ពីនេះ ពីនោះ
ហេតុអ្វីខ្យល់ជាអ្នកបង្កើតពិភពលោក?
× ភ្នំពេញ៖ ទស្សនវិទូជនជាតិក្រិច លោក អាណាស៊ីម៉ែន(Anaxim‘ene) បានអះអាងថា ល្អងរូបធាតុដំបូង គឺកើតចេញពីខ្យល់។ កើតនៅឆ្នាំ៥៨៥ នឹងស្លាប់នៅឆ្នាំ៥២៥ មុនគ្រឹស្តសករាជ លោក អាណាស៊ីម៉ែន យល់ថា ខ្យល់ មានតួនាទីសំខាន់បំផុតក្នុងជីវិតធម្មជាតិ និងជីវិតមនុស្ស។
លោកអះអាងបន្ថែមថា ខ្យល់ដកដង្ហើមជាប្រភពនៃជីវិតមនុស្ស។ លោកថា ខ្យល់អាកាសគ្របដណ្តប់ពិភពលោកទាំងមូល ដោយបរិយាយបញ្ជាក់ថា ខ្យល់អាកាសបង្កើតវត្ថុជាច្រើនសណ្ឋានតាមវិធី២យ៉ាង គឺ៖ កម្រិតខាប់ និងកម្រិតរបោះ។ កម្រិតខាប់ និងកម្រិតរបោះនៃខ្យល់បានកំណត់ភាវៈនៃវត្ថុ។ ខ្យល់ខាប់បង្កើតភាពត្រជាក់ ឯខ្យល់របោះបង្កើតកំដៅ។
ឧទាហរណ៍៖ បើគេដកដង្ហើមខ្លាំង ដោយបង្រួមបបូរមាត់ គេដឹងថា មានខ្យល់ត្រជាក់ចូលទៅក្នុង ពីព្រោះខ្យល់នោះមានកម្រិតខាប់។ ប៉ុន្តែបើគេដកដង្ហើមដោយបើកបបូរមាត់ឲ្យធំ គេដឹងថាមានខ្យល់ក្តៅឧណ្ហៗ ពីព្រោះខ្យល់នោះមានកម្រិតរបោះ៕
ប្រភព៖ «ប្រវត្តិទស្សនវិជ្ជាបស្ចឹមប្រទេស» រៀបរៀងដោយ បណ្ឌិត ឆយ យីហ៊ាង
© រក្សាសិទ្ធិដោយ thmeythmey.com