កីឡាអន្តរជាតិ
អន្តរជាតិ
ក្រុមដំរីកូតឌីវ័រ តែងតាំងលោក Marc Wilmots ជាគ្រូបង្វឹកថ្មីរបស់ខ្លួន
× ក្រុមកីឡាបាល់ទាត់ជម្រើសជាតិកូតឌីវ័រ បានប្រកាសតែងតាំងអតីតគ្រូបង្វឹកក្រុមជម្រើសជាតិប៊ែលហ្ស៊ិកលោក Marc Wilmots ដើម្បីជំនួសតំណែងគ្រូចាស់លោក Michel Dussuyer។ ក្រុមដែលមានរហស្សនាមថា «ដំរី» មួយនេះ បានបញ្ជាក់ថា លោក Wilmots បានបង្ហាញខ្លួនជាផ្លូវការកាលពីថ្ងៃទី២២ ខែមីនា ឆ្នាំ២០១៧ ។
ក្រោយបញ្ចប់តំណែងគ្រូបង្វឹកសញ្ជាតិបារាំង Michel Dussuyer ហើយនោះ លោក Marc Wilmots ត្រូវបានតែងតាំងជាគ្រូបង្វឹកថ្មីរបស់ក្រុមបាល់ទាត់ជម្រើសជាតិកូតឌីវ័រវិញ បន្ទាប់ពីនៅទំនេរ ក្រោយបញ្ចប់ពីតំណែងជាអ្នកចាត់ការទូទៅក្រុមជម្រើសជាតិប៊ែលហ្ស៊ិកកាលពីខែកក្កដា ឆ្នាំ២១៦កន្លងទៅ។
គ្រូបង្វឹកសញ្ជាតិបែលហ្ស៊ិក វ័យ៤៨ឆ្នាំ ធ្លាប់ដឹកនាំបែលហ្ស៊ិកក្នុងចន្លោះពីឆ្នាំ២០១២ ដល់២០១៦ ដោយជួយឲ្យប្រទេសនេះបានឈានទៅលេងពានពិភពលោក World Cup នៅប្រទេសប្រេស៊ីលឆ្នាំ២០១៤។ Wilmots ត្រូវបានបញ្ចប់ពីតំណែងក្រោយដឹកនាំ បែលហ្ស៊ិក ចាញ់ក្រុមជម្រើសជាតិវេលស៍ ៣-១ នៃវគ្គ៨ក្រុមចុងក្រោយពានទ្វីបអឺរ៉ុប Euro2016 នៅប្រទេសបារាំង។
Wilmots បានចុះហត្ថលេខាលើកិច្ចសន្យារយៈពេលពីរឆ្នាំជាមួយកូតឌីវ័រ ហើយនឹងទទួលភារកិច្ចដឹកនាំក្រុមនៃប្រទេសនៅទ្វីបអាហ្វ្រិកមួយនេះក្នុងការប្រកួតវគ្គជម្រុះនៃពាន World Cup ឆ្នាំ២០១៨ ក្នុងប្រទេសរុស្ស៊ី និងពាន Africa Cup of Nations នៅឆ្នាំក្រោយ៕
Tag:
កូតឌីវ័រ
បែលហ្ស៊ិក
បាល់ទាត់
Marc Wilmots
© រក្សាសិទ្ធិដោយ thmeythmey.com