ប្រជាធិបតេយ្យបច្ចុប្បន្នចំនួន ៨ពាន់ម៉ែត្រក្រឡា»។ លោក ម៉េត មាសភក្តី បញ្ជាក់បន្ថែមនៅពេលអាជ្ញាធររាជធានីភ្នំពេញ បានចាប់ផ្តើមស្ថាបនាសួនច្បារប្រជាធិបតេយ្យនៅថ្ងៃទី៧ខែកុម្ភៈឆ្នាំ២០១៧ នេះទៅ។
ក្រៅពីការរៀបចំទីតាំងសម្តែងមតិថ្មី បន្ថែមលើសពីនេះ លោកបានបន្តប្រាប់ថា សាលារាជធានីកំពុងរៀបចំទីធ្លាសួនដោយក្រាលឥដ្ឋការឺឡា ចំណតរថយន្ត បង្គន់អនាម័យ បង្គោលហ្វាបំភ្លឺ និងកៅអីអង្គុយផង សម្រាប់ប្រជាពលរដ្ឋលំហែកំសាន្ត និងហាត់ប្រាណផង។
តាមលោក ម៉េត មាសភក្តី គម្រោងស្ថាបនាសួនច្បារប្រជាធិបតេយ្យថ្មីនេះ នឹងចំណាយរយៈពេល ៣ខែ រួច ពលរដ្ឋអាចប្រើប្រាស់ទីតាំងសម្តែងសេរីភាពថ្មី នាពេលខាងមុខ។
គួររម្លឹកថា សម្តេចនាយករដ្ឋមន្ត្រី ហ៊ុន សែន បានស្នើឲ្យអាជ្ញាធរផ្លាស់ប្តូរទីតាំងទីលានប្រជាធិបតេយ្យ ដោយសម្តេចបានលើកឡើងក្នុងទិវាជនពិការកម្ពុជាលើកទី ១៨ និងទិវាជនពិការអន្តរជាតិលើកទី ៣៤ កាលពីថ្ងៃទី៦ធ្នូឆ្នាំ ២០១៦ថា ការសម្តែងមតិនៅទីតាំងប្រជុំជនបច្ចុប្បន្ន បង្កភាពរញ៉េរញ៉ៃ។ សម្តេចសម្រេចឲ្យអាជ្ញាធររាជធានីភ្នំពេញរៀបចំសួនច្បារលើទីលានប្រជាធិបតេយ្យបច្ចុប្បន្ន ហើយឲ្យជនពិការសំដែងសិល្បៈ រកកម្រៃថវិកាចិញ្ចឹមជីវិតពួកគេ និងជាតំបន់ពាណិជ្ជកម្ម តំបន់អ្នកការទូត និងតំបន់ទេសចរណ៍វិញ។
«ការប្រមូលផ្តុំ វាអត់មានអីខុសគ្នាទេ។ សម័យឥឡូវ គេប្រមូលផ្តុំនៅកន្លែងណាក៏បានដែរ ព្រោះគេមិនមែនមកមើលនៅកន្លែងហ្នឹងទេ គេមើលតាមហ្វេសប៊ុក គេមើលតាមការផ្សាយនោះតើ»។ សម្តេច ហ៊ុន សែន លើហេតុផលការពារការប្តូរទីតាំងសម្តែងមតិថ្មី កន្លងមក។
គួរបញ្ជាក់ផងដែរ រដ្ឋាភិបាល តាមរយៈលោក កែប ជុតិមា អតីតអភិបាលរាជធានីភ្នំពេញបានបើកសម្ពោធទីលានប្រជាធិបតេយ្យ កាលពីថ្ងៃទី៤ ខែវិច្ឆិកា ឆ្នាំ២០១០ ទុកឲ្យប្រជាពលរដ្ឋ មន្ត្រីអង្គការសង្គមស៊ីវិល ព្រមទាំងគណបក្សនយោបាយ ជួបជុំបញ្ចេញសេរីភាពពួកគេ។ ក្រោយពីលទ្ធផលបោះឆ្នោតកាលពីឆ្នាំ២០១៣ គណបក្សសង្គ្រោះជាតិ បានប្រើប្រាស់ទីលានប្រជាធិបតេយ្យជាកន្លែងប្រមូលផ្តុំអ្នកគាំទ្រខ្លួន តវ៉ាមិនទទួលយកលទ្ធផលឆ្នោតជិតមួយឆ្នាំ៕
Tag:
ម៉េត មាសភក្តី
ទីលានប្រជាធិបតេយ្យ
សួនច្បារប្រជាធិបតេយ្យ
© រក្សាសិទ្ធិដោយ thmeythmey.com
