ជាតិ
ស្នាដៃលោកតា នូ លាត នឹងត្រូវដាក់បង្ហាញក្នុងព្រឹត្តិការណ៍អង្គរសង្ក្រាន្ត
× សៀមរាប៖ លោកតា នូ លាត មានស្នាដៃច្រើនទៅនឹងការធ្វើឧបករណ៍ប្រើប្រាស់ប្រចាំថ្ងៃរបស់ខ្មែរ។ ទោះជាអាយុចាស់ហើយក៏ពិតមែន តែលោកតានៅមានកម្លាំង និងសមត្ថភាពខ្ពស់ គួរឲ្យកត់សម្គាល់។ ស្នាដៃលោកតា នូ លាត នឹងត្រូវដាក់តាំងបង្ហាញក្នុងព្រឹត្តិការណ៍អង្គរសង្ក្រាន្តឆ្នាំ២០១៧ នៅក្នុង «ភូមិខ្ញុំ» ក្បែរបរិវេណប្រាសាទបាយ័ន។
ដើម្បីលើកតម្លៃទេពកោសល្យស្នាដៃអ្នកស្រុកអង្គរ អាជ្ញាធរជាតិអប្សរា នឹងរៀបចំការតាំងបង្ហាញស្នាដៃលោកតា នូ លាត នៅក្នុងព្រឹត្តិការណ៍អង្គរសង្ក្រាន្ត។ លោកតា នូ លាត នឹងបង្ហាញទេពកោសល្យធ្វើឧបករណ៍ប្រើប្រាស់ផ្ទាល់ ទៅដល់ភ្ញៀវទេសចរជាតិ និងអន្តរជាតិ ក្នុងបរិវេណភូមិខ្ញុំ។
នៅឆ្នាំនេះ លោកតា នូ លាត អាយុ ៨៤ ឆ្នាំហើយ។ លោកតាស្ថិតក្នុងចំណោមអ្នកស្រុកអង្គរដទៃទៀត ដែលចេះធ្វើឧបករណ៍ពីដែក មានដូចជា ពូថៅ កណ្តៀវ ខ្វែវ ផ្គាក់ ដាវបុរាណ កាំបិតបន្ទោះ។ល។ លោកនឹងដំឡើងឧបករណ៍សម្ភារប្រើប្រាស់ទាំងអស់ដែលលោកចេះ នៅចំពោះមុខភ្ញៀវទេសចរដែលនឹងមកចូលរួមក្នុងព្រឹត្តិការណ៍អង្គរសង្ក្រាន្ត។
មានស្រុកកំណើតនៅភូមិដូនទាវ ឃុំរលួស ស្រុកប្រាសាទបាគង ខេត្តសៀមរាប លោកតា នូ លាត មានកូនចំនួន៨នាក់។ លោកតាចេះធ្វើឧបករណ៍ប្រើប្រាស់ខាងលើតាំងពីអាយុ១៧ តាមរយៈឳពុកមិត្តភក្តិរបស់លោកតា។ លោកបានរម្លឹកថា នៅពេលនោះគឺរាល់ថ្ងៃអាទិត្យ លោកតែងទៅដុំដែកលេងនៅផ្ទះមិត្តភក្តិ តែពេលនោះលោកមិនយកធ្វើជាមុខរបរជាប់នោះទេ។
ទោះជាចេះការងារដែកស្ទាត់ជំនាញនៅអាយុត្រឹម១៧ឆ្នាំក៏ដោយ តែនៅពេលនោះលោកតា នូ លាត មានអាជីពជាជាងឈើ និងជាងផ្ទះ។ លោកតាចេះធ្វើ តុ ទូ រទេះគោ ។ល។ តែក្រោយមកឈើក៏ខ្សត់ ហើយបរិមាណការប្រើប្រាស់រទេះកង់ឈើក៏ធ្លាក់ចុះ ទើបលោកតា នូ លាត បានដូរមកប្រកបរបរធ្វើជាជាងដែកវិញម្តង។
ជាង១០ឆ្នាំមកនេះ ស្នាដៃរបស់លោកតា នូ លាត ទទួលបានការចាប់អារម្មណ៍ខ្លាំងពីអតិថិជន ហើយជនបរទេសជាច្រើន បានមកជាវឧបករណ៍ពីកន្លែងរបស់លោក។ លោកតា នូ លាត ក៏បានរម្លឹកដែរ ក្រៅពីជំនាញដែក និងឈើ លោកក៏ចេះធ្វើខ្លែងឯក និងកាំភ្លើងព្រៃផងដែរ។ នៅសម័យ ប៉ុល ពត លោកតាត្រូវគេចាត់តាំងឲ្យធ្វើកាំភ្លើងព្រៃសម្រាប់ការប្រើប្រាស់របស់ឈ្លប។
ទោះជាមានអាយុចាស់ទៅហើយក៏ពិតមែន តែលោកតា នូ លាត មិនគិតថានឹងបោះបង់អាជីពជាជាងដែកនោះទេ។ លោកតាអះអាងថា លោកនឹងបន្តអាជីពនេះរហូតដល់ថ្ងៃចុងក្រោយរបស់លោក៕
Tag:
នូ លាត
អ្នកស្រុកអង្គរ
អង្គរសង្ក្រាន្ត
© រក្សាសិទ្ធិដោយ thmeythmey.com