ជាតិ
សង្គមជាតិ
លោក ប្រាក់ សុខុន និងឯកអគ្គរដ្ឋទូតចិនប្រចាំអាស៊ានបារម្ភពីបញ្ហាសន្តិសុខ
×
ភ្នំពេញ៖ រដ្ឋមន្ត្រីការបរទេស និងសហប្រតិបត្តិការអន្តរជាតិ លោក ប្រាក់ សុខុន និងឯកអគ្គរដ្ឋទូតចិនប្រចាំអាស៊ាន លោក Xu Bu បានបារម្ភពីបញ្ហាសន្តិសុខដែលបង្កឡើងដោយអំពើភេរវកម្មនៅក្នុងតំបន់។ នេះបើតាមអនុរដ្ឋលេខាធិការក្រសួងការបរទេសលោក កាន់ ផារិទ្ធ។
ថ្លែងក្រោយជំនួបសម្តែងការគួរសមរវាងលោក ប្រាក់ សុខុន និងឯកអគ្គរដ្ឋទូតចិនប្រចាំអាស៊ានដែលមានស្ថានតំណាងក្នុងប្រទេសឥណ្ឌូនេស៊ី លោក Xu Bu នៅថ្ងៃទី២៤ ខែមីនានេះ ក្នុងទីស្តីការក្រសួងការបរទេស លោក ផារិទ្ធ បានឲ្យដឹងថា ភាគីទាំងពីរបានជជែកគ្នាពាក់ព័ន្ធនឹងបញ្ហាសន្តិសុខក្នុងតំបន់។ មន្ត្រីក្រសួងការបរទេសដែលទទួលបន្ទុកកិច្ចការអាស៊ានរូបនេះ បានបន្តនាំពាក្យប្រាប់ក្រុមអ្នកសារព័ត៌មានថា ពួកគេបានចាត់ទុកបញ្ហាសន្តិសុខ និងស្ថិរភាពក្នុងតំបន់ជាបញ្ហាប្រឈមសំខាន់ដែលរដ្ឋសមាជិកអាស៊ាន និងពិភពលោកត្រូវរួមគ្នាបង្កើនការយកចិត្តទុកដាក់ថែមទៀត។
នៅពេលអ្នកសារព័ត៌មានសួរថា តើចិនបានស្នើកម្ពុជាឲ្យគាំទ្រលើកិច្ចការបរទេសរបស់ចិនអ្វីមួយដែរទេ? លោក ផារិទ្ធ ឆ្លើយតបយ៉ាងខ្លីថា នេះគ្រាន់តែជាជំនួបសម្តែងការគួរសមប៉ុណ្ណោះ។ លោកបន្តបញ្ជាក់បន្ថែមក្រោយជំនួបរវាងទ្វេភាគីរយៈពេលជាងមួយម៉ោងដូច្នេះថា៖«ភាគីទាំងពីរបានផ្លាស់ប្តូរយោបល់គ្នាពីការប្រឈមក្នុងតំបន់ និងបញ្ហាសកម្មភាពភេរវកម្ម បញ្ហាក្រុមឥស្លាមជ្រុលនិយម»។
បើតាមលោក កាន់ ផារិទ្ធ ក្រៅពីពិភាក្សាពីបញ្ហាសន្តិសុខ លោក ប្រាក់ សុខុន និងលោក Xu Bu បានរម្លឹកពីទំនាក់ទំនងការទូតដ៏ស្អិតល្មួតរវាងចិន និងកម្ពុជា តាមរយៈការផ្លាស់ប្តូរដំណើរទស្សនកិច្ចផ្លូវការរវាងប្រមុខរដ្ឋ និងប្រមុខរដ្ឋាភិបាលនៃប្រទេសទាំងពីរ កន្លងមកផងដែរ ៕
Tag:
ប្រាក់ សុខុន
Xu Bu
កម្ពុជា
ចិន
ការបរទេស
អាស៊ាន
© រក្សាសិទ្ធិដោយ thmeythmey.com