អន្តរជាតិ
ម៉ាឡេស៊ី-កូរ៉េខាងជើង ប្រឈមការទូតកាន់តែខ្លាំង ខណៈតម្រុយឃាតកម្មបងប្រុសលោកគីម ជុងអ៊ុកាន់តែលេចឡើង
× ឃាតកម្មលើ លោកគីម ជុងណាំ បងប្រុសលោកប្រធានាធិបតីកូរ៉េខាងជើងគីម ជុងអ៊ុន ក្នុងទឹកដីម៉ាឡេស៊ី បាននិងកំពុងតែធ្វើឲ្យក្រុងព្យុងយ៉ាង និងក្រុងកូឡាឡាំពួរ ត្រូវប្រឈមការទូតគ្នាកាន់តែខ្លាំង។ ម៉ាឡេស៊ី កោះហៅស្ថានទូតកូរ៉េខាងជើងប្រចាំរាជធានីកូឡាឡាំពួរបកស្រាយនូវសេចក្តីថ្លែងការណ៍របស់ខ្លួនដែលបានចោទម៉ាឡេស៊ីរឿងបិទបាំងសំណុំរឿងឃាតកម្មលោក គីម ជុងណាំ និងមិនព្រមប្រគល់សាកសពឲ្យ។ ការប្រឈមមុខនេះ ក៏ស្របនឹងការបង្ហាញជនសង្ស័យនៃឃាតកម្មបន្ថែមទៀតដែលពួកគេមកពីប្រទេសកូរ៉េខាងជើងតែម្តង។
រដ្ឋាភិបាលម៉ាឡេស៊ី នៅថ្ងៃចន្ទនេះ បានកោះហៅអគ្គរដ្ឋទូតកូរ៉េខាងជើងប្រចាំរាជធានីកូឡាឡាំពួរដើម្បបកស្រាយ និងពន្យល់ពីសេចក្តីថ្លែងការណ៍ចោទប្រកាន់ម៉ាឡេស៊ីពាក់ព័ន្ធនឹងឃាតកម្មលើបងប្រុសលោកប្រធានាធិបតីគីម ជុងអ៊ុន។ ជាងនេះទៅទៀតនោះ អគ្គរាជទូតម៉ាឡេស៊ីប្រចាំក្រុងព្យុងយ៉ាង ក៏ត្រូវបានក្រើនរម្លឹកសម្រាប់ការពិគ្រោះយោបល់ផងដែរ។ នេះបើយោងតាមការចុះផ្សាយ Channel News Asia។
ក្រសួងការបរទេសម៉ាឡេស៊ី បានចេញសេចក្តីថ្លែងការណ៍មួយប្រតិកម្មទៅនឹងការលើកឡើងរបស់អគ្គរដ្ឋទូតកូរ៉េខាងជើង លោក Kang Chol ដោយបានចាត់ទុកថាជាការលើកឡើងនោះគ្មានមូលដ្ឋាន ហើយ ម៉ាឡេស៊ី ក៏ព្រមានចាត់វិធានមួយតឹងរឹងដើម្បីឆ្លើយតបនឹងការប៉ុនប៉ងនានាដែលធ្វើឲ្យខូចកេរ្តិ៍ឈ្មោះម៉ាឡេស៊ី។
ម៉ាឡេស៊ី ឲ្យកូរ៉េខាងជើង គោរពច្បាប់ខ្លួន
នៅថ្ងៃទី១៧ កុម្ភៈ កន្លងទៅ លោកអគ្គរដ្ឋទូតកូរ៉េខាងជើងប្រចាំកូរ៉េម៉ាឡេស៊ី បានថ្លែងទៅកាន់អ្នកសារព័ត៌មានថា ម៉ាឡេស៊ី មានការបិទបាំងចំពោះការពិនិត្យសាកសពលោក គីម ជុងណាំ ហើយ ស្ថានទូតកូរ៉េខាងជើង នឹងមិនទទួលស្គាល់លទ្ធផលនៃការរកឃើញនោះទៀតផង។ កូរ៉េខាងជើង ស្នើឲ្យម៉ាឡេស៊ីបញ្ជូនសាកសពទៅឲ្យកូរ៉េខាងជើង ដ្បិតជនរងគ្រោះនោះ កាន់លិខិតឆ្លងដែនកូរ៉េខាងជើង។ លោក Kang Chol ថែមទាំងព្រមានចាត់វិធានប្រឆាំងនឹងម៉ាឡេស៊ី ដោយយកសំណុំរឿងនោះទៅកាន់តុលាការអន្តរជាតិទៀតផង។
យ៉ាងណាក៏ដោយ ក្រសួងការបរទេសម៉ាឡេស៊ី បានអះអាងថា ឃាតកម្ម បានកើតឡើងនៅក្នុងទឹកដីម៉ាឡេស៊ី និងស្ថិតក្រោមស្ថានភាពអាថកំបាំងទៀត ដែលនេះ គឺជាការទទួលខុសត្រូវរបស់ប៉ូលិសម៉ាឡេស៊ី ក្នុងការទទួលខុសត្រូវស៊ើបអង្កេតដើម្បីកំណត់ហេតុផលនៃការស្លាប់នោះ។
ជាងនេះទៀតនោះ ម៉ាឡេស៊ី បានផ្តាំផ្ញើដល់កូរ៉េខាងជើងថា រដ្ឋាភិបាលម៉ាឡេស៊ី ធ្វើការប្រកបដោយតម្លាភាព ហើយនៅពេលការស៊ើបអង្កេតត្រូវបានបញ្ចប់ ម៉ាឡេស៊ី នឹងជូនដំណឹង និងថែមទាំងប្រគល់សាកសពនោះទៅឲ្យក្រុមគ្រួសារសាកសពតាមរយៈច្បាប់ និងនីតិវិធីម៉ាឡេស៊ី។
សូមរម្លឹកបន្តិចថា លោក គីម ជុងណាំ ដែលមានម្តាយផ្សេងគ្នាពីលោកប្រធានាធិបតីគីម ជុងអ៊ុន ត្រូវបានសម្លាប់នៅព្រលានយន្តហោះកូឡាឡាំពួនៃប្រទេសម៉ាឡេស៊ីនៅថ្ងៃទី១៤ ខែកុម្ភៈ។ លោក បានស្លាប់នៅតាមផ្លូវ ខណៈមន្ត្រីព្រលានយន្តហោះ បញ្ជូនលោកទៅកាន់សង្គ្រោះបន្ទាន់ បន្ទាប់ពី មានហេតុការណ៍ បានកើតឡើងនៅព្រលានយន្តហោះ។
អ្វីគួរកត់សម្គាល់នោះ តាមរយៈវីដេអូខ្លីជាងមួយនាទីដែលដកចេញពីកាមេរ៉ាសុវត្ថិភាពរបស់ CCTV មានស្ត្រីម្នាក់ ដែលមានសម្លៀកបំពាក់ពណ៌ស បានយកដៃទៅខ្ទប់មុខលោក គីម ជុងណាំពីក្រោយ ហើយ ក៏បានដើរចេញទៅបាត់។ តាមរយៈវីដេអូនោះ ក៏បានបង្ហាញឲ្យឃើញដែលថា លោក គីម ជុងណាំ ក៏បានព្យាយាមឲ្យបុគ្គលិកព្រលានយន្តហោះជួយលោក ជាមួយកាយវិការថាលោក ត្រូវបានគេលាបមុខជាមួយនឹងសារធាតុគីមី។
ហើយបើតាមការអះអាងរបស់ប៉ូលិសម៉ាឡេស៊ី លោក គីម ជុងណាំ បានប្រាប់អ្នកផ្តល់សេវាកម្មនៅព្រលានយន្តហោះថា មានស្ត្រីពីរនាក់ បានខ្ទប់មុខលោកជាមួយនឹងសារធាតុអ្វីម្យ៉ាង។ នេះបើយោងតាមការចុះផ្សាយរបស់សារព័ត៌មាន Channel News Asia។
ជនសង្ស័យបន្ថែមមានសញ្ជាតិកូរ៉េខាងជើង មានន័យដូច្នេះចំពោះឃាតកម្មនេះ?
នៅប៉ុន្មានថ្ងៃក្រោយនៃឃាតកម្មនេះ ប៉ូលិសម៉ាឡេស៊ី ក៏បានឃាត់ និងចាប់ខ្លួនជនសង្ស័យបួននាក់តាមរយៈកាមេរ៉ាសុវត្ថិភាពផងដែរ។ ជនសង្ស័យដែលប៉ូលិសបានចាប់ខ្លួនមានស្ត្រីពីររូប និងបុរសមួយរូប ដែលក្នុងនោះ មានស្ត្រីម្នាក់ មានភ្ជាប់ជាមួយនឹងលិខិតឆ្លងដែន វៀតណាម និងស្ត្រីម្នាក់ទៀត មានភ្ជាប់ជាមួយនឹងលិខិតឆ្លងដែនឥណ្ឌូណេស៊ី។ រីឯបុរសដែលជាជនសង្ស័យដែលប៉ូលិសទើបតែចាប់ខ្លួនបានចុងក្រោយនៅថ្ងៃទី១៦ កុម្ភៈ ដែលជាមិត្តប្រុសរបស់ស្ត្រីជនជាតិឥណ្ឌូណេស៊ីនោះ មានសញ្ជាតិម៉ាឡេស៊ី។
ការតាមចាប់ខ្លួន និងវែកមុខជនសង្ស័យ នៅមិនទាន់ចប់ឡើយ។ មិនទាន់ចប់នោះ ក៏ព្រោះតែម៉ាឡេស៊ី កំពុងតែដាក់ការសង្ស័យខ្ពស់ទៅលើពលរដ្ឋកូរ៉េខាងជើងបួននាក់ផ្សេងទៀត ដែលបានចាកចេញពីម៉ាឡេស៊ីក្នុងថ្ងៃនៃការកើតហេតុនោះ។ ហើយបើតាមការអះអាងរបស់ប៉ូលិសឥណ្ឌូណេស៊ី នៅថ្ងៃទី២០ កុម្ភៈនេះ យ៉ាងហោចណាស់ក្នុងចំណោមជនសង្ស័យពលរដ្ឋកូរ៉េខាងជើងទាំងបួននោះ មានបីនាក់ បានចាកចេញពីព្រលានយន្តហោះក្រុងហ្សាកាតារនិងបន្តដំណើរទៅកាន់ក្រុងឌុយបៃ។
ជុំវិញបញ្ហាឃាតកម្មនេះ មានការលើកឡើងពីមន្ត្រីចារកម្មកូរ៉េខាងត្បូង ដោយអះអាងថា កូរ៉េខាងជើង ជាអ្នកបញ្ជាឲ្យសម្លាប់ ហើយ ការបញ្ជានេះ ត្រូវបានដាក់អស់រយៈពេលប្រាំឆ្នាំមកហើយ៕
Tag:
កូរ៉េខាងជើង
ម៉ាឡេស៊ី
© រក្សាសិទ្ធិដោយ thmeythmey.com