ជាតិ
អាជ្ញាធរគ្មានគម្រោងដកទូ ATM ឡើយ តែចង់ឲ្យមានការយកចិត្តទុកដាក់លើសុវត្ថិភាពពលរដ្ឋ
× ភ្នំពេញ៖ បន្ទាប់ពីមានការចុះផ្សាយថា អាជ្ញាធរគ្រោងលុបបំបាត់ទូATM នៅតាមផ្លូវសាធារណៈនោះ នៅពេលនេះសាលារាជធានីភ្នំពេញ បានចេញមកច្រានចោលព័ត៌មាននេះ ។ សាលារាជធានីភ្នំពេញ បានបដិសេធថា អាជ្ញាធរមិនមានគម្រោងលុបបំបាត់ការដាក់ទូ ATM នៅតាមផ្លូវសាធារណៈឡើយ។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានបកស្រាយតប នឹងការរិះគន់របស់សាធារណជនវិញថា ការណ៍ដែលលោក ប៉ា សុជាតិវង្ស បានលើកឡើងទាក់ទងបញ្ហាទូ ATM នៅតាមផ្លូវសាធារណៈនោះ គឺមិនមែនក្នុងគោលដៅលុបបំបាត់ទូ ATM ទេ តែវាជាការជំរុញឲ្យគ្រឹះស្ថានមីក្រូហិរញ្ញវត្ថុទាំងអស់ ពង្រឹងការយកចិត្តទុកដាក់ លើសុវត្ថិភាពជូនប្រជាពលរដ្ឋ ដែលប្រើប្រាស់សេវារបស់ស្ថាប័នហិរញ្ញវត្ថុទាំងនេះ។
លោក ម៉េត មាសភក្តី បានបញ្ជាក់ដូច្នេះថា៖«កាលពីម្សិលមិញ លោកអភិបាលរាជធានីភ្នំពេញ គាត់បានលើកឡើង បន្ទាប់ពីមានការផ្ទុះទូ ATMមួយ កាលពីថ្ងៃទី១៨ មីនា ដែលខាងធនាគារ និងមីក្រូហិរញ្ញវត្ថុ មិនមានការថែរក្សាការពារ និងមិនមានការយកចិត្តទុកដាក់ លើសុវត្ថិភាពជូនពលរដ្ឋ ឲ្យត្រូវចេះជ្រើសរើសទីតាំងសមរម្យ ,ដាក់កងកម្លាំងសន្តិសុខ ឬដាក់បុគ្គលិកខ្លួននៅតាមទូATMទាំងយប់ ទាំងថ្ងៃនោះ ដើម្បីការពារសុវត្ថិភាពជូនអតិថិជនពួកគេ។ ដូច្នេះវាមិនមែនមានន័យថា គាត់ចង់ឲ្យលុបបំបាត់ទូATM នោះទេ តែវាជាការជំរុញលើកទឹកចិត្ត ឲ្យខាងគ្រឹះស្ថានមីក្រូហិរញ្ញវត្ថុយកចិត្តទុកដាក់លើបញ្ហានេះ»។
លោក ប៉ា សុជាតិវង្ស អភិបាលរាជធានីភ្នំពេញ បាននិយាយថា បើពុំមានអ្នកការពារសុវត្ថិភាព និងសន្តិសុខនៅជុំវិញបរិវេណទូបើកលុយ ATM នៅតាមទីសាធារណៈទេ មើលទៅគួរតែលុបបំបាត់ចោលទាំងអស់ ពីព្រោះបើនៅតែទុកទូATMនៅតាមផ្លូវសាធារណៈទៀត វានឹងនាំឲ្យមានបទល្មើសផ្សេងៗកើតឡើង។ លោក ប៉ា សុជាតិវង្ស បានលើកឡើងបែបនេះ នៅក្នុងកិច្ចប្រជុំគណៈបញ្ជាការឯកភាព រដ្ឋបាលរាជធានី ពិភាក្សាស្ដីពីវិធានការ បង្ការទប់ស្កាត់សកម្មភាពភេរវកម្ម និងពិនិត្យលើការងារអនុវត្ដ ភូមិ-សង្កាត់មានសុវត្ថិភាព កាលពីថ្ងៃទី២០ ខែមីនា ដែលត្រូវបានសារព័ត៌មានដើមអំពិល យកមកចុះផ្សាយ ហើយត្រូវបានសាធារណមតិរិះគន់ជាបន្តបន្ទាប់ ចំពោះការលើកឡើងរបស់លោកអភិបាលរាជធានីភ្នំពេញនេះ។
គួរបញ្ជាក់ថា កាលពីថ្ងៃទី១៨ មីនា មានករណីផ្ទុះទូ ATM របស់ធនាគារកាណាឌីយ៉ា ដើម្បីយកប្រាក់ពីទូATM នៅខាងមុខមន្ទីរពេទ្យកុមារជាតិ ។ ប៉ុន្តែជនល្មើសមិនអាចយកប្រាក់ពីទូATM បានតាមបំណងខ្លួនឡើយ ដោយសារសំឡេងផ្ទុះលាន់ឮ ដល់ប្រជាពលរដ្ឋនៅក្បែរនោះ ហើយពួកគេនាំគ្នាផ្អើលឆោឡោ រាយការណ៍មកសមត្ថកិច្ច។ មកដល់ពេលនេះ សមត្ថកិច្ច បានកំណត់មុខសញ្ញាបុរសម្នាក់នោះបានហើយ ប៉ុន្តែមិនទាន់អាចស្គាល់អត្តសញ្ញាណ ដើម្បីចាប់ខ្លួននៅឡើយទេ៕
Tag:
សាលាក្រុង
ម៉េត មាសភក្តី
ប៉ា សុជាតិវង្ស
ATM
© រក្សាសិទ្ធិដោយ thmeythmey.com