អន្តរជាតិ
ប្រធានាធិបតីកុងហ្គោ ចង់រក្សាអំណាច រហូតប្រកាសថាគ្មានលុយរៀបចំការបោះឆ្នោត?
× សាធារណរដ្ឋប្រជាធិបតេយ្យកុងហ្គោសម្រេចមិនរៀបចំការបោះឆ្នោតនៅឆ្នាំនេះទេដោយលើកហេតុផលថា ខ្លួនគ្មានលុយចំណាយសម្រាប់ការបោះឆ្នោតទេ។ ប៉ុន្តែគេដឹងច្បាស់ថា ហេតុផលសំខាន់នៅពីក្រោយការពន្យារពេលនេះជាវិធីសាស្ត្ររក្សាអំណាចរបស់ប្រធានាធិបតីផុតអាណត្តិ Joseph Kabila ដែលអាណត្តិលោកចប់តាំងពីចុងឆ្នាំមុនម្ល៉េះនោះ។
ចុងក្រោយ ក្តីសង្ឃឹមថា នឹងមានការផ្ទេរអំណាចដោយសន្តិវិធីនៅសាធារណរដ្ឋប្រជាធិបតេយ្យកុងហ្គោនៅចុងឆ្នាំ ២០១៧ នេះរលំរលាយអស់ ក្រោយរដ្ឋាភិបាលរដ្ឋអាហ្វ្រិកមួយនេះប្រកាសមិនរៀបចំការបោះឆ្នោត។ មូលហេតុចម្បងរបស់រដ្ឋាភិបាលគឺ ខ្លួនគ្មានថវិកាគ្រប់គ្រាន់សម្រាប់ដំណើរការរៀបចំការបោះឆ្នោត។
រដ្ឋមន្ត្រីទទួលបន្ទុកថវិការដ្ឋកុងហ្គោលោក Pierre Kangudia Mbayi បានអះអាងថា រដ្ឋាភិបាលគ្មានលុយសម្រាប់រៀបចំការបោះឆ្នោតឡើយព្រោះដើម្បីបញ្ចប់នីតិវិធីបោះឆ្នោតទាំងមូល គេត្រូវចំណាយលុយសរុប ១,៨ពាន់លានដុល្លារអាមេរិកឯណោះ។
យោងតាមសារព័ត៌មាន African News លោក Pierre Kangudia Mbayi បានបញ្ជាក់ដូច្នេះ៖ «វាជារឿងលំបាកដែលគិតថា យើងអាចរកបានលុយ ១,៨ពាន់លានដុល្លារនៅឆ្នាំនេះ»។
ទំហំការចំណាយរហូតដល់ ១,៨ពាន់លានដុល្លារនេះ (ពីរភាគបីនៃការចំណាយក្នុងការបោះឆ្នោតនៅអាមេរិក) ត្រូវបានវាយតម្លៃដោយគណៈកម្មាធិការរៀបចំការបោះឆ្នោត។ ហើយការចំណាយច្រើនសន្ធឹកសន្ធាប់បែបនេះនេះត្រូវបានគណៈកម្មាធិការនេះពន្យល់ថា វាពាក់ព័ន្ធការលំបាកក្នុងការចុះឈ្មោះប្រជាជនគ្រប់អាយុបោះឆ្នោតដែលមានច្រើនជាង ៣០លាននាក់នោះ។
អាចថា វាជាហេតុផលមួយដែលជំរុញឲ្យមានការលើកពេលបោះឆ្នោតព្រោះប្រទេសកុងហ្គោប្រឈមបញ្ហាសេដ្ឋកិច្ចដែរ។ ហើយពាក់ព័ន្ធការខ្វះខាតធនធាននេះដែរ គេនៅមិនទាន់ដឹងច្បាស់ថា សហគមន៍អន្តរជាតិ និងប្រទេសជាម្ចាស់ជំនួយ នឹងឆ្លើយតបបែបណាឡើយដើម្បីឲ្យការបោះឆ្នោតអាចប្រព្រឹត្តទៅបានតាមការគ្រោងទុក។
យ៉ាងណាក៏ដោយចុះ គេឃើញមានការលើកឡើងពីហេតុផលនយោបាយផងដែរ ដែលវាជំរុញឲ្យមានការពន្យារពេលបោះឆ្នោតជាថ្មីនេះ ព្រោះប្រធានាធិបតីផុតអាណត្តិ Joseph Kabila មិនចង់ផ្ទេរអំណាច។ តាមពិតទៅកាលបរិច្ឆេទនៃការបោះឆ្នោតគឺយ៉ាងយូរត្រឹមចុងឆ្នាំ ២០១៧ ដែលវាត្រូវបានកំណត់ច្បាស់នៅក្នុងកិច្ចព្រមព្រៀងនយោបាយមួយដែលរដ្ឋាភិបាលនិងក្រុមប្រឆាំងដែលសម្រេចបានកាលពីចុងឆ្នាំមុន ក្រោយភាពតានតឹងផ្នែកនយោបាយកើតឡើង។
ភាពតានតឹងនិងហិង្សានយោបាយនោះកើតឡើងកាលពីឆ្នាំមុន ក្រោយពេលដែលលោក Joseph Kabila ដែលចប់អាណត្តិចុងឆ្នាំ ២០១៦ បដិសេធផ្ទេរអំណាច ដោយរង់ចាំរហូតដល់មានការរើសមេដឹកនាំថ្មី។ ហើយគណៈកម្មាធិការរៀបចំការបោះឆ្នោតក៏ប្រកាសពន្យារពេលបោះឆ្នោតរហូតដល់ដើមឆ្នាំ ២០១៨ ដែលបង្កឲ្យមានការបាតុកម្មតវ៉ានិងផ្ទុះហិង្សាជាដើម។
Tag:
Joseph Kabila
សាធារណរដ្ឋប្រជាធិបតេយ្យកុងហ្គោ
© រក្សាសិទ្ធិដោយ thmeythmey.com