អន្តរជាតិ
ដូណាល់ ត្រាំ នឹងងាកទៅកែទម្រង់ពន្ធ បើរំលាយមរតកសុខាភិបាលលោក អូបាម៉ា មិនបាន
× ការបោះឆ្នោតលុបចោលប្រព័ន្ធសុខាភិបាល Obamacare ត្រូវបានពន្យារកាលព្រឹកថ្ងៃព្រហស្បតិ៍ ដោយសារក្រុម ដូណាល់ ត្រាំ មិនទាន់បញ្ចុះបញ្ចូលនិងអូសទាញតំណាងរាស្ត្រក្នុងបក្សខ្លួនបានគ្រប់ចំនួនដើម្បីដំណើរការបោះឆ្នោត។ ប៉ុន្តែសេតវិមានអាមេរិកបានប្រកាសថា ការបោះឆ្នោតនឹងត្រូវធ្វើឡើងនៅថ្ងៃសុក្រ ទី២៤ មីនាវិញ។ បើសិនជាការបោះឆ្នោតដើម្បីនិរាករណ៍ច្បាប់សុខាភិបាលដែលជាមរតកលោក បារ៉ាក់ អូបាម៉ា នេះបរាជ័យ ដូណាល់ ត្រាំ នឹងរក្សាទុកប្រព័ន្ធសុខាភិបាលនេះដដែល ហើយងាកទៅកែទម្រង់ប្រព័ន្ធពន្ធវិញម្តង។
ក្រុមប្រធានាធិបតី ដូណាល់ ត្រាំ កំពុងបន្តបញ្ចុះបញ្ចូលផង និងគំរាមផង ដើម្បីអូសទាញក្រុមអ្នកសាធារណរដ្ឋដែលជំទាស់គម្រោងនិរាករណ៍បទបញ្ញត្តិសុខាភិបាល Obamacare ដែលជាមរតករបស់លោក បារ៉ាក់ អូម៉ា នោះ។ ដោយសារមិនទាន់មានសញ្ញាវិជ្ជមានកើតឡើងនៅឡើយទេ ព្រោះសមាជិកបក្សសាធារណរដ្ឋច្រើននាក់នៅបន្តជំទាស់មហិច្ឆតារបស់លោក ដូណាល់ ត្រាំ។
ដូច្នេះហើយការបោះឆ្នោត ទើបមកដល់ថ្ងៃ ព្រហស្បតិ៍ទី ២៣មីនា ការបោះឆ្នោតក្នុងសភាដើម្បីលុបចោលបទបញ្ញត្តិនេះត្រូវបានពន្យារពេលសិន។ យ៉ាងណាក៏ដោយចុះ សារព័ត៌មាន Fox News បានស្រង់សម្តីមន្ត្រីសេតវិមានថា ការបោះឆ្នោតក្នុងសភាអាចនឹងត្រូវនេះរៀបចំនៅថ្ងៃសុក្រទី ២៤ មីនា វិញ។
អ្នកនាំពាក្យសេតវិមានអាមេរិកលោក Sean Spicer បានបញ្ជាក់ច្បាស់ថា លោក ដូណាល់ ត្រាំ ចង់ឲ្យសភាបើកិច្ចប្រជុំសម្រេចលុបចោលបទបញ្ញតិសុខាភិបាលនេះនៅថ្ងៃសុក្រ។ លោកបានបញ្ជាក់ដូច្នេះថា៖«យើងសង្ឃឹមថា វាជាខួបចុងក្រោយប្រព័ន្ធសុខភិបាល Obamacare ហើយវាជាពេលដែលប្រជាជនអាមេរិកដែលរងគ្រោះដោយសារការធានារ៉ាប់រងសុខភិបាលនេះទទួលបានប្រព័ន្ធសុខភិបាលដែលប្រសើរជាងនេះ។ប្រធានាធិបតីលោកបានប្រាប់សមាជិកសភាគណបក្សសាធារណរដ្ឋហើយថាថ្ងៃសុក្រជាថ្ងៃដែលច្បាប់ផ្តើមការបោះឆ្នោត»។
ប្រភពខាងសេតវិមានក៏បានបញ្ជាក់ដែរថា ការបោះឆ្នោតនេះនឹងក្លាយជាការកំណត់ជោគវាសនានៃប្រព័ន្ធសុខភិបាលមានតម្លៃសមរម្យបង្កើតឡើងកាលពីឆ្នាំ ២០០៩ ដោយលោក បារ៉ាក់ អូបាម៉ា។ ប៉ុន្តែប្រសិនជាការបោះឆ្នោតនេះបរាជ័យដោយសាររកសំឡេងគាំទ្រមិនគ្រាប់គ្រាន់វិញ វាបានន័យថា លោក ដូណាល់ ត្រាំ បរាជ័យ ក្នុងការផ្លាស់ប្តូរប្រព័ន្ធសុខាភិបាលលោក អូបាម៉ា ហើយដាក់របស់ប្រព័ន្ធសុខាភិបាល Trumpcare ជំនួសហើយ។ តាមគម្រោង លោកនឹងត្រូវបន្តទៅកែទម្រង់ប្រព័ន្ធពន្ធវិញម្តង។
ត្រឡប់មកវិញ បច្ចុប្បន្ននេះ លោក ដូណាល់ ត្រាំ ប្រឈមមុខការប្រឆាំងពីសំណាក់ក្រុមអ្នកប្រជាធិបតេយ្យផង និងក្រុមអ្នកសាធារណរដ្ឋខ្លះផង។ ដូច្នេះហើយ ទើបបានជាមានការពន្យារពេលបោះឆ្នោតម្តងជាពីរដង ព្រោះតែមិនអាចរកសំឡេងគាំទ្រគ្រប់គ្រាន់ល្មមអាចនិរាករណ៍បទបញ្ញត្តិនេះបាន ។ ដូណាល់ ត្រាំ និងបណ្តាមេដឹកនាំបក្សសាធារណរដ្ឋដូចជា Paul Ryan បន្តបញ្ចុះបញ្ចូលសមាជិកសភាជាពិសេសក្រុមអភិរក្សដើម្បីសម្រេចគម្រោងរបស់ខ្លួន។
មានសារព័ត៌មានមួយចំនួនផ្សាយថា លោក ដូណាល់ ត្រាំ បានគំរាមបណ្តាសមាជិកសភាបក្សខ្លួនដែលហ៊ានជំទាស់គម្រោងរបស់លោកផង។ លោកគំរាមថា បើសិនមិនចង់អស់កៅអី អ្នកទាំងនោះត្រូវបោះឆ្នោតលុបបទបញ្ញត្តិសុខភិបាលរបស់លោក អូបាម៉ា។ ប៉ុន្តែគ្រប់យ៉ាងនៅជារឿងលំបាក ព្រោះការលុបចោលនេះនឹងបង្កើតរឿងស្មុគស្មាញនិងផលប៉ះពាល់ច្រើនថែមទៀតផង។
លោក បារ៉ាក់ អូបាម៉ា ដែលនៅស្ងៀមស្ងាត់អស់ពេលយូរល្មមនោះបានចេញមុខព្រមានអ្នកចង់បំផ្លាញមរតកនយោបាយរបស់លោកផងដែរ។ លោកបានចេញសេចក្តីថ្លែងការណ៍មួយផ្តាំផ្ញើទៅសមាជិកបក្សសាធារណរដ្ឋថា បើសិនជាចង់ជួយប្រជាជនដែលរងគ្រោះនិងជួយបន្ថយការចំណាយរបស់ប្រជាជនសម្រាប់ការធានារ៉ាប់រងសុខភាព គេគួរតែប្រឹងធ្វើការជាមួយក្រុមប្រជាធិបតេយ្យ។ លោកបន្តថា វាជាពេលដែលបក្សទាំងពីរធ្វើការរួមគ្នាដើម្បីកែទម្រង់ឬធ្វើឲ្យប្រព័ន្ធសុខភិបាលដែលមានស្រាប់នោះវាល្អប្រសើរជាងមុន មិនមែនគាស់រំលើងរបស់គេ ហើយដាក់របស់ខ្លួននោះឡើយ៕
Tag:
ដូណាល់ ត្រាំ
បារ៉ាក់ អូបាម៉ា
ObamaCare
TrumpCare
Paul Ryan
© រក្សាសិទ្ធិដោយ thmeythmey.com