ជាតិ
ពេលចូលឆ្នាំ ក្រសួងទេសចរណ៍ជំរុញឲ្យលេងល្បែងប្រជាប្រិយ ប្រឡងចម្រៀងបុរាណ អាយ៉ៃ...
× ភ្នំពេញ៖ ដើម្បីពង្រឹងគុណភាពផលិតផលទេសចរណ៍ នាពិធីបុណ្យចូលឆ្នាំប្រពៃណីជាតិខ្មែរខាងមុខនេះ ក្រសួងទេសចរណ៍បានចេញសារាចរណែនាំ ស្ដីពីការរៀបចំពង្រឹងគុណភាពផលិតផលទេសចរណ៍។ ក្នុងសារាចរនេះ ក្រសួងបានណែនាំដល់មន្ទីរទេសចរណ៍រាជធានី-ខេត្ត សហការជាមួយសាលារាជធានី-ខេត្ត និងសមត្ថកិច្ច ដើម្បីធានាសន្តិសុខ សុវត្ថិភាព សណ្ដាប់ធ្នាប់ចរាចរណ៍។ នេះបើតាមការចុះផ្សាយរបស់ក្រសួងទេសចរណ៍។
ក្នុងពិធីបុណ្យចូលឆ្នាំថ្មីប្រពៃណីជាតិខ្មែរ នាថ្ងៃទី១៤-១៦ មេសាខាងមុខនេះ ក្រសួងទេសចរណ៍ បានចេញសារាចរណែនាំ ៧ចំណុច ស្ដីពីការរៀបចំពង្រឹងគុណភាពផលិតផលទេសចរណ៍។ សារាចរនេះ ណែនាំដល់មន្ទីរទេសចរណ៍រាជធានី-ខេត្ត ត្រូវសហការជាមួយសាលារាជធានី-ខេត្ត និងសមត្ថកិច្ចគ្រប់លំដាប់ថ្នាក់ ក្នុងការធានាសន្តិសុខ សុវត្ថិភាព សណ្ដាប់ធ្នាប់ចរាចរណ៍ ជូនភ្ញៀវទេសចរណ៍។
បើតាមសារាចរនេះ មន្ទីរទេសចរណ៍រាជធានី-ខេត្ត ត្រូវសហការជាមួយមន្ទីរវប្បធម៌ មន្ទីរអប់រំ ដោយបំផុសចលនាឲ្យមានការប្រឡងចម្រៀងបុរាណ សម័យ កំណាព្យ អាយ៉ៃ ចាប៉ីនៅរាជធានី-ខេត្ត។ ជាពិសេស ត្រូវរៀបចំការលេងល្បែងប្រជាប្រិយគ្រប់ប្រភេទនៅតាមរមណីយដ្ឋាន ដូចជា បោះអង្គាញ់ ចោលឈូង ទាញព្រ័ត្រ លាក់កន្សែង។ល។ ដោយឡែក ត្រូវជួយសម្រួលឲ្យមានការសម្ដែងរបាំត្រុដិនៅតាមសណ្ឋាគារ ផ្ទះសំណាក់ ភោជនីយដ្ឋាន និងកន្លែងកម្សាន្តផ្សេងៗ។
ជាមួយគ្នានេះ មន្ទីរទេសចរណ៍រាជធានី-ខេត្ត ត្រូវសហការជាមួយមន្ទីរបរិស្ថាន មន្ទីរសុខាភិបាល និងភាគីពាក់ព័ន្ធ ដើម្បីអប់រំណែនាំម្ចាស់អាជីវកម្ម សេវាកម្មទេសចរណ៍ ពីការចូលរួមធ្វើអនាម័យ ដោយលុបបំបាត់ការចោលសំរាម។ ចំណែកឯ អ្នកលក់ដូរម្ហូបអាហារនៅតាមដងផ្លូវ ត្រូវរក្សាអនាម័យម្ហូបអាហារ និងភេសជ្ជៈ ឲ្យបានល្អដល់ភ្ញៀវទេសចរណ៍។
មន្ទីរទេសចរណ៍រាជធានី-ខេត្ត ត្រូវសហការជាមួយប្រតិបត្តិករទេសចរណ៍ ក្នុងការពង្រឹងគុណភាពផលិតផលទេសចរណ៍ និងចូលរួមទប់ស្កាត់ការជួញដូរ ការប្រើប្រាស់គ្រឿងញៀន និងការធ្វើអាជីវកម្មជួញដូរផ្លូវភេទលើកុមារ។ ម្យ៉ាងទៀត រាល់ការស្នាក់នៅ និងតម្លៃម្ហូប ត្រូវសរសេរលើតារាងឲ្យបានច្បាស់លាស់។ ក្រៅពីនេះ មន្ទីរទេសចរណ៍រាជធានី-ខេត្ត ត្រូវសហការជាមួយសាលារាជធានី-ខេត្ត និងប្រព័ន្ធផ្សព្វផ្សាយ សារព័ត៌មាន វិទ្យុ និងទូរទស្សន៍ ដើម្បីផ្សព្វផ្សាយស្ប៉តទេសចរណ៍ដែលបានអប់រំ និងចូលរួមជម្រុញចលនាប្រឡងប្រណាំង។
បន្ថែមលើនេះ ត្រូវសហការគ្នាចុះតាមគោលដៅទេសចរណ៍ ក្នុងការអប់រំពីការយល់ដឹងជាសាធារណៈអំពីបញ្ហាបរិស្ថាន អនាម័យ និងសុវត្ថិភាព ជូនភ្ញៀវទេសចរណ៍។ គួរបញ្ជាក់ថា ក្រោយពីពិធីបុណ្យចូលឆ្នាំប្រពៃណីជាតិ គ្រប់មន្ទីរទេសចរណ៍ទាំងអស់ ត្រូវធ្វើរបាយការណ៍បូកសរុបស្ថិតិភ្ញៀវទេសចរទៅទស្សនាកម្សាន្ត មកក្រសួងទេសចរណ៍៕
Tag:
ក្រសួងទេសចរណ៍
ចូលឆ្នាំខ្មែរ
ល្បែងប្រជាប្រិយ
© រក្សាសិទ្ធិដោយ thmeythmey.com