អន្តរជាតិ
ចេញពីសិង្ហបុរី ប្រធានាធិបតីបារាំងចូលម៉ាឡេស៊ីដើម្បីពពាយនាយលក់យន្តហោះចម្បាំង Rafale នាយករដ្ឋមន្ត្រីម៉ាឡេស៊ី ណាជីប រ៉ាហ្សាក់ ទទួលប្រធានាធិបតីបារាំង ហ្រ្វង់ស្វ័រ ហូឡង់ដ៍ (រូបភាពហ្វេសប៊ុក Najib Razak)
× ប្រធានាធិបតីបារាំង ហ្វ្រង់ស្វ័រ ហូឡង់ (Francois Hollande) បានទៅដល់ម៉ាឡេស៊ីហើយ ក្រោយបញ្ចប់ទស្សនកិច្ចនៅសិង្ហបុរី។ នេះជាទស្សនកិច្ចលើកទី១ របស់ប្រមុខរដ្ឋបារាំងទៅកាន់ម៉ាឡេស៊ីក្នុងពេលច្រើនជាង១ទសវត្សរ៍មកនេះ។ ជាមួយគោលដៅពង្រឹងទំនាក់ទំនងទ្វេភាគី ប្រធានបទទិញ-លក់យន្តហោះចម្បាំងបារាំង Rafale ក៏ត្រូវលើកឡើងដែរ ប៉ុន្តែនៅមិនទាន់ការសម្រេចចិត្តទិញទេ បើទោះជាម៉ាឡេស៊ីកំពុងត្រូវការយន្តហោះថ្មីក៏ដោយ។
ចេញពីសិង្ហបុរី ប្រធានាធិបតីបារាំង ហ្វ្រង់ស្វ័រ ហូឡង់ ក៏បន្តដំណើរទៅកាន់ម៉ាឡេស៊ីនៅថ្ងៃទី២៨ ខែមីនា។ ប្រធានាធិបតីបារាំង ក៏ឆ្លៀតសាកសួរនាយករដ្ឋមន្ត្រីម៉ាឡេស៊ីរឿងទិញយន្តហោះចម្បាំងថ្មី ព្រោះដឹងថាម៉ាឡេស៊ីកំពុងត្រូវការយន្តហោះចម្បាំងថ្មីបន្ថែមទៀត។ យ៉ាងណាក្ដី លោក ហូឡង់ ទំនងជាខកចិត្តបន្តិចហើយ ដ្បិតនាយករដ្ឋមន្ត្រី ណាជីប រ៉ាហ្សាក់ ប្រាប់វិញ ម៉ាឡេស៊ីមិនទាន់សម្រេចចិត្តទិញឡើយ។
ក្នុងសន្និសីទរួមគ្នានៅថ្ងៃទី២៨ ខែមីនា នាយករដ្ឋមន្ត្រី រ៉ាហ្សាក់ និយាយថា លោកពិតជាបាននិយាយរឿងទិញយន្តហោះចម្បាំង Rafale ដែលផលិតដោយក្រុមហ៊ុនបារាំង Dassault Aviation SA ប៉ុន្តែមិនទាន់ឈានដល់កិច្ចព្រមព្រៀងឡើយ។ លោក ណាជីប ប្រាប់លោក ហូឡង់ ថា ម៉ាឡេស៊ី មិនទាន់សម្រេចចិត្តទេ តែបានកត់សម្គាល់ច្បាស់ពីជោគជ័យរបស់យន្តហោះចម្បាំងនេះ នៅប្រទេសដទៃទៀត។ នេះបើយោងតាមទីភ្នាក់ងារព័ត៌មាន Reuters ។
ម៉ាឡេស៊ី កំពុងស្វែងរកទិញយន្តហោះចម្បាំងថ្មី ដើម្បីជំនួសយន្តហោះចាស់ៗរបស់ខ្លួនប្រភេទ MiG-29 ដែលជាផលិតផលរបស់រុស្ស៊ី។ យន្តហោះចម្បាំង Rafale ជាបេក្ខភាពឈានមុខ ហើយម៉ាឡេស៊ីអាចទិញយន្តហោះប្រភេទនេះដល់ទៅ១៨គ្រឿង ដែលអាចតម្លៃដល់ទៅ២ពាន់លានដុល្លារ។ យន្តហោះប្រភេទ MiG-29 ជិតពាក់កណ្ដាល ត្រូវដាក់ឲ្យឈប់ប្រើប្រាស់ទៅហើយ ដូចនេះទើបម៉ាឡេស៊ីខំរកយន្តហោះថ្មីដើម្បីពង្រឹងកងទ័ពអាកាសរបស់ខ្លួន។
ប្រធានាធិបតី ហូឡង់ បញ្ជាក់ប្រាប់នាយករដ្ឋមន្ត្រី រ៉ាហ្សាក់ វិញថា បារាំងចង់ផ្គត់ផ្គង់យន្តហោះថ្មីឲ្យម៉ាឡេស៊ី។ លោក ហូឡង់ ក៏បានអួតអាងពីយន្តហោះលក្ខណៈពិសេសរបស់យន្តហោះ Rafale ថាជាយន្តហោះល្អជាងគេក្នុងប្រភេទយន្តហោះដូចគ្នា។ ប្រធានាធិបតីបារាំង ក៏ស្នើឲ្យមានការពិភាក្សារឿងតម្លៃ និងលក្ខខណ្ឌដទៃទៀត ព្រោះលោកជឿថា ម៉ាឡេស៊ី នឹងសម្រេចចិត្តទិញ Rafale ជាក់ជាមិនខាននៅពេលកាលៈទេសៈសមស្របមកដល់។
ក្រុងកូឡាឡាំពួរ ហាក់រារែកចំពោះយន្តហោះបារាំង ដោយសារខ្លួនក៏នៅមានជម្រើសមួយទៀត។ យន្តហោះចម្បាំង Eurofighter Typhoon របស់អឺរ៉ុប ផលិតដោយក្រុមហ៊ុន BAE Systems ក៏ស្ថិតក្នុងចិត្តរបស់ម៉ាឡេស៊ីដែរ។ បើទោះជាមានតម្លៃថ្លៃជាងយន្តហោះបារាំង យន្តហោះអឺរ៉ុបក៏មានអានុភាពមិនអន់ប៉ុន្មានដែរ បើទោះជាមិនសូវទីផ្សារខ្លាំងក្ដី ខណៈយន្តហោះបារាំង ហាក់មានទីផ្សារច្រើនជាង ជាពិសេសទើបតែលក់ឲ្យឥណ្ឌាបានជាង៣០គ្រឿងឯណោះ៕
Tag:
បារាំង
Francois
Hollande
ម៉ាឡេស៊ី
Najib Razak
© រក្សាសិទ្ធិដោយ thmeythmey.com