ជាតិ
សង្គមជាតិ
អ្នកនាំពាក្យ បំភ្លឺលើករណីស្ពានអាកាសថ្មើរជើងនៅផ្លូវជាតិលេខ៤
× ភ្នំពេញ៖ ក្រោយពីមានការបង្ហោះក្នុងបណ្ដាញសង្គមហ្វេសប៊ុក រិះគន់លើករណីស្ពានអាកាសថ្មើរជើងនៅផ្លូវជាតិលេខ៤នោះ រដ្ឋបាលរាជធានីភ្នំពេញ ក៏បានបញ្ជាក់មូលហេតុជូនប្រជាពលរដ្ឋថា ការសាងសង់ស្ពាននេះ ក្រោមហេតុផលបច្ចេកទេស និងហេដ្ឋារចនាសម្ព័ន្ធនៅក្នុងតំបន់នោះ ។
លោក ម៉េត មាសភក្ដី អ្នកនាំពាក្យសាលារាជធានីភ្នំពេញ ចាត់ទុកការរិះគន់របស់ប្រជាពលរដ្ឋ លើករណីស្ពានអាកាសថ្មើរជើងនៅផ្លូវជាតិលេខ៤នេះ គឺគ្រាន់តែជាជ្រុងមួយបែបបញ្ចេញមតិតាមអារម្មណ៍ពួកគេប៉ុណ្ណោះ។ ថ្លែងប្រាប់សារព័ត៌មានថ្មីៗ លោក មាសភក្តី អះអាងថា មុននឹងចាប់ផ្ដើមការសាងសងស្ពាននេះ មន្ត្រីជំនាញបានសិក្សាគម្រោងច្បាស់លាស់ហើយ ដោយឈរលើហេតុផលបច្ចេកទេស និងផលប៉ះពាល់ជាចម្បង នៅជំវិញទីតាំងនោះ។
អ្នកនាំពាក្យរូបនេះ បានបកស្រាយដូច្នេះថា ៖«យើងមិនមែនគិតតែការសាងសង់ស្ពានតែមួយមុខទេ គឺត្រូវគិតហេដ្ឋារចនាសម្ព័ន្ធក្នុងតំបន់ រួមទាំងបញ្ហាចរាចរ ចំណតរថយន្ត បណ្ដាញលូ និងបញ្ហាសុវត្ថិភាពថ្មើរជើងជាដើម។ បើសិនជាជណ្ដើរស្ពានថ្មើរជើងចុះ ឬឡើងចំពីមុខផ្ទះកៀកមាត់ទ្វារ ម្ចាស់ផ្ទះនឹងជំទាស់ ឬមិនសប្បាយចិត្ត ដោយសារជណ្ដើរបិទមុខផ្ទះរបស់ពលរដ្ឋ។ មូលហេតុនេះ ទើបធ្វើជណ្ដើរគម្លាតចូលក្នុងបន្ដិច ដើម្បីកុំឲ្យប៉ះពាល់ដល់ប្រជាពលរដ្ឋ»។
បន្ថែមពីលើនេះ លោក ម៉េត មាសភក្ដី បន្តពន្យល់ថា ផ្លូវក្រៅសងខាងនៃផ្នែកស្ពាន សម្រាប់តែពលរដ្ឋបើកបរយានយន្តចេញនិងចូលផ្ទះនៅតាមសងខាងផ្លូវប៉ុណ្ណោះ ។ ប៉ុន្តែបើសិនជាពលរដ្ឋត្រូវធ្វើដំណើរទៅផ្លូវឆ្ងាយនោះ ពួកគេត្រូវបញ្ជាយានជំនិះបត់ចូលទៅផ្លូវគន្លងកណ្ដាលមាន៦ខ្សែ ដែលជាផ្លូវល្បឿនលឿនគ្មានឧបសគ្គឡើយ។
ចំណែកជួរផ្លូវរត់ត្រង់នឹងគន្លងជណ្ដើរស្របផ្លូវនេះ ក៏ត្រូវបានបង្កើតជាចំណតរថយន្តជាច្រើន រួមទាំងរៀបចំសួនច្បារផងដែរ។ បើតាមលោក មាសភក្ដី មុននឹងសាងសង់ស្ពានអាកាសថ្មើរជើងនេះ អាជ្ញាធរក៏បានរៀបចំប្រឡាយបង្ហូរទឹកនិងបណ្ដាញលូ ដើម្បីដោះស្រាយបញ្ហាជំនន់ទឹកភ្លៀង ដោយមិនឲ្យប៉ះពាល់ដល់បណ្ដាញផ្លូវទឹក និងបំពង់ទឹកស្អាតក្រោមដីផងដែរ។
សម្រាប់លោក មាសភក្ដី ការរិះគន់របស់ប្រជាពលរដ្ឋលើបញ្ហាសង់ស្ពានថ្មើរជើងខាងលើនេះ ក៏ជាការរួមចំណែកយ៉ាងសំខាន់ដែរ ក្នុងការក្រើនរំឮកនិងជួយចូលរួមគិតជាមួយអាជ្ញាធររៀបចំហេដ្ឋារចនាសម្ព័ន្ធឲ្យបានប្រសើរ។ ប៉ុន្តែលោក ក៏អំពាវនាវឲ្យប្រជាពលរដ្ឋមានការយោគយល់វិញដែរ ក្នុងការប្រើប្រាស់ស្ពានថ្មើរជើងនេះ ដើម្បីចូលរួមកាត់បន្ថយផលប៉ះពាល់ទាំងអស់គ្នា៕
Tag:
ស្ពានអាកាសថ្មើរជើង
សាលារាជធានីភ្នំពេញ
© រក្សាសិទ្ធិដោយ thmeythmey.com