លោក Claudio Ranieri ត្រូវក្លិប Leicester City បញ្ឈប់ពីតំណែងជាអ្នកចាត់ការទូទៅហើយ ក្រោយដឹកនាំក្រុមមិនបានល្អក្នុងរយៈពេល៩ខែចុងក្រោយនេះ។ ក្លិបការពារតំណែងជើងឯកនេះ បានធ្លាក់ចេញពីពានរង្វាន់ជាច្រើន និងចុងក្រោយចាញ់ក្រុមអេស្ប៉ាញ Sevilla នៅក្របខណ្ឌ Champion League ។
Leicester City បានប្រកាសបញ្ចប់តំណែងលោក Claudio Ranieri បន្ទាប់ពីអ្នកចាត់ការសញ្ជាតិអ៊ីតាលីរូបនេះដឹកនាំក្រុមមិនបានល្អសោះ ដោយទទួលបានតែ២១ពិន្ទុប៉ុណ្ណោះសម្រាប់២៥ប្រកួតចុងក្រោយ និងឈរនៅចំណាត់ថ្នាក់លេខ១៧ នៃពានរង្វាន់កំពូលអង់គ្លេស Premier League។
អ្នកចាត់ការទូទៅវ័យ៦៥ឆ្នាំ បានជួយក្រុមកញ្ជ្រោងខៀវឲ្យឈ្នះពានកំពូល Premier League លើកដំបូងដែលជាកំណត់ត្រាដ៏អស្ចារ្យបំផុតមួយក្នុងប្រវត្តិសាស្ត្រកីឡានៅអង់គ្លេសកាលពីរដូវកាលមុន។ តែយ៉ាងណាក៏ដោយក្លិបដែលមានម្ចាស់ជាមហាសេដ្ឋីជនជាតិថៃមួយនេះនៅតែសម្រេចដកតំណែងលោកដដែល។
អនុប្រធានក្លិប Leicester City លោក Aiyawatt Srivaddhanaprabha ឲ្យដឹងថា៖«ការដកតំណែងលោក Ranieri នេះជាការសម្រេចចិត្តមួយដ៏មានការលំបាកបំផុតចាប់តាំពីយើង (ក្រុមហ៊ុន King Power) មកកាន់កាប់ទីនេះជិត៧ឆ្នាំកន្លងទៅ។ ប៉ុន្តែយើងមានកាតព្វកិច្ចដើម្បីផលប្រយោជន៍រួមរបស់ក្លិប Leicester រយៈពេលវែងទៅមុខទៀត»។
សូមបញ្ចាក់ថា ក្រោមការដឹកនាំរបស់លោក Ranieri រយៈពេកចុងក្រោយ Leicester ធ្លាក់ទម្រង់លេងយ៉ាងខ្លាំងដោយធ្លាក់ចេញពីពាន FA ក្រោយចាញ់ក្រុម Millwall និងចាញ់ក្រុម Sevilla ក្នុងទឹកដីខ្លូនឯង ២-១ នៃក្របខណ្ឌ Champions League ទៀតផង៕