ជាតិ
សេដ្ឋកិច្ច
ឆ្នាំ២០១៦ កម្ពុជាទទួលបានទេសចរអន្តរជាតិប្រមាណ ៥លាននាក់ មកទស្សនាកម្ពុជា
× ភ្នំពេញ៖ ក្នុងឆ្នាំ២០១៦ មានទេសចរអន្តរជាតិមកទស្សនាកម្ពុជាក្នុងឆ្នាំ២០១៦ មានចំនួន ៥.០១១.៧១២ នាក់ ដោយកើនឡើង៥% ធៀបនឹងឆ្នាំ២០១៥។ នេះបើតាមរបាយការណ៍ស្ថិតិទេសចរប្រចាំឆ្នាំ២០១៦ របស់ក្រសួងទេសចរណ៍។
ភ្ញៀវទេសចរអន្តរជាតិ ដែលមកទស្សនាប្រទេសកម្ពុជា នៅក្នុងឆ្នាំ២០១៦ មានចំនួន ៥.០១១.៧១២ នាក់ ដោយកើនឡើង៥% ធៀបនឹងឆ្នាំ២០១៥។ នៅក្នុងនោះ ភ្ញៀវទេសចរអន្តរជាតិ ធ្វើដំណើរតាមផ្លូវអាកាស មានចំនួន ២.៧០៤.៣៦៧នាក់ កើនឡើង ៩.២% ដោយតាមផ្លូវគោក មានចំនួន ២.១៥៣.៩៣២នាក់ និងតាមផ្លូវទឹក មានចំនួន ១៥៣.៤១៣នាក់។
ស្ថិតិភ្ញៀវទេសចរដែលបង្ហាញក្នុងរបាយការណ៍ប្រចាំឆ្នាំរបស់ក្រសួងទេសចរណ៍ ក៏បានបញ្ជាក់ពីទីផ្សារទេសចរសំខាន់ៗទាំង១០ មកកម្សាន្តនៅកម្ពុជា (ឆ្នាំ២០១៦ ធៀបនឹងឆ្នាំ២០១៦) មានភ្ញៀវទេសចរវៀតណាម ថយចុះ ២.៨%, ចិន កើនឡើង ១៩.៥%, ថៃ កើនឡើង ១៣.៨%, កូរ៉េ ថយចុះ ៩.៦%, ឡាវ ថយចុះ ៨.៩%, អាមេរិក កើនឡើង ៩.៧%, ជប៉ុន ថយចុះ ០.៩%, អង់គ្លេស កើនឡើង ៣.៤%, ម៉ាឡេស៊ី កើនឡើង ២.៣% និងបារាំង កើនឡើង ៣.១%។
ភ្ញៀវទេសចរបរទេស ដែលបានមកកម្សាន្តនៅប្រទេសកម្ពុជា គឺមកពីតំបន់អាស៊ីប៉ាស៊ីហ្វិក បានកើនឡើង ៣.៦% ក្នុងនោះមកពីតំបន់អាស៊ាន កើនឡើង ១.១%។ ចំពោះតំបន់អឺរ៉ុប កើនឡើង ៦.៩% និងតំបន់អាមេរិក កើនឡើង ១១.៩%។
ជាមួយគ្នានេះ ទេសចរអន្តរជាតិ (Internal Tourist) បានមកកម្សាន្តនៅតំបន់មួយចំនួនក្នុងប្រទេសកម្ពុជារួមមាន៖តំបន់សៀមរាបអង្គរ តំបន់ភ្នំពេញ តំបន់ឆ្នេរសមុទ្រ តំបន់អេកូទេសចរណ៍ភូមិភាគឦសាន និងតំបន់ប្រាសាទព្រះវិហារ។ តំបន់សៀមរាបអង្គរ បានទទួលទេសចរបរទេស កើនឡើង ៣.៨% និងតំបន់ភ្នំពេញ ភ្ញៀវទេសចរបរទេស កើនឡើង ៥,៩%ធៀបនឹងឆ្នាំ២០១៥។ ចំណែកឯ តំបន់ឆ្នេរសមុទ្រ មានភ្ញៀវទេសចរអន្តរជាតិ កើនឡើង ៥.៤% រួមទាំងតំបន់អេកូទេសចរណ៍ភូមិភាគឦសាន ភ្ញៀវទេសចរអន្តរជាតិ កើនឡើង ៤.៩% និងតំបន់ប្រាសាទព្រះវិហារ ភ្ញៀវទេសចរ កើនឡើង ៣៤.៧%។
គួរបញ្ជាក់ សម្រាប់ភ្ញៀវទេសចរជាតិកម្ពុជា បានចេញទៅក្រៅប្រទេស មានចំនួន ១.៤៣៤.០៣០នាក់ កើនឡើង ២០.១% ធៀបនឹងឆ្នាំ២០១៥៕
© រក្សាសិទ្ធិដោយ thmeythmey.com