ជាតិ
សេដ្ឋកិច្ច
Emirates Airline នឹងបើកជើងហោះហើរពីឌូបៃ មកភ្នំពេញនៅដើមខែកក្កដា
× ភ្នំពេញ៖ ក្រុមហ៊ុន Emirates Airline នឹងបើកសម្ពោធជើងហោះហើររបស់ខ្លួនពីទីក្រុងឌូបៃ ប្រទេសអារ៉ាប់រួម មករាជធានីភ្នំពេញ នៅខែកក្កដាឆ្នាំនេះ។ នេះបើតាមសេចក្ដីប្រកាសព័តមានរបស់ក្រុមហ៊ុននេះ ដែលចេញផ្សាយនៅថ្ងៃទី២១ខែកុម្ភៈ ។
សេចក្ដីប្រកាសព័ត៌មានដដែលបានឲ្យដឹងថា រាជធានីភ្នំពេញ នឹងក្លាយជាទិសដៅថ្មីបំផុតដែលក្រុមហ៊ុន Emirates Airline ផ្ដល់សេវាជើងហោះហើរ ចាប់ពីខែកក្កដា តទៅ ដោយប្រើ យន្តហោះ Boeing 777-300ER មានថ្នាក់ពីរប្រភេទ។ ក្រុមហ៊ុននេះ នឹងបើកជើងហោះហើរពីទីក្រុងឌូបៃ មកទីក្រុងយ៉ាងហ្គន (ប្រទេសមីយ៉ាន់ម៉ា) និងបន្តមកទីក្រុងភ្នំពេញ។
ក្រុមហ៊ុន បានបញ្ជាក់នៅក្នុងសេចក្ដីប្រកាសព័ត៌មានថា ការផ្ដល់សេវាជើងហោះហើរ ដោយឆ្លងកាត់ទីក្រុងយ៉ាងហ្គននេះ នឹងផ្ដល់លទ្ធភាពឲ្យអ្នកដំណើរមកពីប្រទេសមីយ៉ានម៉ាមកភ្នំពេញ និងត្រឡប់ទៅវិញផងដែរ។ ហើយក្រុមហ៊ុន Emirates Airline នឹងក្លាយក្រុមហ៊ុនអ៊ែរឡាញតែមួយគត់ ដែលមានជើងហោះហើរផ្ទាល់ ភ្ជាប់ទីក្រុងទាំងពីរនេះ (ទីក្រុងយ៉ាងហ្គន និងភ្នំពេញ)។
ក្រៅពីអ្នកដំណើរ ក្រុមហ៊ុនបានសម្លឹងឱកាសដឹកជញ្ជូនទំនិញ ក្រណាត់ និងសម្លៀកបំពាក់ផងដែរ។ នេះបើតាមសេចក្ដីប្រកាសព័ត៌មានខាងលើ។
ក្រុមហ៊ុនអាកាសចរលំដាប់អន្តរជាតិមួយនេះ បានពន្យល់ពីមូលហេតុនៃការចាប់យកទីក្រុងភ្នំពេញជាទិសដៅផ្ដល់សេវារបស់ខ្លួនយ៉ាងដូច្នេះថា៖«ភ្នំពេញ គឺជារាជធានីដែលមានមនុស្សរស់នៅច្រើនជាងគេនៅកម្ពុជា ហើយជាច្រកចូលសំខាន់ទៅកាន់ប្រាសាទអង្គរ ខេត្តសៀមរាប។ សន្ទុះនៃការអភិវឌ្ឍ និងរីកចម្រើនខាងផ្នែកហេដ្ឋារចនាសម្ព័ន្ធបានប្រែក្លាយភ្នំពេញឲ្យទៅជាទិសដៅដ៏សំខាន់សំរាប់វិស័យទេសចរណ៍ និងវិស័យសេដ្ឋកិច្ច»។
ជើងហោះហើរក្រៅស្រុកលេខ EK388 នឹងធ្វើដំណើរចាកចេញពីក្រុងឌូបៃនៅម៉ោង ៩និង១៥នាទីព្រឹក និងចុះចតនៅទីក្រុងយ៉ាងហ្គនម៉ោង៥និង២៥នាទីល្ងាច។ ការហោះហើរនឹងបន្តពីក្រុងយ៉ាងហ្គននៅម៉ោង៦និង៥៥នាទីល្ងាច ហើយចុះចតទីតាំងចុងក្រោយនៅភ្នំពេញ នៅម៉ោង៩និង២៥នាទីយប់។ នេះបើតាមសេចក្ដីប្រកាសព័ត៌មានខាងលើ ដែលបញ្ជាក់ទៀតថា ជើងហោះហើរនេះ នឹងតភ្ជាប់យ៉ាងរលូនទៅនឹងជើងហោះហើរមួយចំនួនរបស់សហគមន៍អឺរ៉ុប។ សម្រាប់ការហោះហើរត្រឡប់ទៅវិញ ជើងហោះហើរលេខ EK389 នឹងចេញដំណើរពីភ្នំពេញម៉ោង១១និង១០នាទីយប់ និងទៅដល់ទីក្រុងឌូបៃនៅម៉ោង៥និង៤០នាទីព្រឹកនាថ្ងៃបន្ទាប់ ក្រោយការចុះចតយ៉ាងខ្លីមួយនៅទីក្រុងយ៉ាងហ្គន។
ដំណាលគ្នានឹងបើកជើងហោះហើរមកភ្នំពេញ ក្រុមហ៊ុន Emirates Airline ក៏នឹងបើកជើងហោះហើររបស់ខ្លួននៅទីក្រុងហាណូយ ប្រទេសវៀតណាមផងដែរ។ នេះជាការបញ្ជាក់នៅក្នុងសេចក្ដីប្រកាសព័ត៌មានរបស់ក្រុមហ៊ុននេះ៕
Tag:
Emirates
ជើងហោះហើរ
ឌូបៃ
© រក្សាសិទ្ធិដោយ thmeythmey.com