រដ្ឋទទួលចំណូលពន្ធដារ និងអាករជាង ៣០០លានដុល្លារ នៅដើមឆ្នាំ២០១៧នេះ

ជាតិ

សង្គមជាតិ

រដ្ឋទទួលចំណូលពន្ធដារ និងអាករជាង ៣០០លានដុល្លារ នៅដើមឆ្នាំ២០១៧នេះ

10, Mar 2017 , 9:24 pm

រូបភាព

លោក គង់ វិបុល (រូបកណ្តាល)។ រូបថតហ្វេសប៊ុកអគ្គនាយកដ្ឋានពន្ធដារ

ដោយ:

ភ្នំពេញ៖ អគ្គនាយកដ្ឋានពន្ធដារ បានប្រមូលចំណូលពន្ធ និងអាករគ្រប់ប្រភេទចំនួន ១ ៤០៦ ៣១៣,១២ លានរៀល ស្មើនឹងប្រមាណ ៣៥១,៥៨លានដុល្លារអាមេរិក ឬស្មើនឹងអត្រា ២០,៤៩ភាគរយ នៃគោលដៅកំណត់ដោយច្បាប់ជាង ១ពាន់លានដុល្លារអាមេរិក។

អគ្គនាយកដ្ឋានពន្ធដារ នៃក្រសួងសេដ្ឋកិច្ចនិងហិរញ្ញវត្ថុ បានប្រកាសព័ត៌មានឲ្យដឹងថា រដ្ឋបានទទួលចំណូលពន្ធដារ និងអារកគ្រប់ប្រភេទចំនួន ៤២១ ០៨៦,៣១លានរៀល ស្មើនឹងប្រមាណ ១០៥,២៧លានដុល្លារអាមេរិក ក្នុងខែកុម្ភៈ ឆ្នាំ២០១៧នេះ។ ហើយថា វាកើនឡើងចំនួន ៣៨ ១៨៥,៧២ លានរៀល ស្មើនឹងថវិកាប្រមាណ ៩,៥៤លានដុល្លារ ឬស្មើនឹងអត្រាកំណើន ៩,៩៧ភាគរយ ធៀបនឹងខែកុម្ភៈ ឆ្នាំ២០១៦ កន្លងទៅ។

អគ្គនាយកដ្ឋានពន្ធដារបានបន្តទៀតថា ការប្រមូលចំណូលពន្ធដារ និងអាករគ្រប់ប្រភេទបានកើនឡើងស្ទើរគ្រប់ប្រភេទពន្ធ ក្នុងនោះ រួមមាន ពន្ធលើប្រាក់ចំណូលកើនឡើង១៦ភាគរយ ពន្ធលើប្រាក់បៀវត្សកើនឡើង ៥៣,១ភាគរយ និងអាករពិសេសកើនឡើងចំនួន ៤៧,៩ភាគរយ។ ប៉ុន្តែការប្រមូលអាករលើតម្លៃ បន្ថែមបានថយចុះចំនួន ២,២ភាគរយ។

តាមសេចក្តីប្រកាសព័ត៌មានស្តីពី កិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែកុម្ភៈ ឆ្នាំ២០១៧ នេះ ប្រតិភូរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារលោក គង់ វិបុល នៅតែ ជំរុញមន្ត្រីពន្ធដារឲ្យបន្តអនុវត្តការងារប្រមូលពន្ធ ស្របតាមយុទ្ធសាស្ត្រកៀរគរចំណូលរយៈពេលមធ្យម និងកម្មវិធីកែទម្រង់ហិរញ្ញវត្ថុសាធារណៈរបស់រដ្ឋាភិបាលប្រកបដោយប្រសិទ្ធភាព។

លោកបានថ្លែងទៅកាន់មន្ត្រីក្នុងកិច្ចប្រជុំនៅថ្ងៃទី១០ ខែមីនានេះ ត្រូវបន្តពង្រឹងយន្តការប្រមូលពន្ធមួយចំនួន រួមមាន ការបន្តពង្រឹងការចុះបញ្ជីពន្ធដារ និងការផ្តល់សេវាជូនអ្នកជាប់ពន្ធ, ពង្រឹងការដាក់លិខិតប្រកាសសារពើពន្ធរបស់អ្នកជាប់ពន្ធ,ពង្រឹងការធ្វើសវនកម្មក្នុងសហគ្រាស និងបន្តពង្រឹងអភិបាលកិច្ចល្អ ជាដើម ដើម្បីធានាការប្រមូលចំណូលពន្ធតាមផែនការកំណត់៕