សហជីពថាវិវាទការងារជាច្រើនករណី ស្ទះត្រឹមក្រសួងការងារព្រោះនីតិវិធីស្មុគស្មាញ

ជាតិ

សង្គមជាតិ

សេដ្ឋកិច្ច

សហជីពថាវិវាទការងារជាច្រើនករណី ស្ទះត្រឹមក្រសួងការងារព្រោះនីតិវិធីស្មុគស្មាញ

28, Feb 2017 , 8:19 pm

រូបភាព

ដោយ: ថ្មីៗ

បណ្តឹងស្តីពីវិវាទការងារ ដែលក្រុមប្រឹក្សាអាជ្ញាកណ្តាលទទួលបានក្នុងឆ្នាំ២០១៧នេះ ថយចុះបើធៀបនឹងតួលេខឆ្នាំកន្លងមក។ នេះបើតាមអ្នកស្រី ឈីវ ភិរម្យ ដែលបន្តអះអាងថា ការថយចុះនេះ គឺដោយសារតែការអនុម័តច្បាប់សហជីព។ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ បានបង្ហាញកង្វល់ចំពោះការថយចុះនេះ ដោយបញ្ជាក់ថាតួលេខថយចុះមិនមែនមានន័យថាគ្មានបញ្ហានៅក្នុងចំណោមកម្មករ និយោជកនោះទេ។ ។ លោក ប៉ាវ ស៊ីណា បញ្ជាក់ថាបញ្ហាមានច្រើន គ្រាន់តែករណីខ្លះកម្មករមិនលទ្ធភាពប្តឹងទៅក្រសួងការងារ និងករណីខ្លះកំពុងស្ថិតនៅក្នុងដៃក្រសួងការងារ។

លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ បានអះអាងថា វិវាទការងារជាច្រើនករណី កំពុងកកស្ទះ នៅត្រឹមក្របខណ្ឌក្រសួងការងារ បណ្តុះបណ្តាលវិជ្ជាជីវៈ។ ថ្លែងក្នុងសន្និសីទទំនាក់ទំនងវិជ្ជាជីវៈ ស្តីពីការធ្វើឲ្យប្រសើរឡើងប្រព័ន្ធដោះស្រាយវិវាទការងារ សុខកុមនីយកម្មក្នុងទំនាក់ទំនងវិជ្ជាជីវៈ នៅថ្ងៃទី២៧ ខែកុម្ភៈនេះ លោក ប៉ាវ ស៊ីណា បញ្ជាក់បន្តថាជាទូទៅសំណុំរឿងដែលចរចារវាងភាគីកម្មករ និងនិយោជក មិនត្រូវរ៉ូវគ្នា គឺត្រូវបញ្ជូនទៅកាន់ក្រសួងការងារដើម្បីដោះស្រាយបន្ត។

បើតាមប្រធានសម្ព័ន្ធសហជីពចលនាកម្មកររូបនេះ ប្រសិនបើមន្ត្រីរបស់ក្រសួងការងារ ចរចាដោះស្រាយមិនដាច់ស្រេចទៀតនោះ គឺត្រូវស្នើទៅរដ្ឋមន្ត្រីក្រសួងការងារដើម្បីបញ្ជូនរឿងទៅក្រុមប្រឹក្សាអាជ្ញាកណ្តាល។ ពីព្រោះនីតិវិធីនៅថ្នាក់ក្រសួងនេះមានភាពស្មុគស្មាញរឿងនេះ មិនបានបញ្ជូនទៅភ្លាមៗទេ។ លោក ប៉ាវ ស៊ីណា បញ្ជាក់បន្តដូច្នេះថា៖«ហេតុអ្វីបានជាសំណុំរឿងបញ្ជូនទៅក្រុមប្រឹក្សាអាជ្ញាកណ្តាលថយចុះ? រឿងត្រូវតែបញ្ជូនហើយ ប៉ុន្តែរាល់ថ្ងៃយើងមានគណៈកម្មការដោះស្រាយបាតុកម្ម កូដកម្ម អ៊ីចឹងរឿងហ្នឹងហាក់ដូចជារុញទៅ រុញមកៗ នៅតែក្នុងក្របខណ្ឌក្រសួងហ្នឹង អត់បានបញ្ជូនទៅក្រុមប្រឹក្សាអាជ្ញាកណ្តាលទេ។ អ្វីដែលយើងចង់បាន គឺការសម្រេចក្តីដោយក្រុមប្រឹក្សាអាជ្ញាកណ្តាល»។

ក្នុងឆ្នាំ២០១៥ ជាឆ្នាំដែលក្រុមប្រឹក្សាអាជ្ញារកណ្តាលដោះស្រាយពាក្យបណ្តឹងបានចំនួនច្រើនជាងគេ គឺរហូតដល់៣៦៥ករណី និងនៅឆ្នាំ២០១៦ ការដោះស្រាយពាក្យបណ្តឹងស្តីពីវិវាទការងារនេះ ថយចុះមកនៅជាង៣០០ករណី ខណៈឆ្នាំ២០១៧នេះ បណ្តឹងស្តីពីវិវាទការងារបានថយចុះ។ នេះបើតាម អ្នកស្រី ឈីវ ភិរម្យ ប្រធានក្រុមប្រឹក្សាភិបាលនៃមូលនិធិក្រុមប្រឹក្សាអាជ្ញាកណ្តាល ដែលបញ្ជាក់ពីមូលហេតុថា ដោយសារច្បាប់សហជីព ដែលទើបត្រូវបានអនុម័ត។ អ្នកស្រី ឈីវ ភិរម្យ បញ្ជាក់ដូច្នេះ៖«ការធ្លាក់ចុះនេះ ត្រូវបាននៅឆ្នាំ២០១៧ ដោយសារតែការផ្លាសប្តូរច្បាប់។ ការផ្លាស់ប្តូរច្បាប់ គឺយើងមានច្បាប់ស្តីពីសហជីព។ អ៊ីចឹងបានធ្វើឲ្យការនាំរឿងមកក្រុមប្រឹក្សាអាជ្ញាកណ្តាលត្រូវបានកាត់បន្ថយដែរ»។

ទាក់ទងនឹងច្បាប់សហជីពនេះ លោក ម៉ម វណ្ណៈ រដ្ឋលេខាធិការក្រសួងការងារ បណ្តុះបណ្តាលវិជ្ជាជីវៈ បានថ្លែងការពារថាច្បាប់នេះបង្កើតឡើងក្នុងបំណងការពារសិទ្ធិ និងផលប្រយោជន៍ស្របច្បាប់របស់កម្មក និយោជិត។ ច្បាប់នេះក៏ធានានូវសិទ្ធិសេរីភាពនៃអង្គការវិជ្ជាវិជៈរបស់កម្មករនិយោជិត និងនិយោជក ជំរុញឲ្យមានសុខដុមរមនានៃទំនាក់ទំនងវិជ្ជាជីវៈ រួមចំណែកបង្កើតការងារសមរម្យ និងបង្កើនផលិតភាពដើម្បីអភិវឌ្ឍប្រទេសជាតិ និងលើកកម្ពស់ជីវភាពរបស់កម្មករ និយោជិត។ នេះបើតាមលោក ម៉ម វណ្ណៈ។

គិតត្រឹមឆ្នាំ២០១៦ ក្រុមប្រឹក្សាអាជ្ញាកណ្តាលបានទទួលសំណុំរឿងវិវាទចំនួន ២,៦៥០ករណី ដែលពាក់ព័ន្ធដោយផ្ទាល់ជាមួយកម្មករជិត ១លាននាក់។ ក្នុងចំណោមសំណុំរឿងវិវាទដែលបានដោះស្រាយ មាន អត្រាជោគជ័យចំនួន៧៥ភាគរយ។ ក្រុមប្រឹក្សាអាជ្ញាកណ្តាលក៏បានចេញសេចក្តីបញ្ជាឲ្យបញ្ឈប់កូដកម្មជាបណ្តោះអាសន្ន ដើម្បីដោះស្រាយវិវាទដោយសន្និវិធី ដោយមានអត្រាជោគជ័យចំនួន៦៩ភាគរយ ដែលជាអត្រាខ្ពស់គួរឲ្យកត់សម្គាល់។

ទោះជាយ៉ាងនេះក្តី លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ អំពាវនាវឲ្យក្រសួងការងារពន្លឿនដំណើរការរៀបចំសេចក្តីព្រាងច្បាប់ស្តីពីប្រាក់ឈ្នួល សេចក្តីព្រាងច្បាប់ស្តីពីនីតិវិធីជម្រះក្តីវិវាទការងារឲ្យបានឆាប់តាមដែលអាចធ្វើបាន។ ក្រៅពីពន្លឿនបញ្ចប់សេចក្តីព្រាងច្បាប់នេះ លោក ប៉ាវ ស៊ីណា ក៏លើកឡើងដែរថា ក្រសួងក៏ត្រូវពន្យឿននីតិវិធីដោះស្រាយ និងធ្វើយ៉ាងណាកុំមានភាពស្មុគស្មាញពេក នៅពេលច្បាប់នេះត្រូវបានអនុម័ត ដើម្បីធានាប្រយោជន៍រួមរបស់កម្មករ និយោជក៕