ជាតិ
សេដ្ឋកិច្ច
«ម្រេចកំពត» និង«ស្ករត្នោតកំពង់ស្ពឺ» បានវិញ្ញាបនបត្រចុះបញ្ជីម៉ាកសំគាល់ភូមិសាស្ត្រ នៅថៃ
× ភ្នំពេញ៖ ផលិតផលកសិកម្ម គឺ «ម្រេចកំពត» និងស្ករត្នោតកំពង់ស្ពឺ» ត្រូវបានចុះបញ្ជីម៉ាកសម្គាល់ភូមិសាស្ត្រហើយ នៅក្នុងទីក្រុងបាងកក ប្រទេសថៃ កាលពីពេលថ្មីៗនេះ។
ក្រសួងពាណិជ្ជកម្ម បានឲ្យដឹងថា ពិធីទទួលវិញ្ញាបនបត្រចុះបញ្ជីម៉ាក ត្រូវបានរៀបចំឡើងនៅស្ថានទូតបារាំងក្នុងប្រទេសថៃ ក្រោមការដឹកនាំដោយឯកអគ្គរដ្ឋទូតបារាំង លោក ហ្គីលេស ហ្គារ៉ាចុន (Gilles Garachon), លោក ជេស មីហ្គឹល សាន់ (Jesus Miguel SANZ) ឯកអគ្គរដ្ឋទូតអឺរ៉ុប និងលោកស្រី អាភីរាឌី តាន់ត្រាផន (Apiradi Tantraporn) រដ្ឋមន្ត្រីក្រសួងពាណិជ្ជកម្មថៃ និងមានការចូលរួមពីមន្ត្រីតំណាងក្រសួងពាណិជ្ជកម្មរបស់កម្ពុជា ,ប្រធានសមាគមលើកកម្ពស់ម្រេចកំពត និងស្ករត្នោតកំពង់ស្ពឺ និងតំណាងអង្គការ AFD, FAO ផងដែរ។
បើតាមហ្វេសប៊ុករបស់ក្រសួងពាណិជ្ជកម្ម ផលិតផលទាំងពីរនេះ បានដាក់ពាក្យស្នើសុំចុះបញ្ជីម៉ាកសម្គាល់ភូមិសាស្ត្រ (GI) នៅប្រទេសថៃ កាលពីថ្ងៃទី១៧ ខែមីនា ឆ្នាំ២០១៧ និងនៅប្រទេសវៀតណាម កាលពីថ្ងៃទី២៨ ខែធ្នូ ឆ្នាំ២០១៦ តាមរយៈគម្រោងម៉ាកសម្គាល់ភូមិសាស្ត្រថ្នាក់តំបន់របស់អង្គការ AFD/FAO។
កន្លងមក ផលិតផល«ម្រេចកំពត» ត្រូវបានចុះបញ្ជីជាម៉ាកសម្គាល់ភូមិសាស្ត្រ នៅសហគមអឺរ៉ុបជាផ្លូវការហើយ កាលពីថ្ងៃទី១៨ ខែកុម្ភៈ ឆ្នាំ២០១៦ នៅក្រោមជំនួយឧបត្ថម្ភពីគម្រោង «ECAP III» របស់សហគមអឺរ៉ុប ។ ចំណែកឯ «ស្ករត្នោតកំពង់ស្ពឺ» កំពុងតែស្ថិតក្នុងដំណាក់កាលត្រួតពិនិត្យលម្អិត ហើយនឹងអាចទទួលបានការចុះបញ្ជីនៅក្នុងសហគមអឺរ៉ុបដូចគ្នា នាពេលខាងមុខនេះ។ នេះបើតាមក្រសួងពាណិជ្ជកម្ម៕
© រក្សាសិទ្ធិដោយ thmeythmey.com