អត្ថបទពាណិជ្ជកម្ម
CIMB ដំណើរការសេវាទូទាត់ប្រាក់ Alipay ក្នុងប្រទេសម៉ាឡេស៊ី
× កាលពីថ្ងៃទី២២ ខែមីនាកន្លងទៅនេះ ស៊ីអាយអិមប៊ី គ្រុប (CIMB) និងក្រុមហ៊ុន Ant Financial ដែលជាក្រុមហ៊ុនមេរបស់ Alipay និងជាក្រុមហ៊ុនសេវាទូទាត់ប្រាក់ចល័ត និងអនឡាញធំបំផុតក្នុងពិភពលោក បានប្រកាសនូវកិច្ចសហការជាដៃគូ ដើម្បីដំណើរការសេវាទូទាត់ប្រាក់ Alipay ក្នុងប្រទេសម៉ាឡេស៊ី ដែលជាការទូទាត់ប្រាក់ដោយមិនចាំបាច់មានសាច់ប្រាក់ សម្រាប់ភ្ញៀវទេសចរជនជាតិចិន។ CIMB នឹងដើរតួនាទីជាធនាគារ ដែលទទួលបានសិទ្ធិ ក្នុងការសម្រួលដល់ការទូទាត់ប្រាក់ Alipay ក្នុងប្រទេសម៉ាឡេស៊ី ហើយភ្ញៀវទេសចរជនជាតិចិន អាចធ្វើប្រតិបត្តិការសេវាទូទាត់ប្រាក់របស់ពួកគេ ជារូបិយប័ណ្ណប្រាក់យ័ន ដោយមិនបារម្ភអំពីអត្រាប្តូរប្រាក់ តាមរយៈវិធីសាស្ត្រស្កេនលេខកូដងាយៗ ដែលពួកគេបានធ្វើរួចទៅហើយ នៅក្នុងប្រទេសចិន។
លោក Douglas Feagin ជាអនុប្រធានជាន់ខ្ពស់ នៃក្រុមហ៊ុន Ant Financial បានថ្លែងថា៖ «យើងពិតជារីករាយខ្លាំងណាស់ ដែលបានធ្វើការជាមួយស្ថាប័នហិរញ្ញវត្ថុឈានមុខគេមួយ ក្នុងប្រទេសម៉ាឡេស៊ី និងតំបន់អាស៊ាន ដើម្បីនាំយកភាពងាយស្រួលរបស់សេវាទូទាត់ប្រាក់ Alipay ទៅកាន់អ្នកប្រើប្រាស់របស់យើង នៅគ្រប់ពេល និងគ្រប់ទីកន្លែង ដែលពួកគេត្រូវការ។ យើងយល់ច្បាស់ថា ជាមួយនឹងបណ្តាញដ៏ធំទូលាយរបស់ខ្លួន CIMB គឺជាដៃគូសហការដ៏ឥតខ្ចោះ ក្នុងការផ្តល់សេវាទូទាត់ប្រាក់របស់យើង ទៅកាន់អ្នកទេសចរជនជាតិចិន ក្នុងតំបន់នេះ»។
លោក Tengku Dato’ Sri Zafrul Aziz ជាប្រធាននាយកប្រតិបត្តិនៃ CIMB Group បានឲ្យដឹងដែរថា៖ «ការឈានចូលរបស់ Alipay គឺជាសមិទ្ធផលគួរឲ្យកត់សម្គាល់ថ្មីមួយទៀត លើការលូតលាស់នៃសេវាទូទាត់ប្រាក់ចល័ត ក្នុងប្រទេសម៉ាឡេស៊ី។ យើងមានសេចក្តីត្រេកអរ ដែលបានធ្វើការជាមួយ Alipay ដើម្បីផ្តល់ឲ្យភ្ញៀវទេសចរជនជាតិចិន នូវបទពិសោធន៍ទូទាត់ប្រាក់ ប្រកបដោយភាពងាយស្រួល និងសុវត្ថិភាពខ្ពស់ ពេលស្ថិតក្នុងប្រទេសម៉ាឡេស៊ី ហើយយើងមានគោលដៅពង្រីកសេវាកម្មនេះ ទៅកាន់ដៃគូរបស់យើង ឲ្យបានមុនខែឧសភា ឆ្នាំ២០១៧ ដោយទទួលបានការយល់ព្រមពីធនាគារកណ្តាលរបស់ម៉ាឡេស៊ី (Bank Negara) កាលពីពេលថ្មីៗនេះរួចហើយ។ ការរីកចម្រើនឈានមុខគេរបស់ CIMB ទៅលើប្រតិបត្តិការសេវាធនាគារ គឺមិនត្រឹមតែជួយនាំយកប្រទេសម៉ាឡេស៊ី ទៅកាន់សង្គមដ៏មានសុវត្ថិភាព ដែលទូទាត់ប្រាក់ដោយមិនចាំបាច់សាច់ប្រាក់ ប៉ុណ្ណោះទេ តែថែមទាំងផ្តល់ឲ្យអតិថិជនរបស់យើង នូវសេវាធនាគារដ៏សម្បូរបែប ក្នុងតំបន់អាស៊ានផងដែរ»។
ជាមួយគ្នានេះ ពិធីចុះហត្ថលេខា លើអនុស្សរណៈយោគយល់គ្នា រវាង CIMB និងក្រុមហ៊ុន Ant Financial ត្រូវបានប្រារព្ធធ្វើឡើងយ៉ាងឱឡារឹក ដើម្បីប្រកាសនូវកិច្ចសហការគ្នាជាផ្លូវការ ក្រោមអធិបតីភាពរបស់លោក Douglas Feagin តំណាងឲ្យក្រុមហ៊ុន Ant Financial និងលោក Tengku Dato’ Sri Zafrul Aziz តំណាងឲ្យ CIMB។ ក្នុងនោះ ព្រឹត្តិការណ៍នេះត្រូវបានចូលរួមជាសក្ខីភាពពីលោក Dato' Sri Najib Razak នាយករដ្ឋមន្ត្រីរបស់ប្រទេសម៉ាឡេស៊ី / លោក Jack Ma ប្រធានប្រតិបត្តិក្រុមប្រឹក្សាភិបាល នៃ Alibaba Group / លោក Dato’ Sri Nazir Razak ប្រធានក្រុមប្រឹក្សាភិបាល នៃ CIMB Group / លោកស្រី Lucy Peng ប្រធានក្រុមប្រឹក្សាភិបាល នៃក្រុមហ៊ុន Ant Financial។
រហូតមកដល់ពេលនេះ CIMB បានសហការជាមួយនឹងក្រុមហ៊ុន Genting Malaysia Berhad / Digi Telecommunications Sdn Bhd / YTL Corporation Berhad និង Maxincome Resources Sdn Bhd ក្នុងនាមជាដៃគូពាណិជ្ជកម្ម ដែលទទួលយកសេវាទូទាត់ប្រាក់ចល័ត Alipay ក្នុងប្រទេសម៉ាឡេស៊ី។ ដៃគូរបស់ Alipay ក្នុងប្រទេសម៉ាឡេស៊ី នឹងមានឱកាសពង្រីកសេវាទូទាត់ប្រាក់របស់ពួកគេ តាមរយៈភ្ញៀវទេសចរជនជាតិចិន ដោយផ្តល់នូវបណ្តាញទូទាត់ប្រាក់ ទៅកាន់សាច់ប្រាក់ចរន្ត ឬផលិតផលប័ណ្ណឥណទានចរន្តជាដើម។
អំពីធនាគារ ស៊ីអាយអិមប៊ី ភីអិលស៊ី
ធនាគារ ស៊ីអាយអិមប៊ី ភីអិលស៊ី ជាផ្នែកមួយនៃស៊ីអាយអិមប៊ី គ្រុប ដែលបានចាប់ផ្តើមប្រតិបត្តិការ នៅថ្ងៃទី១៩ ខែវិច្ឆិការ ឆ្នាំ២០១០ ដោយបានបើកសាខាពាណិជ្ជទី១ នៅចំកណ្តាលរាជធានីភ្នំពេញ។ បច្ចុប្បន្ន ធនាគារមានសាខាចំនួន ១១កន្លែង នៅក្នុងខេត្តរាជធានីសំខាន់ៗទាំង៥ រួមមានរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកំពង់ចាម និងខេត្តបាត់ដំបង។ ជាមួយនឹងអតិថិជនសរុបប្រមាណ ១៩.០០០ នាក់ ធនាគារ ស៊ីអាយអិមប៊ី មានផ្តល់ជូនសេវាកម្ម និងផលិតផលធនាគារដ៏ទូលំទូលាយ រួមមានសេវាកម្មហិរញ្ញវត្ថុបុគ្គល សេវាកម្មធនាគារពាណិជ្ជ ព្រមទាំងសេវាកម្មសាជីវកម្ម និងប្រតិបត្តិការធនាគារផងដែរ។
ស៊ីអាយអិមប៊ី គ្រុប គឺជាស្ថាប័នហិរញ្ញវត្ថុដ៏ធំបំផុតទីពីររបស់ប្រទេសម៉ាឡេស៊ី និងជាធនាគារសាកលនាំមុខគេមួយក្នុងតំបន់អាស៊ាន។ ធនាគារនេះមានផ្តល់ជូនសេវាកម្មធនាគារពាណិជ្ជ ធនាគារវិនិយោគ ធនាគារឥស្លាម ក៏ដូចជាផលិតផល និងសេវាកម្មគ្រប់គ្រងទ្រព្យសកម្ម និងធានារ៉ាប់រង។ មានទីស្នាក់ការកណ្តាលនៅក្រុងគូឡាឡាំពួ បច្ចុប្បន្ននេះ ស៊ីអាយអិមប៊ី គ្រុប មានវត្តមាននៅប្រទេសចំនួន ៩ ក្នុងចំណោមប្រទេសទាំង១០ ក្នុងតំបន់អាស៊ាន (ប្រទេសម៉ាឡេស៊ី ឥណ្ឌូនេស៊ី សិង្ហបុរី ថៃ កម្ពុជា ប្រ៊ុយណេ វៀតណាម ភូមា និងឡាវ)។ ក្រៅពីតំបន់អាស៊ាន ស៊ីអាយអិមប៊ី គ្រុប ក៏មានវត្តមាននៅប្រទេសចិន ហុងកុង ឥណ្ឌា ស្រីលង្កា តៃវ៉ាន់ កូរ៉េ សហរដ្ឋអាមេរិក និងចក្រភពអង់គ្លេស។
ស៊ីអាយអិមប៊ី គ្រុប មានបណ្តាញសាខាធំជាងគេនៅក្នុងតំបន់អាស៊ាន ជាមួយសាខាជាង ១.០០០ កន្លែង គិតត្រឹមថ្ងៃទី៣១ ខែមិថុនា ឆ្នាំ២០១៦។ ធនាគារវិនិយោគរបស់ស៊ីអាយអិមប៊ី គ្រុប ក៏ស្ថិតក្នុងចំណោមធនាគារវិនិយោគធំជាងគេបំផុតក្នុងតំបន់អាស៊ីប៉ាស៊ីហ្វិក ដែលផ្តល់ការវិភាគទៅលើផ្សារភាគហ៊ុនរបស់ក្រុមហ៊ុនជាង ១.០០០ ក្រុមហ៊ុន នៅក្នុងតំបន់ ។
ស៊ីអាយអិមប៊ី គ្រុប ដំណើរការអាជីវកម្មតាមរយៈអង្គភាពចំបងបី គឺធនាគារ ស៊ីអាយអិមប៊ី (CIMB Bank) ធនាគារវិនិយោគ ស៊ីអាយអិមប៊ី (CIMB Investment Bank) និង ធនាគារ ស៊ីអាយអិមប៊ី ឥស្លាម (CIMB Islamic)។ ស៊ីអាយអិមប៊ី គ្រុប មានភាគហ៊ុន ៩៧,៩% នៅក្នុងធនាគារ ស៊ីអាយអិមប៊ី នៀហ្គា (Bank CIMB Niaga) នៅប្រទេសឥណ្ឌូនេស៊ី និង ៩៣,៧% នៅធនាគារ ស៊ីអាយអិមប៊ី ថៃ (CIMB Thai) នៅក្នុងប្រទេសថៃ។
ស៊ីអាយអិមប៊ី គ្រុប ត្រូវបានចុះបញ្ជីភាគហ៊ុននៅលើទីផ្សារមូលបត្រ ប៊ូរសា ម៉ាឡេស៊ី (Bursa Malaysia) តាមរយៈ ស៊ីអាយអិមប៊ី គ្រុប ហូលឌីង ប៊ឺហាដ (CIMB Group Holding Berhad)។ ស៊ីអាយអិមប៊ី គ្រុប មានមូលធនទីផ្សារ នៅលើទីផ្សារមូលបត្រ ប្រហែលជា ៣៨,១ ពាន់លាន រីងហ្គីតម៉ាឡេស៊ី គិតត្រឹមថ្ងៃទី ៣០ ខែមិថុនា ឆ្នាំ២០១៦។ ស៊ីអាយអិមប៊ី គ្រុប មានបុគ្គលិកសរុបជាង ៤០.០០០នាក់ នៅក្នុងប្រទេសចំនួន ១៦។
( អត្ថបទពាណិជ្ជកម្ម )
© រក្សាសិទ្ធិដោយ thmeythmey.com