គ្រូបង្វឹកក្រុមគីរីវង់សុខសែនជ័យមានសង្ឃឹមតិច តែប្តេជ្ញាប្រឹងប្រែងឲ្យអស់ពីសមត្ថភាព

កីឡាជាតិ

ជាតិ

គ្រូបង្វឹកក្រុមគីរីវង់សុខសែនជ័យមានសង្ឃឹមតិច តែប្តេជ្ញាប្រឹងប្រែងឲ្យអស់ពីសមត្ថភាព

19, Feb 2017 , 8:39 am

រូបភាព

លោក ផាន់ ចាន់ផាត គ្រូបង្វឹកក្រុមគីរីវង់សុខសែនជ័យ

ដោយ:

ក្រុមជើងឯកពានរង្វាន់ក្របខណ្ឌលីកលំដាប់ទី២គីរីវង់សុខសែនជ័យ ត្រូវជួបប្រកួតជាមួយក្រុមព្រះខ័នរាជស្វាយរៀងក្នុងពានរង្វាន់ក្របខណ្ឌលីកកំពូលកម្ពុជានាល្ងាចថ្ងៃទី១៩ ខែកុម្ភៈ នៅកីឡដ្ឋានខេត្តស្វាយរៀង។ ការរៀបចំមិនទាន់បានល្អ និងការមិនមានកីឡាករបរទេសនៅក្រុមបានធ្វើឲ្យគ្រូបង្វឹកក្រុមគីរីសុខសែនជ័យ មានសង្ឃឹមតិចបំផុតក្នុងការយកឈ្នះក្រុមព្រះខ័នស្វាយរៀង តែយ៉ាងណា លោក នឹងខិតខំប្រឹងប្រែងឲ្យអស់ពីសមត្ថភាព។

ការប្រមូលផ្តុំកីឡាករបែបប្រញ៉ាប់ប្រញ៉ាលហាក់បីដូចធ្វើឲ្យក្រុមជើងឯកលីកលំដាប់ទី២ប្រចាំឆ្នាំ២០១៦ គីរីវង់សុខសែនជ័យ ដែលត្រូវឡើងមកលេងក្នុងក្របខណ្ឌលីកកំពូលកម្ពុជាត្រៀមខ្លួនមិនបានល្អ។ ជាពិសេសធ្វើឲ្យមានការយឺតយ៉ាវក្នុងការនាំចូលកីឡាករបរទេសដើម្បីជួយក្រុមក្នុងជំនួបថ្ងៃដំបូងជាមួយព្រះខ័នរាជស្វាយរៀង។

កត្តាទាំងនេះជាមូលហេតុធ្វើឲ្យលោក ផាន់ ចាន់ផាត ដែលជាគ្រូបង្វឹករបស់ក្រុមគីរីវង់សុខសែនជ័យស្ទើរតែមិនហ៊ានដាក់ក្តីសង្ឃឹមក្នុងការយកឈ្នះលើក្រុមព្រះខ័នរាជស្វាយរៀង។ តែយ៉ាងណា គ្រូបង្វឹករូបនេះបានប្តេជ្ញាថា នឹងខិតខំប្រឹងប្រែងឲ្យអស់ពីសមត្ថភាព ដោយផ្តោតទៅលើតំបន់ការពារឲ្យច្រើនជាងតំបន់ប្រយុទ្ធ។ ទោះបីជំនួបនេះមិនមានកីឡាករបរទេសក៏ដោយ ប៉ុន្តែលោកសង្ឃឹមថា នឹងអាចទប់ទល់ជាមួយក្រុមស្វាយរៀងបានយ៉ាងល្អ។

«យើងត្រៀមជាប្រចាំក្នុងការតទល់ជាមួយក្រុមខ្លាំង ប៉ុន្តែយើងសង្ឃឹមតិចក្នុងការឈ្នះ ព្រោះយើងមិនបានត្រៀមខ្លួនឲ្យល្អដូចគេដែលបានត្រៀមតាំងពីចប់លីកកំពូលឆ្នាំ២០១៦។ ចំពោះកីឡាករបរទេសដោយសាររយៈពេលខ្លី ធ្វើឲ្យខ្ញុំរៀបចំមិនទាន់គឺយើងមានតែអ្នកចាំទីជនជាតិវៀតណាមមួយនាក់ប៉ុណ្ណោះ»។ នេះជាសម្តីរបស់លោក ផាន់ ចាន់ផាត។

ដើម្បីរក្សាតុល្យភាពក្នុងប្រកួតប្រជែងជាមួយដែលលេងក្នុងក្របខណ្ឌលីកកំពូលកម្ពុជា ក្រុមជើងឯកក្របខណ្ឌលីកលំដាប់ទី២មួយនេះ ក៏មានគម្រោងនាំចូលកីឡាករបរទេសតាមចំនួនកំណត់របស់សហព័ន្ធកីឡាបាល់ទាត់កម្ពុជា ប្រហែលជាអាចក្នុងអំឡុងពេលប្រកួតជើងទី៣ ឬទី៤។

គិតមកពេលនេះក្រុមបាល់ទាត់គីរីវង់សុខសែនជ័យ បានប្រមូលផ្តុំកីឡាករសម្រាប់ត្រៀមលេងក្នុងក្របខណ្ឌលីកកំពូលកម្ពុជា ទើបតែបានរយៈពេលជាង១០ថ្ងៃប៉ុណ្ណោះ ក្រោយបញ្ចប់បេសកកម្មក្នុងក្របខណ្ឌលីកលំដាប់ទី២។ ក្រុមនេះបានឆ្លងកាត់ប្រកួតមិត្តភាពបានតែមួយលើកប៉ុណ្ណោះកាលពីថ្ងៃទី១៤ កុម្ភៈ ដោយបានចាញ់ក្រុមខណ្ឌពោធិ៍សែនជ័យក្នុងលទ្ធផល ២-០ ទៀតផង។

គួរបញ្ជាក់ថា ការប្រកួតបាល់ទាត់ដណ្តើមពានរង្វាន់ក្របខណ្ឌមិត្តហ្វូនខេមបូឌានលីកប្រចាំឆ្នាំ២០១៧ នៅថ្ងៃទី១៩ ខែកុម្ភៈ នេះមានការប្រកួតចំនួន៣គូ ក្នុងនោះក្រុមម្ចាស់ផ្ទះព្រះខ័នរាជស្វាយរៀងស្វាគមន៍ក្រុមជើងឯកលីកលំដាប់ទី២គីរីសុខសែនជ័យនៅម៉ោង៦ល្ងាច។ រីឯក្រុមអាស៊ីអឺរ៉ុបតទល់ជាមួយភ្នំពេញក្រោននៅកីឡដ្ឋានស្តាតចាស់នាវេលាម៉ោង៦ល្ងាចដូចគ្នា ខណៈម្ចាស់ផ្ទះវេស្ទើនទទួលក្រុមភ្ញៀវប៉ូលិសនាវេលាម៉ោង៣រសៀល៕