ជាតិ
សិល្បះ
អ្នកនាំពាក្យក្រសួងវប្បធម៌៖លោកតា យិត សារិន ជាធនធានមនុស្សផ្នែកល្ខោនខោលដ៏កម្ររបស់កម្ពុជា
លោកតា យិត សារិន នៅខាងមុខយុវជន។ រូបថតពីហ្វេសប៊ុក Royal du Cambodge
×![]()
គ្រូល្ខោនខោល លោកព្រឹទ្ធាចារ្យ យិត សារិន ហៅតា ស្វា ស បានទទួលមរណភាពកាលពីយប់ថ្ងៃទី ៤ ខែមីនា ក្នុងជន្មាយុ ៩១ ឆ្នាំ ដោយរោគាពាធ។ សពលោកតា តម្កល់ធ្វើបុណ្យនៅផ្ទះរបស់លោក នៅសង្កាត់ភ្នំពេញថ្មី ខណ្ឌសែនសុខ។
លោក ថៃ នរៈសត្យា អ្នកនាំពាក្យក្រសួងវប្បធម៌ និងវិចិត្រសិល្បៈ បានថ្លែងថា ក្រសួងវប្បធម៌ សោកស្តាយយ៉ាងខ្លាំង និងសូមចូលរួមរំលែកមរណទុក្ខ ចំពោះការអនិច្ចកម្មនៃលោកតា យិត សារិន។ លោកថា ការបាត់បង់លោកព្រឹទ្ធាចារ្យ ដែលជាគ្រូល្ខោនខោលរូបនេះ គឺជាការបាត់បង់ធនធានមនុស្សផ្នែកសិល្បៈល្ខោនខោលដ៏កម្រនៅកម្ពុជា។
យ៉ាងណា អ្នកនាំពាក្យខាងលើ នៅមិនទាន់អាចបញ្ជាក់ថា តើក្រសួងវប្បធម៌ នឹងឧបត្ថម្ភ ឬជួយរៀបចំបុណ្យសពរបស់លោកតា យិត សារិន ជាមួយនឹងគ្រួសារនោះទេ ព្រោះពេលនេះ ជាថ្ងៃឈប់សម្រាក ហើយម្យ៉ាងលោកស្រីរដ្ឋមន្រ្តី ភឿង សកុណា កំពុងបំពេញបេសកកម្ម នៅតាមខេត្ត។ « តែនៅពេលថ្ងៃចន្ទ ចូលធ្វើការ ខ្ញុំជឿថា យើងនឹងជែកគ្នាថា តើរៀបចំយ៉ាងណាចំពោះសពគាត់។ យើងសោកស្តាយណាស់ចំពោះមរណភាពនៃលោកតា។ ខ្ញុំ និងលោកជំទាវរដ្ឋមន្រ្តី ព្រមទាំងប្អូនយុវជនទើបតែធ្វើបុណ្យរម្លឹកគុណគាត់រួចប៉ុន្មានខែ ឥឡូវគាត់ស្លាប់បាត់»។
Tag:
យិត សារិន
ល្ខោនខោល
ថៃ នរៈសត្យា
© រក្សាសិទ្ធិដោយ thmeythmey.com
