ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
បទយកការណ៍ / បទសម្ភាសន៍
លោក សូរ ម៉ុង ចាត់ទុករូបសំណាកសិលាចាំប្តី ដូចឆ្នាំងបាយ
18, Mar 2017 ,
10:39 pm
រូបភាព
×
ដោយ:
កែប៖ ក្នុងវ័យជាង៦០ប្លាយឆ្នាំទៅហើយ លោក សូរ ម៉ុង នៅតែបន្តអាជីពថតរូបនៅឆ្នេរកែបត្រង់រូបសំណាកសិលាចាំប្តី។ អ្នកថតរូបចំណាស់ម្នាក់នេះ អរគុណរូបសំណាកសិលាចាំប្តី ពីព្រោះ លោកតា មានអតិថិជនច្រើន ក៏ព្រោះតែរូបសំណាកដ៏ល្បីល្បាញមួយនេះ។
ដ្បិតរូបសំណាកសិលាចាំប្តី គ្រាន់តែរូបចម្លាក់ពិតមែន ប៉ុន្តែថ្មមួយដុំនេះ បានជួយជីវភាពលោក សូរ ម៉ុង ជាង៣០ឆ្នាំមកហើយ។ រូបសំណាកសិលាចាំប្តីដែលគេសាងសង់លយចូលសមុទ្របន្តិច នៅឆ្នេរកែប បានផ្តល់ការងារជាច្រើន ដល់អ្នកលក់ដូរអាហារ អ្នកលក់វត្ថុអនុស្សាវរីយ៍ និងអ្នកថតរូបអាជីពនៅទីនោះផង។ លោក សូរ ម៉ុង ដែលជាអ្នកថតរូបម្នាក់ ក្នុងចំណោមអ្នកថតរូបជាច្រើននាក់ទៀត បានប្រាប់សារព័ត៌មានថ្មីៗថា រូបសំណាកសិលាចាំប្តីនេះ គឺជាស្រីស្អាតដែលមនុស្សចាស់ក្មេងចង់ថតរូបជាមួយ នៅពេលដែលពួកគេបានមកលេងកម្សាន្តនៅទីក្រុងកែប។
សូមស្ដាប់សំឡេង៖
បុរសចំណាស់នេះ បញ្ជាក់ថា៖«ភ្ញៀវភាគច្រើនមកពីតំបន់ឆ្ងាយ ព្រោះអ្នកមកពីឆ្ងាយគេចង់បានរូបថត ជាមួយស្រីស្អាតនេះ (រូបសិលាចាំប្តី)។ ខ្ញុំអរគុណស្រីស្អាតនេះខ្លាំងណាស់ ព្រោះខ្ញុំមានចំណូលសព្វថ្ងៃ ក៏ព្រោះរូបសំណាកនេះដែរ»។
តាមពិតទៅ លោក សូរ ម៉ុង មិនមែនជាអ្នកស្រុកនៅខេត្តកែបនេះទេ ប៉ុន្តែគាត់ជាអ្នករស់នៅភ្នំពេញ។ ភ្នំពេញដែលលោក សូរ ម៉ុង អះអាងថា ពិបាកប្រកួតប្រជែង បានរុញច្រាន ឲ្យគាត់ត្រូវបង្ខំចិត្ត មកជួលផ្ទះគេស្នាក់នៅខេត្តកែប ដើម្បីថែអាជីព ដែលលោកស្រឡាញ់នេះ។ គិតមកដល់ពេលនេះ លោកប្រកបរបរថតរូប៣៧ឆ្នាំហើយ។
និយាយជាមួយខ្ញុំបានបន្តិច លោកតាក៏ងើបទៅទទួលអតិថិជនរបស់ខ្លួន ដែលភាគច្រើន គឺជាមនុស្សវ័យចំណាស់ និងមកពីតំបន់ឆ្ងាយ។ ខុសពីមិនទាន់មានការរីកចម្រើនផ្នែកទូរស័ព្ទដៃទំនើប កាលនោះ លោក អាចរកចំណូលបានក្រែល រហូតស្ទើរតែគ្មានពេលហូបបាយក៏មានដែរ។ ប៉ុន្តែបច្ចុប្បន្ននេះ របរមួយនេះ លែងកាក់កបទៀតហើយ។ លោក បញ្ជាក់ដូច្នេះ៖«កាលមុន ទោះថតរូបហើយ ៣ថ្ងៃក្រោយបានយើងផ្ញើរូបឲ្យគេ ក៏នៅមានភ្ញៀវច្រើនណាស់។ តែឥឡូវទោះថតរូបភ្លាម បានរូបភ្លាមមែន នៅតែមិនសូវមានគេមកថតទេ»។
រូបថតមួយសន្លឹកមានតម្លៃ ៣ ពាន់រៀល។ ក្នុងមួយថ្ងៃ លោក សូរ ម៉ុង អាចថតបាន១០សន្លឹក ជួនកាលទទួលបានត្រឹមតែ៥សន្លឹកក៏មានដែរ។ ប៉ុន្តែសម្រាប់ថ្ងៃចុងសប្តាហ៍ លោក ក៏ហាក់មមារញឹកដែរ ពីព្រោះ ខណៈគាត់កំពុងសម្ភាសជាមួយសារព័ត៌មានថ្មីៗ មានអតិថិជនជាបន្តបន្ទាប់ បានមកហៅគាត់ឲ្យថតរូបឲ្យ។ មិនមែនម្នាក់ថតមួយសន្លឹកឯណា លោក បានណែនាំពីប្លង់ស្អាតៗដទៃទៀត ដើម្បីទទួលបានរូបច្រើនសន្លឹក។ យ៉ាងណាលោកតាមិនបានបង្ខំអតិថិជនឡើយ។
ក្នុងចំណោមប្លង់ទេសភាពនៃឆ្នេរកែប អ្វីដែលទាក់ទាញមនុស្សម្នាឲ្យថតរូបច្រើនជាងគេ គឺរូបសំណាកសិលាចាំប្តី។ រូបសំណាកដែលមានជាប់ទាក់ទង នឹងរឿងនិទានដ៏មានប្រិយភាពមួយនេះ បានរកចំណូលជាប្រចាំដល់លោក សូរ ម៉ុង។
យ៉ាងណាក៏ដោយ ជាងថត រូបនេះ ហាក់មិនពេញចិត្តនឹងរូបសំណាកសិលាចាំប្តី ដែលមានពាក់ក្រណាត់ស្បង់ជីពរ ដែលលោកតាចាត់ទុកថា បានធ្វើរូបសំណាកនេះ បាត់បង់សោភ័ណភាព។ លោកនិយាយដូច្នេះថា៖«កាលពីដំបូង រូបស្រីស្អាតនេះ គេបញ្ឈរស្លៀកសំលៀកបំពាក់ដូចបរទេសអ៊ីចឹង តែក្រោយមក អ្នកដឹកនាំខេត្ត គេឲ្យធ្វើអង្គុយវិញ និងមិនមានស្លៀកពាក់ទេ។ ក្រោយមក ចាស់ៗ និងព្រះសង្ឃដែលមកដល់ទីនេះ ចេះតែយកស្បង់គ្រប»។
យ៉ាងណាក៏ដោយ រូបសំណាកដែលមានក្រណាត់គ្របសារពាង្គកាយនេះ ត្រូវបានអ្នកដឹកនាំខេត្តកែប តែងតែមករើចេញវិញ ពីព្រោះ ពួកគេយល់ថា ការយកក្រណាត់មកបិទបាំងរាងកាយរូបចម្លាក់ថ្មនេះ វានាំឲ្យបាត់បង់សោភ័ណភាព។ នេះជាការរៀបរាប់ របស់លោក សូរ ម៉ុង ដែលបន្ថែមថា លោក ក៏យល់ស្រប ជាមួយថ្នាក់ដឹកនាំខេត្តកែបដែរ ពីព្រោះកន្លងមកអតិថិជនរបស់ខ្លួន តែងតែរអ៊ូថា រូបថតរបស់ពួកគេមិនសូវស្អាត ក៏ព្រោះតែកំណាត់ ដែលរុំខ្លួនរូបចម្លាក់នេះ។
សិលាចាំប្តី ដែលបានចិញ្ចឹមជាងថតចំណាស់រូបនេះជាច្រើនឆ្នាំបានប្រែប្រួលរូបភាពជាច្រើនដងក៏ពិតមែន ប៉ុន្តែលោក សូរ ម៉ុង មិនដែលបានគិតថា លោកនឹងផ្លាស់ប្តូរអាជីពនេះឡើយ។ វៀរលែងតែ ឈប់មានរូបសំណាកស្ត្រីថ្មពណ៌សនេះទៀត៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
សូរ ម៉ុង
អ្នកថតរូប
© រក្សាសិទ្ធិដោយ thmeythmey.com
អត្ថបទពេញនិយម
ថ្ងៃ១៧ មេសា កាល៤៩ឆ្នាំមុន កងទ័ពខ្មែរក្រហមដណ្តើមបានទីក្រុងភ្នំពេញ
1 ថ្ងៃ
តើពាក្យ«បច្ច័យ»មានន័យច្បាស់លាស់ដូចម្តេច?
2 ថ្ងៃ
សមត្ថកិច្ចខេត្តកែប ធ្វើកិច្ចសន្យាអាជីវករ២រូប ឱ្យឈប់ទារលុយពីភ្ញៀវទេសចរដែលអង្គុយតាមឆ្នេរ
6 ថ្ងៃ
«បុរាណ»និង«បូរាណ» មានអត្ថន័យដូចគ្នា
6 ថ្ងៃ
«ភេរវកម្ម» មិនមែន «ភេវរកកម្ម» ឬ «ភារវកម្ម» ឡើយ
4 ថ្ងៃ
អត្ថបទពេញនិយមបន្ថែម