ជាតិ
សេដ្ឋកិច្ច
រដ្ឋាភិបាលបង្កើតស្ថានបេសកកម្មអចិន្ត្រៃយ៍ប្រចាំ WTO ពេជ ឬទ្ធី អគ្គរាជទូតប្រចាំWTO។ រូបពីហ្វេសប៊ុកក្រសួងពាណិជ្ជកម្ម
× ភ្នំពេញ៖ រដ្ឋាភិបាលបង្កើតស្ថានបេសកកម្មអចិន្ត្រៃយ៍ថ្មីមួយប្រចាំអង្គការពាណិជ្ជកម្មពិភពលោក (WTO) ដើម្បីពង្រឹងកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម ជាមួយអង្គរការអន្តជាតិនានា និងជំរុញការអភិវឌ្ឍវិស័យពាណិជ្ជកម្មរបស់កម្ពុជា។
អនុក្រឹត្យរបស់រដ្ឋាភិបាល ដែលចុះថ្ងៃទី២១ខែកុម្ភៈ បានសម្រេចបង្កើតស្ថានបេសកកម្មអចិន្ត្រៃយ៍មួយប្រចាំ WTO ក្រុងហ្សឺណែវ ប្រទេសស្វីស។ ស្ថានបេសកកម្មអចិន្ត្រៃយ៍ ដែលមាន កញ្ចប់ថវិកាស្ថិតក្រោមក្រសួងពាណិជ្ជកម្មនេះ ត្រូវដឹកនាំដោយប្រធានមួយរូបមានឋានៈជាអគ្គរាជទូត រួមទាំងមន្ត្រីទូត និងមន្ត្រីបច្ចេកទេសសរុបចំនួន ៥រូប។ លោក ពេជ ឬទ្ធី គឺជាប្រធានស្ថានបេសកកម្មនេះ។
ស្ថានបេសកកម្មចិន្ត្រៃយ៍នេះ មានភារកិច្ចទទួលបន្ទុកការងារពាក់ព័ន្ធនឹងវិស័យសេដ្ឋកិច្ច ពាណិជ្ជកម្ម និងពង្រឹងកិច្ចសហប្រតិបត្តិការជាមួយអង្គការអន្តរជាតិនានា ពិសេសអង្គការពាណិជ្ជកម្មពិភពលោក។
អ្នកនាំពាក្យក្រសួងពាណិជ្ជកម្ម លោកស្រី សឿង សុផារី បានថ្លែងប្រាប់សារព័ត៌មានថ្មីៗថា ការបង្កើតស្ថានបេសកកម្មចិន្ត្រៃយ៍នេះឡើង គឺជាការបង្កើនចំនួនមន្ត្រី និងឋានៈមន្ត្រីរដ្ឋាភិបាល ដែលបំពេញការងារនៅ WTO ដើម្បីឆ្លើយតបនឹងទំហំការងារនាពេលបច្ចុប្បន្ន។ លោកស្រីឲ្យដឹងថា មុនបង្កើតស្ថានបេសកកម្មនេះ រដ្ឋាភិបាលមានមន្ត្រីធ្វើជាតំណាងនៅ WTO តែពីរនាក់យ៉ាងច្រើន ដែលមិនអាចរ៉ាប់រងការងារដែលកាន់តែមានវិសាលភាពជាងមុន។
បើតាមលោកស្រី សឿង សុផារី ស្ថានបេសកកម្មអចិន្ត្រៃយ៍នេះ នឹងបំពេញតួនាទីយ៉ាងសំខាន់លើកិច្ចការសម្របសម្រួលប្រទេសអភិវឌ្ឍន៍តិចតួច (LDC) ដែលកម្ពុជាទទួលធ្វើជាប្រធានសម្របសម្រួលក្រុមប្រទេស LDC ក្រោមក្របខណ្ឌអង្គការពាណិជ្ជកម្មពិភពលោក សម្រាប់រយៈពេលចាប់ពីខែកុម្ភៈឆ្នាំ២០១៧ ដល់ខែកុម្ភៈឆ្នាំ២០១៨ ៕
Tag:
ស្ថានបេសកកម្មអចិន្ត្រៃយ៍ប្រចាំ WTO
រដ្ឋាភិបាល
© រក្សាសិទ្ធិដោយ thmeythmey.com