អន្តរជាតិ
ករណីសាកសពបងប្រុសលោកគីមជុងអ៊ុន៖ ម៉ាឡេស៊ី ទទូចឲ្យកូរ៉េខាងជើងគោរពច្បាប់ខ្លួនផង
× មេប៉ូលិសម៉ាឡេស៊ី បានប្រតិកម្មខ្លាំងៗទៅនឹងកូរ៉េខាងជើងរឿងការទាមទារសាកសពរបស់បងប្រុសលោកប្រធានាធីបតីគីម ជុងអ៊ុន។ ម៉ាឡេស៊ី បានព្រមានកូរ៉េខាងជើងឲ្យគោរពតាមច្បាប់ និងបទបញ្ជារបស់ប្រទេសខ្លួនផង។
« យើង មានច្បាប់នៅក្នុងប្រទេសម៉ាឡេស៊ី។ ហើយអ្នកគ្រប់គ្នា ត្រូវតែគោរព និងធ្វើតាមច្បាប់ និងបទបញ្ជារបស់យើង ... ហើយនោះ ក៏រាប់បញ្ចូលទាំងកូរ៉េខាងជើងផងដែរ។» នេះ គឺជាសេចក្តីថ្លែងការណ៍របស់មេប៉ូលិសម៉ាឡេស៊ី លោកឧត្តមសេនីយ៍ Khalid Abu Bakar ជាមួយនឹងសារព័ត៌មាន Channel News Asia ប្រតិកម្មទៅនឹងជំហររបស់កូរ៉េខាងជើង។
នៅថ្ងៃទី១៧ កុម្ភៈ កន្លងទៅ អគ្គរដ្ឋទូតកូរ៉េខាងជើងប្រចាំកូឡាឡាំពួរ Kang Chol បានចោទម៉ាឡេស៊ីថាបិទបាំងរឿងមួយចំនួន ពីក្រោយនៃការមិនព្រមប្រគល់សាកសពរបស់បងប្រុងលោក គីម ជុងអ៊ុនទៅឲ្យស្ថានទូតកូរ៉េខាងជើង។ «យើង ពិតជាមិនពេញចិត្តចំពោះឥរិយាបថម៉ាឡេស៊ី ...ហើយ យើង នឹងយករឿងនេះទៅកាន់តុលាការអន្តរជាតិ»។ នេះគឺជាការអះអាងរបស់អគ្គរដ្ឋទូតកូរ៉េខាងជើងប្រចាំម៉ាឡេស៊ី។
សូមរម្លឹកបន្តិចថា លោក គីម ជុងណាំ ដែលមានម្តាយផ្សេងគ្នាពីលោកប្រធានាធិបតីគីម ជុងអ៊ុន ត្រូវបានសម្លាប់នៅព្រលានយន្តហោះកូឡាឡាំពួនៃប្រទេសម៉ាឡេស៊ីនៅថ្ងៃទី១៤ ខែកុម្ភៈ។ បើតាមការអះអាងរបស់ប៉ូលិសម៉ាឡេស៊ី ម៉ាឡេស៊ី នឹងប្រគល់សាកសពឲ្យប្រសិន សាច់ញាត មកបញ្ជាក់ និងផ្ទៀងផ្ទាត់ អត្តសញ្ញាណ និង DNA ជាមួយនឹងសពជាមុនសិន។
មកទល់ពេលនេះ ប៉ូលិសម៉ាឡេស៊ី បានចាប់ខ្លួនជនសង្ស័យបីនាក់ ពាក់ព័ន្ធនឹងឃាតកម្មនេះ ដោយយោងតាមកាមេរ៉ាសុវត្ថិភាពដែលដាក់នៅកន្លែងកើតហេតុ។ ជនសង្ស័យដែលប៉ូលិសបានចាប់ខ្លួនមានស្ត្រីពីររូប និងបុរសមួយរូប ដែលក្នុងនោះ មានស្ត្រីម្នាក់ មានភ្ជាប់ជាមួយនឹងលិខិតឆ្លងដែន វៀតណាម និងស្ត្រីម្នាក់ទៀត មានភ្ជាប់ជាមួយនឹងលិខិតឆ្លងដែនឥណ្ឌូណេស៊ី។ រីឯបុរសដែលជាជនសង្ស័យដែលប៉ូលិសទើបតែចាប់ខ្លួនបានចុងក្រោយនៅថ្ងៃទី១៦ កុម្ភៈ ដែលជាមិត្តប្រុសរបស់ស្ត្រីជនជាតិឥណ្ឌូណេស៊ីនោះ មានសញ្ជាតិម៉ាឡេស៊ី៕
Tag:
ម៉ាឡេស៊ី
កូរ៉េខាងជើង
© រក្សាសិទ្ធិដោយ thmeythmey.com