ជាតិ
សង្គមជាតិ
ចៅក្រមស៊ើបសួរមិនទាន់ឆ្លើយតបនឹងមេធាវីថា ដោះលែងលោក គឹម សុខ ឬមិនដោះលែង
× ភ្នំពេញ៖ មេធាវី មិនទាន់ទទួលបានការឆ្លើយតបពីសំណាក់ចៅក្រមស៊ើបសួរនៃសាលាដំបូងរាជធានីភ្នំពេញ នៅឡើយទេ ថាគួរដោះលែងឬមិនដោះលែង លោក គឺម សុខ ឲ្យនៅក្រៅឃុំ។ លោក គឹម សុខ អ្នកវិភាគនយោបាយ ដែលត្រូវបានប្តឹងដោយសម្តេច ហ៊ុន សែន បានឃុំខ្លួនក្នុងពន្ធនាគារប្រហែលជាកន្លះខែមកហើយ។
រហូតមកដល់ពេលនេះ មានរយៈពេលមួយសប្តាហ៍ហើយ ដែលលោកមេធាវី ជូង ជូងី បានដាក់លិខិតទៅកាន់ចៅក្រមស៊ើបសួរនៃសាលាដំបូងរាជធានីភ្នំពេញ ដើម្បីសុំឲ្យដោះលែងលោក គឹម សុខ អ្នកវិភាគនយោបាយ ដែលកំពុងជាប់ពន្ធនាគារ ដោយសារតែបណ្តឹងរបស់សម្តេច ហ៊ុន សែន នាយករដ្ឋមន្ត្រីកម្ពុជា។ ប៉ុន្តែ ចៅក្រមស៊ើបសួរ មិនទាន់ឆ្លើយតបនឹងលោក ជូង ជួងី ថាដោះលែងលោក គឹម សុខ ឬយ៉ាងណានោះទេ។
លោក ជូង ជូងី បានប្រាប់សារព័ត៌មានថ្មីៗថា ក្រោយទទួបាលលិខិតពីមេធាវី ដែលសុំឲ្យកូនក្តីនៅក្រៅឃុំរួចហើយ ចៅក្រមស៊ើបសួរ មានរយៈពេលប្រាំថ្ងៃ ដើម្បីសម្រេចថា ដោះលែង ឬមួយក៏បន្តឃុំខ្លួន។ លោក បន្តថា ការព្រងើយកន្តើយរបស់ចៅក្រមស៊ើបសួរបែបនេះ គឺបណ្តាលឲ្យប៉ះពាល់ដល់សិទ្ធិកូនក្តីរបស់លោក។
លោកមេធាវីរូបនេះ បានបញ្ជាក់ដូច្នេះថា៖«ការមិនឆ្លើយតបអ៊ីចឹង បញ្ជាក់ថាចៅក្រមស៊ើបសួរ បំពេញការងាររបស់ខ្លួនមិនបានល្អ។ ហើយយើងអាចមានសិទ្ធិប្តឹងទៅសភាស៊ើបសួរនៃសាលាឧទ្ធរណ៍ ដើម្បីដោះស្រាយរឿងនេះ»។
លោក គឹម សុខ ដែលជាអ្នកវិភាគនយោបាយ ត្រូវបានចៅក្រមស៊ើបសួរនៃសាលាដំបូងរាជធានីភ្នំពេញ បញ្ជូនទៅឃុំនៅពន្ធនាគារព្រៃសបណ្តោះអាសន្ន កាលពីថ្ងៃទី១៧ ខែកុម្ភៈ ឆ្នាំ២០១៧ ក្រោមបទចោទ «បរិហារកេរ្តិ៍ជាសាធារណៈ និងញុះញង់ឲ្យប្រព្រឹត្តបទឧក្រិដ្ឋជាអាទិ៍»។ ការឃុំខ្លួនលោក គឹម សុខ គឺធ្វើឡើងបន្ទាប់ពីសម្តេច ហ៊ុន សែន ពឹងពាក់មេធាវី ឲ្យដាក់បណ្តឹងនៅសាលាដំបូងរាជធានីភ្នំពេញ។
លោក គី តិច ដែលជាមេធាវីរបស់សម្តេច ហ៊ុន សែន ធ្លាប់បញ្ជាក់ថា ការដាក់បណ្តឹងទៅកាន់តុលាការ គឺដោយសារតែលោក គឹម សុខ ចោទគណបក្សប្រជាជនកម្ពុជា ថានៅពីក្រោយខ្នងនៃអំពើឃាតកម្មលើលោក កែម ឡី។ ក្នុងបណ្តឹងនេះ សម្តេច ហ៊ុន សែន សុំទារសំណងជំងឺចិត្តពីលោក គឹម សុខ រហូតដល់ទៅ កន្លះលានដុល្លារ ឯណោះ។
លោក គឹម សុខ នៅជាប់បណ្តឹងរបស់សម្តេច ហ៊ុន សែន មួយផ្សេងទៀត។ ការរងបណ្តឹងលើកទីពីរនេះ គឺដោយសារតែលោក គឹម សុខ និយាយថា ប្រព័ន្ធមួយ ដែលស្ថិតនៅក្រោមការគ្រប់គ្រងរបស់រដ្ឋាភិបាលបច្ចុប្បន្ន មានការសម្លាប់មនុស្ស ហើយរកមុខឃាតកមិនឃើញ។ ក្នុងបណ្តឹងនេះ សម្តេច ហ៊ុន សែន សុំទារសំណងជំងឺចិត្តពីលោក គឹម សុខ តែ ២៥០០ដុល្លារ ប៉ុណ្ណោះ៕
Tag:
ជូង ជូងី
គឹម សុខ
ហ៊ុន សែន
សុំឲ្យដោះលែង
© រក្សាសិទ្ធិដោយ thmeythmey.com