ចិនបន្ថយកំណើនថវិកាយោធាប្រចាំឆ្នាំ ខណៈអាមេរិកប្រឹងបង្កើនកាន់តែច្រើន

អន្តរជាតិ

នយោបាយអន្តរជាតិ

ចិនបន្ថយកំណើនថវិកាយោធាប្រចាំឆ្នាំ ខណៈអាមេរិកប្រឹងបង្កើនកាន់តែច្រើន

04, Mar 2017 , 8:39 pm

រូបភាព

ដោយ: តន ចាន់រិទ្ធារ៉ា

រដ្ឋាភិបាលចិន បានប្រកាសនៅថ្ងៃទី៤ ខែមីនានេះថា វិស័យយោធានឹងបង្កើនការចំណាយប្រចាំឆ្នាំនៅត្រឹមកម្រិត៧ ភាគរយ ធៀបនឹងឆ្នាំចាស់ដែលមានកម្រិត៧.៦ភាគរយ។ ការបន្ថយកំណើនថវិកាចំណាយសម្រាប់យោធាប្រចាំឆ្នាំ ធ្វើឡើងចំពេលដែលរដ្ឋបាលអាមេរិកថ្មីរបស់ប្រធានាធិបតី ដូណាល់ ត្រាំ បានប្រកាសបង្កើនការចំណាយយោធាប្រចាំឆ្នាំ ដើម្បីពង្រឹងឥទ្ធិពលអាមេរិកឡើងវិញដូចជាការកសាងនាវាដឹកយន្តហោះថ្មី និងទិញយន្តហោះបន្ថែមជាដើម។

បើទោះជាមានសម្ពាធច្រើនឲ្យបង្កើនការចំណាយសម្រាប់យោធាក្ដី រដ្ឋាភិបាលចិន បានបន្តទម្លាក់កំណើនទំហំទឹកប្រាក់ចំណាយសម្រាប់យោធា។ ក្រុងប៉េកាំង បានសម្រេចបង្កើនទំហំទឹកប្រាក់សម្រាប់យោធាតែ៧ ភាគរយប៉ុណ្ណោះ ដែលជាចំនួនទាបបំផុតចាប់តាំងពីឆ្នាំ២០១០ មកនោះ។ កាលពីឆ្នាំមុន ថវិកាសម្រាប់យោធាចិនមានកំណើន៧.៦ភាគរយ ដែលជាឆ្នាំទី១ នៃការថយចុះកំណើនចំណាយយោធា ដែលធ្លាប់មានយ៉ាងតិចណាស់១០ ភាគរយឬខ្ពស់ជាងនេះទៅទៀត។

មុនឆ្នាំ២០១០ ក្រុងប៉េកាំង បានបង្កើនថវិកាចំណាយប្រចាំឆ្នាំសម្រាប់វិស័យការពារជាតិក្នុងទំហំធំ ដើម្បីពង្រឹងអានុភាពយោធារបស់ខ្លួន ប៉ុន្តែបែរជាបន្ថយកំណើននារយៈពេលចុងក្រោយ។ ជួនគ្នានេះ រដ្ឋបាលថ្មីអាមេរិក ក៏ចាប់ផ្ដើមបង្កើនចំណាយយោធាកាន់តែច្រើន ដោយលោក ដូណាល់ ត្រាំ ប្រកាសក្ដែងៗថា លោកនឹងធ្វើឲ្យអាមេរិកក្លាយជាមហាអំណាចខ្លាំងក្លាជាងគេ។ លោក ក៏ប្រឹងបង្កើនថវិកាការពារជាតិប្រចាំឆ្នាំ២០១៨ ឲ្យដល់១០ ភាគរយ។

អ្វីជាការកត់សម្គាល់នោះ ការកាត់បន្ថយកំណើននេះ ក៏ធ្វើឡើងស្របពេលដែលការប្រឈមមុខជាមួយអាមេរិកតានតឹងខ្លាំង ជាពិសេសសកម្មភាពយោធានៅសមុទ្រចិនខាងត្បូង និងបញ្ហាកោះតៃវ៉ាន់តែម្ដង។ យោងតាមស្ថានភាពនេះ ចិន គួរតែបង្កើនការចំណាយយោធារបស់ខ្លួន ដើម្បីឆ្លើយតបសកម្មភាពអាមេរិក។ ការបង្កើនចំណាយឲ្យ២ ខ្ទង់ជារឿងចាំបាច់ បើចិនចង់ប្រជែងជាមួយអាមេរិក ដែលមានទំហំចំណាយលើវិស័យការពារជាតិលើសចិនស្រាប់ហើយនោះ។

អ្នកនាំពាក្យសភាប្រជាជនចិន Fu Ying ដែលជាអ្នកប្រកាសទំហំទឹកប្រាក់នេះ និយាយថា ការចំណាយសម្រាប់យោធា នឹងមានទំហំស្មើ១.៣ភាគរយនៃផលិតផលក្នុងស្រុកសរុប (DGP) ។ បើតាមទីភ្នាក់ងារព័ត៌មាន Reuters ចំនួនពិតប្រាកដនៃការចំណាយរបស់យោធាចិន នឹងត្រូវប្រកាសឲ្យដឹងនៅកិច្ចប្រជុំសភាប្រជាជនចិន ដែលនឹងបើកនៅថ្ងៃទី៥ ខែមិនា ខាងមុខ។ បណ្ដាមេដឹកនាំចិនកំពូលៗ នឹងចូលរួមកិច្ចប្រជុំប្រចាំឆ្នាំនេះ។

លើសពីនេះ ការកាត់បន្ថយចំនួនទ័ពដល់ទៅ៣សែននាក់ ដែលលោកប្រធានាធិបតី ស៊ី ជិនភីង ក៏ទំនងជាមូលហេតុពីក្រោយនៃការបន្ថយចំណាយនេះដែរ បើទោះជាចិននៅតែចិញ្ចឹមចិត្តពង្រឹងអានុភាពយោធារបស់ខ្លួនក្ដី។ មួយវិញទៀត រដ្ឋាភិបាលចិន ក៏ទំនងជារង់ចាំមើលស្ថានការណ៍ថ្មីអំឡុងពេលរដ្ឋការលោក ត្រាំ ដែលនៅមិនទាន់មានជំហរច្បាស់លាស់លើនោយបាយអន្តរជាតិនៅឡើយ ខណៈលោកបានបង្កើនចំណាយផ្នែកយោធាច្រើនលើសលប់ទៅហើយ៕