លោក ប្រាក់ សុខុន លើកទឹកចិត្តយុវជនឲ្យចេះស្រាវជ្រាវតាមប្រព័ន្ធបច្ចេកវិជ្ជា

ជាតិ

សង្គមជាតិ

លោក ប្រាក់ សុខុន លើកទឹកចិត្តយុវជនឲ្យចេះស្រាវជ្រាវតាមប្រព័ន្ធបច្ចេកវិជ្ជា

11, Mar 2017 , 9:00 pm

រូបភាព

ដោយ:

ភ្នំពេញ៖ រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិលោក ប្រាក់ សុខុន បានប្រាប់យុវជន ត្រូវចេះស្រាវជ្រាវរកព័ត៌មាន ឯកសារ និងកម្មសិក្សានានា លើប្រព័ន្ធអ៊ីនធឺណេតតាមរយៈឧបករណ៍បច្ចេកវិជ្ជាទំនើបដូចជា Smart phone កុំព្យូទ័រ ជាដើម។

លោក ប្រាក់ សុខុន បានប្រាប់យុវជនថា ពួកគេអាចសិក្សាស្រាវជ្រាវនៅគ្រប់ទីន្លែង និងគ្រប់ពេលវេលា នាសម័យសាកលភាវូបនីយ៍កម្មប្រព័ន្ធបច្ចេកវិទ្យា បច្ចុប្បន្ន។ លោកទេសរដ្ឋមន្ត្រីបានចាត់ទុកសិស្សនិស្សិតដែលចេះស្រាវជ្រាវ គឺជាអ្នកព្យាយាមស្វែងរកឱកាសទទួលចំណេះដឹងច្រើន ជាងសិស្សនិស្សិតដែលពុំសូវ ចេះស្រាវជ្រាវតាមប្រព័ន្ធបច្ចេកវិជ្ជាអ៊ឺនធឺណេត។

លោកបានឆ្លៀតថ្លែងក្នុងទិវាកិច្ចប្រជុំអាស៊ី-អឺរ៉ុប (ASEM)នៅកម្ពុជា ក្រោមប្រធានបទកិច្ចប្រជុំអាស៊ី អឺរ៉ុប ក្នុងទស្សវត្សរ៍ទី៣ ដូច្នេះថា៖«ក្មួយៗសិស្សនិស្សិត ដែលមាន Smart phone ទំនើបៗ ត្រូវទាញប្រយោជន៍ពីវា ត្រូវចេះស្រាវជ្រាវតាមប្រព័ន្ធបច្ចេកវិជ្ជានេះ ត្រូវចេះស្រាវជ្រាវរកទិន្នន័យ (Data) និងNetworkingនានា លើគេហទំព័រ ASEM និងគេហទំព័រច្រើនទៀត»។

បន្ថែមលើសពីនេះ លោកទេសរដ្ឋមន្ត្រីក៏មានបំណងលើកទឹកចិត្តយុវជនឲ្យស្វែងយល់ពីកិច្ចការបរទេស ផងដែរ។ លោកបានថ្លែងទៅនិស្សិតជាង ៧០០នាក់ ដែលមានវត្តមានក្នុងពិធីនៅរសៀលថ្ងៃទី៦ ខែមីនានេះ ក្នុងសាសាតិចណូថា ពួកគេត្រូវយល់ពីកិច្ចសហប្រតិបត្តិការនយោបាយអន្តរជាតិ សេដ្ឋកិច្ចពាណិជ្ជកម្ម សន្តិសុខ បរិស្ថាន និងវប្បធម៌ផង ស្របពេលពិភពលោកកំពុងសមាហរណកម្មលើវិស័យទាំងនេះ។ «ការតភ្ជាប់ហេដ្ឋារចនាសម្ព័ន្ធជារឿងសំខាន់ តែយើងត្រូវភ្ជាប់ទំនាក់ទំនងពលរដ្ឋ និងពលរដ្ឋ យុវជន និងយុជនថែមទៀត ដើម្បឲ្យមាននិរន្តរភាព»។ លោក ប្រាក់ សុខុន បន្ថែម។

គួរបញ្ជាក់ កិច្ចប្រជុំអាស៊ី-អឺរ៉ុប (The Asia Europe Meeting) គឺជាវេទិកាដែលបង្កើត ក្នុងគោលដៅបង្កើនទំនាក់ទំនងរវាងបណ្តាប្រទេសក្នុងតំបន់អាស៊ី និងអឺរ៉ុប ក្នុងឆ្នាំ១៩៩៦ នៅទីក្រុងបាងកក ប្រទេសថៃ។ បច្ចុប្បន្ន ASEM មានដៃគូសហប្រតិបត្តិការ ៥៣ ក្នុងនោះ មាន ៥១ប្រទេស និង ២ សមាគមប្រចាំតំបន់៕