ប្រទេសអាស៊ាន វៀតណាម ហ្វីលីពីន ថៃ... អាចនឹងទទួលបានជំនួយសម្ភារយោធាពីជប៉ុន

អន្តរជាតិ

ប្រទេសអាស៊ាន វៀតណាម ហ្វីលីពីន ថៃ... អាចនឹងទទួលបានជំនួយសម្ភារយោធាពីជប៉ុន

27, Feb 2017 , 3:31 pm

រូបភាព

ដោយ: ថ្មីៗ

រដ្ឋាភិបាលក្រុងតូក្យូ ដែលជាសមាជិកមួយនៃអាស៊ានបូកបី កំពុងតែព្យាយាមបញ្ចេញតួនាទី និងឥទ្ធិពលខ្លួន ជាពិសេសនោះលើកិច្ចសហប្រតិបត្តិការយោធាជាមួយនឹងបណ្តាសមាជិកនៃសមាគមប្រជាជាតិអាស៊ីអាគ្នេយ៍។ អ្វីជាសញ្ញាគួរកត់សម្គាល់នោះ ក្រុងតូក្យូ មានផែនការក្នុងផ្តល់សម្ភារយោធាឲ្យប្រទេសមួយចំនួននៃតំបន់នេះ ដែលនេះ ត្រូវបានមើលឃើញថា ជាជំហានថ្មីមួយរបស់ដៃគូអាស៊ាន ខណៈពេលដែលចិន ក៏កំពុងតែប្រជែងតួនាទីនិងកិច្ចសហប្រតិបត្តិការជាមួយនឹងបណ្តាប្រទេសទាំងនេះផងដែរនោះ។

រដ្ឋាភិបាលជប៉ុន គ្រោងអនុម័តច្បាប់ថ្មីមួយដើម្បីផ្តល់លទ្ធភាពឲ្យជប៉ុនអាចឧបត្ថម្ភសម្ភារយោធាមួយទឹកនៃកងកម្លាំងការពារជាតិជើងគោករបស់ជប៉ុនទៅកាន់ដៃគូរបរទេសបាន។ ផែនការនៃច្បាប់ថ្មីនេះ ក៏មានទិសដៅមួយដើម្បីពង្រឹងឥទ្ធិពល និងកិច្ចសហប្រតិបត្តិការសន្តិសុខ និងយោធារបស់ជប៉ុនជាមួយនឹងបណ្តាសមាជិកអាស៊ាន។ នេះបើយោងតាមការចុះផ្សាយរបស់សារព័ត៌មានជប៉ុន Nikkei នៅថ្ងៃទី១៩ កុម្ភៈកន្លងទៅ។

តាមប្រភពព័ត៌មានដដែល រដ្ឋាភិបាលជប៉ុន ដែលកំពុងតែដឹកនាំដោយលោកនាយករដ្ឋមន្ត្រី ស៊ីនហ្សូ អាបេ ក៏ចង់ជជែកជាមួយនឹងប្រទេសអាស៊ាន ដែលជប៉ុន ចង់ផ្តល់ឲ្យសម្ភារយោធាទាំងនោះឲ្យផងដែរ។ ប្រទេសទាំងនោះ រួមមាន ហ្វីលីពីន វៀតណាម ថៃ ម៉ាឡេស៊ី និងឥណ្ឌូណេស៊ី។ ប្រទេសអាស៊ានទាំងដប់ មានដូចជា ព្រុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម។

អ្វីដែលគួរឲ្យកត់សម្គាល់នោះ តាមគម្រោងនៃច្បាប់ថ្មីនេះ រដ្ឋាភិបាលជប៉ុន ក៏នឹងពិចារណា ក្នុងការបញ្ជូនកងទ័ពស្វ័យការពារទៅកាន់ប្រទេសដែលខ្លួននឹងផ្តល់សម្ភារយោធាទាំងនោះផងដែរ។ ហើយការណ៍ដែលធ្វើបែបនេះ ដើម្បី ឲ្យសមភាគីអាស៊ាន អាចប្រើប្រាស់សម្ភារទាំងនោះ ប្រកបដោយប្រសិទ្ធភាព។

ជប៉ុន ប្រឹងជួយជ្រោមជ្រែងសន្តិសុខប្រទេសអាស៊ានទប់ទល់ឥទ្ធិពលចិន?

តាមពិតទៅ ការព្យាយាមខិតជិតអាស៊ានរបស់ជប៉ុន មិនមែនទើបតែធ្វើឡើងឡើយ ពោលគឺ ជប៉ុន ដែលជាដៃគូអាស៊ាន បូកបីដូចជាចិន និងកូរ៉េខាងត្បូងនោះ កន្លងមក ក៏បានផ្តល់ទាំងនាវាល្បាត និងកម្ចីដល់រដ្ឋអាស៊ានមួយចំនួនដើម្បីពង្រឹងវិស័យការពារជាតិ ជាពិសេសការការពារសន្តិសុខដែនសមុទ្រ។ ប្រទេសដែលជប៉ុន ផ្តល់នាវាល្បាតមួយទឹកកន្លងមក មានហ្វីលីពីន និងវៀតណាម ដែលប្រទេសទាំងនេះ សុទ្ធសឹងតែជាភាគីជម្លោះជាមួយនឹងចិន ដូច ជប៉ុនផងដែរ។

ប្រទេសអាស៊ានចំនួនបួនរួមមានព្រុយណេ ម៉ាឡេស៊ី ហ្វីលីពីន និងវៀតណាម បាននិងកំពុងតែមានជម្លោះអធិបតេយ្យជាមួយនឹងចិននៅក្នុងជម្លោះ«សមុទ្រចិនខាងត្បូង»។ រីឯជប៉ុន ក៏បានមានជម្លោះអធិបតេយ្យជាមួយនឹងចិនផងដែរ ដែលជម្លោះនោះ នៅក្នុង«សមុទ្រចិនខាងកើត»។ កន្លងមក ក្រៅពីការផ្តល់ជំនួយសហប្រតិបត្តិការយោធា និងការពារជាតិដល់ប្រទេសអាស៊ានមួយចំនួននោះ ជប៉ុន ក៏តែងតែចេញមុខរិះគន់ និងថ្កោលទោសចិន រឿងយោធូបនីយកម្មនៅក្នុងសមុទ្រចិនខាងត្បូង។ ជប៉ុន ចាត់ទុកសកម្មភាពចិននៅក្នុងតំបន់ជម្លោះនោះថា ជាការគំរាមកំហែងសន្តិសុខនៅក្នុងតំបន់ ខណៈ ចិនតបតថា ប្រទេសខាងក្រៅ មិនត្រូវលូកលាន់ និងគោរពកិច្ចប្រឹងប្រែងប្រទេសដែលមានជម្លោះដោយផ្ទាល់។

សូមជម្រាបផងដែរថា ក្រោយចាញ់សង្គ្រាមលោកលើកទីពីរមក ជប៉ុន បានអនុវត្តគោលនយោបាយក្នុងការមិនបញ្ជូនទ័ពចេញក្រៅប្រទេស និងនាំចេញសព្វាវុធក្រៅប្រទេសដែលពាក់ព័ន្ធនឹងជម្លោះ។ តែចាប់ពីឆ្នាំ២០១៤មក ការរឹតត្បិតនេះ ត្រូវបានបន្ធូរបន្ថយឡើងវិញ ដែលក្នុងនោះ រដ្ឋាភិបាលអាចមានទាំងលទ្ធភាពក្នុងបញ្ជូនទ័ពចេញក្រៅប្រទេសទៀតផង៕