ជាតិ
សង្គមជាតិ
សម្តេច ហ៊ុន សែន ហាមអ្នកសិល្បៈលួចចម្លងស្នាដៃបរទេស
×
ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានហាមសិល្បករសិល្បការិនីខ្មែរទាំងអស់លួចចម្លងស្នាដៃសិល្ប៍របស់បរទេស ដោយសម្តេចបានជំរុញពួកគេត្រូវតែព្យាយាមរិះគិតបង្កើតស្នាដៃថ្មី ដែលបង្ហាញពីអត្តសញ្ញាណខ្មែរដល់អ្នកទស្សនាជាតិ និងអន្តរជាតិ ដើម្បីលើកកម្ពស់អត្តសញ្ញាណខ្មែរ។
ថ្លែងក្នុងទិវាវប្បធម៌ជាតិលើកទី១៩ នៅថ្ងៃទី៣ ខែមីនានេះ សម្តេច ហ៊ុន សែន បានក្រើនរម្លឹកអ្នកសិល្ប៍ខ្មែរ ត្រូវជៀសវាងការលួចចម្លងពីបរទេសទាំងស្រុង ដើម្បីបម្រើផលប្រយោជន៍ពួកគេ។ ត្រង់ចំណុចនេះ សម្តេចបានពន្យល់ពីផលប៉ះពាល់នៃការលួចចម្លងស្នាដៃសិល្ប៍បរទេសថា វាមិនត្រឹមនាំឲ្យអាប់ឱនកេរ្តិ៍ឈ្មោះខ្មែរនោះទេ ពួកគេថែមទាំងប្រឈមនឹងច្បាប់កម្មសិទ្ធិបញ្ញាទៀតផង ប្រសិនបើម្ចាស់ស្នាដៃដើមប្តឹងពួកគេ។
បន្ថែមលើសពីនេះ សម្តេចបានបន្តក្រើនរម្លឹកបញ្ជាក់ទៀតថា ខ្មែរជាពូជអ្នកកសាង និងអ្នកច្នៃប្រឌិតបង្កើតថ្មីដែលមានរចនាប័ទ្មថ្មីរបស់ខ្មែរ ហេតុនេះពួកគេត្រូវតែបន្តបណ្តុះពូជនេះឲ្យកាន់តែរីកចម្រើនឡើង ស្របពេលសិល្ប៍កំពុងវិវត្តន៍ក្នុងសម័យសកលភាវូបនីយ៍កម្ម បច្ចុប្បន្ននេះ។
«យើងត្រូវមានអ្វីដែលបញ្ជាក់អត្តសញ្ញាណខ្មែរមួយ នៅក្នុងក្រុមរាំសិល្បករសិល្បការិនីដែលចេញទៅសម្តែង នៅតាមបណ្តាស្ថានីយ៍ទូរទស្សន៍នានា ឬតាមបណ្តាខេត្ត ឬក៏តាមកន្លែងនានា»។ សម្តេច បានលើកករណីក្រុមរាំប្រាប់ក្រុមសិល្បករសិល្បការិនីដែលមានវត្តមានក្នុងពិធីនាសាលសន្និសីទចតុមុខ៕
Tag:
ហ៊ុន សែន
វប្បធម៌
សិល្ប៍
© រក្សាសិទ្ធិដោយ thmeythmey.com