អន្តរជាតិ
ចិន ប្រាប់កូរ៉េខាងត្បូងរឿងដំឡើងTHAAD៖ កុំ គិតតែផលប្រយោជន៍សន្តិសុខខ្លួន គិតដល់គេខ្លះផង
× រដ្ឋាភិបាលក្រុងប៉េកាំង បានទទួលស្គាល់ពីតម្រូវការការបង្កើនសន្តិសុខរបស់រដ្ឋាភិបាលក្រុងសេអ៊ូលដើម្បីការពារពីការគំរាមខាងក្រៅ។ ក៏ប៉ុន្តែក្រុងប៉េកាំង ក៏បានទទូចឲ្យក្រុងសេអ៊ូល គិតគូរពីសុវត្ថិភាពរបស់ប្រទេសដ៏ទៃផង ដោយ មិនត្រូវមើលតែពីផលប្រយោជន៍របស់ប្រទេសខ្លួនប៉ុណ្ណោះនោះទេ។ ក្រុងប៉េកាំង សំដៅលើការដំឡើងប្រព័ន្ធការមីស៊ីលនៅក្នុងទឹកដីកូរ៉េខាងត្បូង។
«ការរឹតបន្តឹងសន្តិសុខរបស់ប្រទេសមួយ មិនគួរធ្វើឡើងដោយឈរលើមូលដ្ឋាននៃការគំរាមកំហែងសន្តិសុខប្រទេសដទៃឡើយ។ ហើយ ចិន បានយល់ដឹងពីតម្រូវការរបស់កូរ៉េខាងត្បូងក្នុងការការពារសន្តិសុខខ្លួន តែក្នុងពេលជាមួយគ្នានោះ កូរ៉េខាងត្បូង គួរតែគោរពពីជំហរដ៏សមហេតុផលរបស់ចិនដែរ»។ នេះគឺជាសេចក្តីថ្លែងការណ៍របស់រដ្ឋមន្ត្រីការបរទេសចិន ថ្លែងទៅកាន់រដ្ឋមន្ត្រីការបរទេសកូរ៉េខាងត្បូងនៅក្នុងជំនួបក្រៅកិច្ចប្រជុំសន្និសីទសន្តិសុខ Munich ដែលបានចុះផ្សាយនៅក្រសួងការទេសចិននៅថ្ងៃទី១៩ កុម្ភៈនេះ។
ជាមួយនឹងជំហរមិនប្រែប្រួល នាជំនួបនោះដែរ ប្រមុខការទូតចិន លោក វ៉ាង យីង ក៏បានប្រាប់ប្រមុខការទូតកូរ៉េខាងត្បូង លោក Yun Byung-se ចិន ជំទាស់ដាច់ខាតចំពោះផែនការនៃដំឡើងប្រព័ន្ធការពារមីស៊ីល THAAD របស់សហអាមេរិក នៅក្នុងទឹកដីកូរ៉េខាងត្បូង។
សម្រាបផងដែរថា នៅថ្ងៃទី០៨ ខែកក្កដា ឆ្នាំមុន រដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងសេអ៊ូល បានព្រមព្រៀងជាផ្លូវការក្នុងការដំឡើងប្រព័ន្ធការពារមីស៊ីលរបស់អាមេរិកនៅក្នុងទីកដីកូរ៉េខាងត្បូង។ ការសម្រេចដំឡើងប្រព័ន្ធការពារធុនធ្ងន់នេះ ធ្វើឡើងក្រោមហេតុផលដើម្បីរក្សាសុវត្ថិភាព និងសន្តិសុខពីការវាយប្រហារពីកូរ៉េខាងជើង ដ្បិត ក្រុងព្យុងយ៉ាង តែងតែបាញ់សាកល្បងអាវុធនុយក្លេអ៊ែរ និងសព្វាវុធទំនើបៗ ដែលកូរ៉េខាងត្បូង ធា្លប់អះអាងថា ខ្លួនគ្មានសមត្ថភាពដើម្បីតបតវិញឡើយ ប្រសិន គ្មានជំនួយពីអាមេរិកនោះ។
កន្លងមក ចិន តែងតែចេញថ្លែងការណ៍ជំទាស់ដាច់ខាតចំពោះផែនការ ដ្បិត ចិន យល់ឃើញថា ប្រព័ន្ធការពារមីស៊ីលនេះ នឹងមានសមត្ថភាពចាប់បានរូបភាព ឬសកម្មភាពនៅក្នុងតំបន់មួយចំនួនរបស់ចិន ពោលគឺ ប្រព័ន្ធការពារជាតិមីស៊ីល នឹងរំលោភលើប្រយោជន៍សន្តិសុខរបស់ចិន។
យ៉ាងណាក៏ដោយ រដ្ឋមន្ត្រីការពារជាតិអាមេរិក លោក James Mattis បានបញ្ជាក់ចុងក្រោយទៀតថា ប្រព័ន្ធការពារនោះ មិនដាក់គោលដៅទៅលើប្រទេសដទៃឡើយ ពោលគឺ ដើម្បីតែការពារពីការគំរាមកំហែងរបស់កូរ៉េខាងជើងខាងប៉ុណ្ណោះ។
«ខែលការពារមីស៊ីល THAAD គឺសម្រាប់តែការពារប្រជាជននៃសម្ព័ន្ធមិត្តរបស់យើង និងទាហានរបស់យើង ដែលបានប្តេជ្ញាចិត្តចំពោះកិច្ចការការពាររបស់ពួកគេ ហើយប្រសិនបើកូរ៉េខាងជើង មិនបង្ហាញពីឥរិយាបថបង្ករឿងនោះទេ យើង ក៏មិនដំឡើងខែលការពារមីស៊ីលនៅទីនោះផងដែរ»។ នេះ គឺជាសេចក្តីថ្លែងការណ៍របស់លោករដ្ឋមន្ត្រីការពារជាតិ James Mattis ទៅកាន់អ្នកសារព័ត៌មាននៅថ្ងៃទី២ កុម្ភៈ។
លោករដ្ឋមន្ត្រីការពារជាតិ ក៏បានសង្កត់ធ្ងន់ទៀតថា ប្រទេសដទៃផ្សេងទៀត មិនចាំបាច់ព្រួយបារម្ភអំពីខែលការពារមីស៊ីលនេះឡើយ ដ្បិតខែលនោះ បំពាក់ឡើងដើម្បីឆ្លើយតបទៅនឹងសកម្មភាពកូរ៉េខាងជើងប៉ុណ្ណោះ៕
© រក្សាសិទ្ធិដោយ thmeythmey.com