អន្តរជាតិ
កាមេរ៉ាសុវត្ថិភាព៖ មានស្ត្រីម្នាក់ហក់ទៅខ្ទប់មុខបងប្រុសលោកគីម ជុងអ៊ុន មុនពេលលោកស្លាប់ លោក គីម ជុងណាំ (ប្រភពរូបភាព៖ The National Post)
× អង្គហេតុនៃការស្លាប់របស់បងប្រុសប្រធានាធិបតីកូរ៉េខាងជើងលោក គីម ជុងអ៊ុន កាន់តែត្រូវបានលាតត្រដាងកាន់តែច្បាស់ហើយ។ បន្ទាប់ពីឈានដល់ការចាប់ខ្លួនជនសង្ស័យជាបន្តបន្ទាប់ហើយនោះ កាមេរ៉ាសុវត្ថិភាព បានបង្ហាញពីសកម្មភាពមុននៃការស្លាប់របស់លោក គីម ជុងណាំ ដែលកូរ៉េខាងត្បូងអះអាងថាជាបងប្រុសរបស់លោកគីម ជុងអ៊ុននោះ។ នោះគឺ លោក ត្រូវបានស្ត្រីជនសង្ស័យឆ្មក់ពីក្រោយ ហើយយកសារធាតុគីមីខ្ទប់មុខលោក មុនពេលលោកស្លាប់។
តាមរយៈវីដេអូខ្លីជាងមួយនាទីដែលដកចេញពីកាមេរ៉ាសុវត្ថិភាពរបស់ CCTV មានស្ត្រីម្នាក់ ដែលមានសម្លៀកបំពាក់ពណ៌ស បានយកដៃទៅខ្ទប់មុខលោក គីម ជុងណាំពីក្រោយ ហើយ ក៏បានដើរចេញទៅបាត់។ តាមរយៈវីដេអូនោះ ក៏បានបង្ហាញឲ្យឃើញដែលថា លោក គីម ជុងណាំ ក៏បានព្យាយាមឲ្យបុគ្គលិកព្រលានយន្តហោះជួយលោក ជាមួយកាយវិការថាលោក ត្រូវបានគេលាបមុខជាមួយនឹងសារធាតុគីមី។
ហើយបើតាមការអះអាងរបស់ប៉ូលិសម៉ាឡេស៊ី លោក គីម ជុងណាំ បានប្រាប់អ្នកផ្តល់សេវាកម្មនៅព្រលានយន្តហោះថា មានស្ត្រីពីរនាក់ បានខ្ទប់មុខលោកជាមួយនឹងសារធាតុអ្វីម្យ៉ាង។ នេះបើយោងតាមការចុះផ្សាយរបស់សារព័ត៌មាន Channel News Asia។
សូមរម្លឹកបន្តិចថា លោក គីម ជុងណាំ ដែលមានម្តាយផ្សេងគ្នាពីលោកប្រធានាធិបតីគីម ជុងអ៊ុន ត្រូវបានសម្លាប់នៅព្រលានយន្តហោះកូឡាឡាំពួនៃប្រទេសម៉ាឡេស៊ីនៅថ្ងៃទី១៤ ខែកុម្ភៈ។ លោក បានស្លាប់នៅតាមផ្លូវ ខណៈមន្ត្រីព្រលានយន្តហោះ បញ្ជូនលោកទៅកាន់សង្គ្រោះបន្ទាន់ បន្ទាប់ពី មានហេតុការណ៍ បានកើតឡើងនៅព្រលានយន្តហោះ។
មកទល់ពេលនេះ ប៉ូលិសម៉ាឡេស៊ី បានចាប់ខ្លួនជនសង្ស័យបីនាក់ ពាក់ព័ន្ធនឹងឃាតកម្មនេះ ដោយយោងតាមកាមេរ៉ាសុវត្ថិភាពដែលដាក់នៅកន្លែងកើតហេតុ។ ជនសង្ស័យដែលប៉ូលិសបានចាប់ខ្លួនមានស្ត្រីពីររូប និងបុរសមួយរូប ដែលក្នុងនោះ មានស្ត្រីម្នាក់ មានភ្ជាប់ជាមួយនឹងលិខិតឆ្លងដែន វៀតណាម និងស្ត្រីម្នាក់ទៀត មានភ្ជាប់ជាមួយនឹងលិខិតឆ្លងដែនឥណ្ឌូណេស៊ី។ រីឯបុរសដែលជាជនសង្ស័យដែលប៉ូលិសទើបតែចាប់ខ្លួនបានចុងក្រោយនៅថ្ងៃទី១៦ កុម្ភៈ ដែលជាមិត្តប្រុសរបស់ស្ត្រីជនជាតិឥណ្ឌូណេស៊ីនោះ មានសញ្ជាតិម៉ាឡេស៊ី។
មិនទាន់មានសាច់ញាតិណាមួយ មកបញ្ជាក់អត្តសញ្ញាណដើម្បីទទួលយកសាកសពនៅឡើយនោះទេ បើទោះបីជា ស្ថានទូតកូរ៉េខាងជើងប្រចាំម៉ាឡេស៊ី បានស្នើយកសាកសពក៏ដោយ។ តាមប៉ូលិសម៉ាឡេស៊ី ម៉ាឡេស៊ី នឹងប្រគល់សាកសពនោះឲ្យ ប្រសិនបើ សាច់ញាតិពាក់ព័ន្ធ ផ្ទៀងផ្ទាត់ពី DNA ដូចគ្នាហើយនោះ៕
Tag:
កូរ៉េខាងជើង
ម៉ាឡេស៊ី
© រក្សាសិទ្ធិដោយ thmeythmey.com