ត្រឹម១ខែ មេបក្សប្រឆាំង ចុះទៅគ្រប់២៥ រាជធានី-ខេត្ត ដើម្បីផ្សព្វផ្សាយគោលនយោបាយឃុំ-សង្កាត់

ជាតិ

ត្រឹម១ខែ មេបក្សប្រឆាំង ចុះទៅគ្រប់២៥ រាជធានី-ខេត្ត ដើម្បីផ្សព្វផ្សាយគោលនយោបាយឃុំ-សង្កាត់

26, Mar 2017 , 9:19 pm

រូបភាព

រូបភាពពីហ្វេសប៊ុករបស់ឯកឧត្តម កឹម សុខា

ដោយ: ថ្មីៗ

ភ្នំពេញ៖ រយៈពេលជិត១ខែ ឯកឧត្តម កឹម សុខា បានទៅដល់២១ រាជធានី-ខេត្ត ដើម្បីពន្យល់ពីគោលនយោបាយថ្នាក់ឃុំ-សង្កាត់ ដល់មន្ត្រីនៅតាមមូលដ្ឋាន។ យ៉ាងយូរ នៅបំណាច់ខែមីនា ឆ្នាំ២០១៧នេះ ឯកឧត្តម កឹម សុខា នឹងទៅដល់គ្រប់ ២៥ រាជធានី-ខេត្ត តាមការកំណត់។

ឯកឧត្តម កឹម សុខា ប្រធានគណបក្សសង្គ្រោះជាតិ បានកំណត់រយៈពេលមួយខែ ដើម្បីចុះទៅឲ្យគ្រប់២៥ រាជធានី-ខេត្ត ក្នុងប្រទេសកម្ពុជា។ បេសកកម្មរបស់ឯកឧត្តម កឹម សុខា គឺដើម្បីពន្យល់ពីនយោបាយអាទិភាពទាំង ៥ចំណុច ទៅដល់សកម្មជន បេក្ខជនឃុំ-សង្កាត់ និងមន្ត្រីនៅតាមមូលដ្ឋាន។

លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានប្រាប់សារព័ត៌មានថ្មីៗថា ក្រោយក្លាយជាប្រធានគណបក្សសង្គ្រោះជាតិ កាលពីថ្ងៃទី២ ខែមីនា ឆ្នាំ២០១៧ មក ឯកឧត្តម កឹម សុខា ក៏ចាប់ផ្តើមដឹកនាំមន្ត្រីជាន់ខ្ពស់ ចុះទៅតាមមូលដ្ឋាន ជាបន្តបន្ទាប់។ អ្នកនាំពាក្យបក្សប្រឆាំងរូបនេះ អះអាងថា រហូតមកដល់ពេលនេះ ឯកឧត្តម កឹម សុខា បានចុះទៅដល់ ២១ រាជធានី-ខេត្ត ហើយ។ លោក បន្ថែមថា ខេត្ត៤ទៀត ដែលឯកឧត្តម កឹម សុខា មិនទាន់ចុះទៅដល់ រួមមាន បន្ទាយមានជ័យ បាត់ដំបង ពោធិសាត់ និងកំពុងឆ្នាំង។

លោក យ៉ែម បុញ្ញឫទ្ធិ បញ្ជាក់ដូច្នេះថា៖«គាត់ (ឯកឧត្តម កឹម សុខា) ត្រូវចំណាយពេលតែ ២ឬ៣ថ្ងៃទៀតប៉ុណ្ណោះ នឹងទៅដល់ ខេត្តទាំង៤នោះ។ ប្រហែលជាផុតខែនេះ គឺ គាត់ចុះទៅគ្រប់២៥រាជធានី-ខេត្ត ហើយ»។

បើតាមលោក យ៉ែម បុញ្ញឫទ្ធិ ដដែល រាល់វេទិកានានា ឯកឧត្តម កឹម សុខា មិនសូវនិយាយអ្វីផ្សេង ក្រៅតែពីគោលនយោបាយអាទិភាពទាំង៥ចំណុច នោះទេ។ យ៉ាងណា ឯកឧត្តម កឹម សុខា ក៏ឆ្លៀតនិយាយខ្លះៗដែរ ទាក់ទងនឹងគោលការណ៍របស់គណបក្ស។ លោក លើកឡើងបែបនេះថា៖«បេសកកម្មរបស់គាត់ គឺគាត់ផ្តល់សំខាន់ទៅលើគោលនយោបាយអាទិភាពទាំង៥ចំណុច។ តែគាត់ ក៏បានណែនាំដល់មន្ត្រីនៅតាមមូលដ្ឋាន ឲ្យចេះអត់ធ្ងន់ ហើយប្រកាន់ខ្ជាប់នូវគោលការណ៍អហិង្សា និងមិនយកខ្មែរណា ជាសត្រូវ»។

គោលនយោបាយអាទិភាពទាំង៥ចំណុចនោះ គឺ ការពង្រឹងសិទ្ធិអំណាចប្រជាពលរដ្ឋ, ការលើកកម្ពស់ជីវភាពប្រជាពលរដ្ឋ, ការពង្រឹងសេវាសាធារណៈ, ការពង្រឹងសន្តិសុខ និងការបែងចែកអំណាចទៅថ្នាក់ឃុំ-សង្កាត់ (វិមជ្ឈការ)។ គោលនយោបាយខាងលើ ត្រូវបានអនុម័តនៅក្នុងអង្គសមាជវិសាញ្ញរបស់គណបក្សសង្គ្រោះជាតិ កាលពីថ្ងៃទី២ ខែមីនា ឆ្នាំ២០១៧។

ក្រោយឯកឧត្តម កឹម សុខា ចុះទៅគ្រប់២៥ រាជធានី-ខេត្ត និងពន្យល់ដល់មន្ត្រីនៅតាមមូលដ្ឋានរួចហើយ គណបក្សសង្គ្រោះជាតិ នឹងចាប់ផ្តើមផ្សព្វផ្សាយគោលនយោបាយអាទិភាពទាំង៥ចំណុច ជាសាធារណៈ តែម្តង។ បច្ចុប្បន្ននេះ គោលនយោបាយអាទិភាពទាំង៥ចំណុច ត្រូវបានផ្សព្វផ្សាយតែនៅក្នុងរង្វង់គណបក្សសង្គ្រោះជាតិ ប៉ុណ្ណោះ៕