ជាតិ
សេដ្ឋកិច្ច
កម្ពុជា-ចិន ប្ដេជ្ញាពង្រីកទំហំពាណិជ្ជកម្មឲ្យបាន ៥ពាន់លានដុល្លារ ក្នុងឆ្នាំ២០១៧
× ភ្នំពេញ៖ កម្ពុជា-ចិន បានប្ដេជ្ញាពង្រីកទំហំពាណិជ្ជកម្មឲ្យបាន ៥ពាន់លានដុល្លារ ក្នុងឆ្នាំ២០១៧នេះ។
រដ្ឋមន្ត្រីក្រសួងពាណិជ្ជកម្មលោក ប៉ាន សូរស័ក្ដិ បានបញ្ជាក់ថា ក្រសួងមានយុទ្ធសាស្ត្រជំរុញ និងសម្របសម្រួលពាណិជ្ជកម្ម និងវិនិយោគរវាងកម្ពុជា-ចិន តាមរយៈជើងហោះហើរផ្ទាល់ ពីទីក្រុងធំៗនៃប្រទេសចិន ដើម្បីទាក់ទាញកំណើនភ្ញៀវទេសចរ និងវិនិយោគិន ក្នុងការផ្លាស់ប្តូរពាណិជ្ជកម្មប្រទេសទាំងពីរ។ ក្រៅពីនេះក្រសួងពាណិជ្ជកម្ម ក៏បានបង្កើតមជ្ឈមណ្ឌលពាណិជ្ជកម្ម និងព័ត៌មាននៅតាមបណ្តាខេត្តផ្សេងៗនៃប្រទេសចិនថែមទៀត ដើម្បីជំរុញសកម្មភាពពាណិជ្ជកម្មឲ្យកាន់តែទូលំទូលាយ។ ជាពិសេសបើកច្រកទីផ្សារនៅប្រទេសចិន និងប្រទេសដទៃទៀតដែលកម្ពុជាទទួលបាន ប្រព័ន្ធអនុគ្រោះពន្ធគយសូន្យ និងមិនជាប់កូតា ដើម្បីជំរុញឲ្យការវិនិយោគនៅកម្ពុជា ទទួលបានប្រាក់ចំណេញផងដែរ។
ថ្លែងក្នុងជំនួបពិភាក្សាស្ដីពីការជំរុញពាណិជ្ជកម្ម និងវិនិយោគកម្ពុជា ខេត្ដសានស៊ីនៃសាធារណរដ្ឋប្រជាមានិតចិន នៅថ្ងៃទី២៧ មីនានេះ លោក ប៉ាន សូរស័ក្ដិ បានបញ្ជាក់ថា ៖« ការចុះអនុស្សរណៈរវាងក្រសួងពាណិជ្ជកម្មកម្ពុជាជាមួយខេត្ដ សានស៊ីនៃប្រទេសចិន គឺដើម្បីពង្រឹងទំនាក់ទំនងផ្នែកពាណិជ្ជកម្ម និងទាក់ទាញអ្នកវិនិយោគចិន មកធ្វើការវិនិយោគនៅក្នុងតំបន់សេដ្ឋកិច្ចពិសេសក្នុងប្រទេសកម្ពុជា ពិសេសការទាក់ទាញទេសចរចិន ឲ្យបានកាន់តែច្រើនថែមទៀត»។
អភិបាលខេត្តសានស៊ី នៃប្រទេសចិន លោក ហ៊ូ ហេភីង បានអះអាងថា លោកនឹងជួយជំរុញអ្នកវិនិយោគិនចិនឲ្យមករកស៊ី និងវិនិយោគលើវិស័យឧស្សាហកម្ម ហេដ្ឋារចនាសម្ព័ន្ធ ថាមពល ទូរគមនាគមន៍ អគ្គិសនី កសិកម្ម និងប្រព័ន្ធធារាសាស្ដ្រនៅកម្ពុជា។
សូមបញ្ជាក់ថា ទំហំពាណិជ្ជកម្មរវាងកម្ពុជា-ចិន មកដល់ពេលនេះ មានប្រមាណជា៤ពាន់លានដុល្លារហើយ៕
ប្រភពAKP
Tag:
កម្ពុជា
ចិន
ពាណិជ្ជកម្ម
© រក្សាសិទ្ធិដោយ thmeythmey.com