ជាតិ
សង្គមជាតិ
លោក កែ គឹមយ៉ាន៖ឧក្រិដ្ឋជននៅតែប៉ងយកកម្ពុជាធ្វើចរាចរឆ្លងកាត់ និងកែច្នៃគ្រឿងញៀន
× ក្រុមឧក្រិដ្ឋជន នៅតែបន្តប៉ុនប៉ងប្រើប្រាស់ ប្រទេសកម្ពុជាធ្វើចរាចរឆ្លងកាត់ និងកែច្នៃគ្រឿងញៀន។ នេះជាការបញ្ជាក់របស់លោក កែ គឹមយ៉ាន ប្រធានអាជ្ញាធរជាតិ ប្រយុទ្ធប្រឆាំងគ្រឿងញៀន ដែលប្រាប់មូលហេតុថា ដោយសារកម្ពុជាទីតាំងភូមិសាស្ត្ររបស់កម្ពុជា និងការមិនថយចុះ ស្ថានភាពគ្រឿងញៀននៅក្នុងតំបន់ និងពិភពលោក។
លោក កែ គឹមយ៉ាន ប្រធានអាជ្ញាធរជាតិ ប្រយុទ្ធប្រឆាំងគ្រឿងញៀន បានបញ្ជាក់ថា ឧក្រិដ្ឋជនគ្រឿងញៀន នៅតែបន្តប៉ុនប៉ងយកកម្ពុជា ជាកន្លែងចរាចរឆ្លងកាត់ និងកែច្នៃគ្រឿងញៀន។ លោកថ្លែងដូច្នេះ នៅក្នុងពិធីបើកសន្និបាតបូកសរុបលទ្ធផលការងារប្រយុទ្ធប្រឆាំងគ្រឿងញៀនឆ្នាំ២០១៦ និងលើកទិសដៅការងារឆ្នាំ២០១៧ នៅថ្ងៃទី២៨ ខែមីនា និងត្រូវបានស្រង់សម្តីដោយទីភា្នក់ងារសារព័ត៌មានកម្ពជា(AKP)។
AKP បានស្រង់សម្តីលោក កែ គឹមយ៉ាន ទៀតថា កម្ពុជានៅមិនឆ្ងាយពីតំបន់ត្រីកោណមាស និងអឌ្ឍចន្ទមាស ដែលត្រូវបានគេចាត់ទុក ថាជាតំបន់ផលិតគ្រឿងញៀនយ៉ាងធំ សម្រាប់ទីផ្សារតំបន់ និងពិភពលោក។ ទន្ទឹមនឹង នេះភូមិសាស្ត្រព្រំដែន ដែលជាផ្លូវរបៀងតាមព្រំដែនគោក ទឹក និងច្រករបៀង ជាច្រើនទៀត នៅមានភាពងាយស្រួលដល់ការឆ្លងកាត់គ្រឿងញៀន ពិសេសតាមបណ្តោយព្រំដែនភាគឦសាន ជាមួយប្រទេសឡាវ។ ហេតុដូច្នេះ ទើបធ្វើឱ្យកម្ពុជាបាន និងកំពុងរងនូវឥទ្ធិពល នៃនិន្នាការគ្រឿងញៀនឆ្លងកាត់ ក្នុងនោះក៏មានមកពីតំបន់អាមេរិក និងអាហ្វ្រិកខាងត្បូង តាមផ្លូវគោក ផ្លូវទឹក និងផ្លូវអាកាសដែរ។ នេះបើតាម លោក កែ គឹមយ៉ាន។
រដ្ឋាភិបាលកម្ពុជា បានបើកប្រតិបត្តិការបង្ក្រាបគ្រឿងញៀនទ្រង់ទ្រាយធំលើកដំបូងនៅទូទាំងប្រទេស រយៈពេល៦ខែ ចាប់ពីថ្ងៃទី១ ខែមករា ដល់ថ្ងៃទី៣០ ខែមិថុនា ឆ្នាំ២០១៧ ។ រាប់ចាប់ពីខែដើមឆ្នាំមក សមត្ថកិច្ចបង្ក្រាបបទល្មើសគ្រឿងញៀនបានចំនួន ២,៦៧៧ករណី ក្នុងនោះករណីជួញដូរ ១,៧៤៤ករណី និងករណីប្រើប្រាស់ចំនួន ៩២៩ ករណី និងឃាត់ខ្លួនមនុស្សបានចំនួន ៦,១៣២នាក់ ក្នុងនោះស្រីចំនួន៦២៨នាក់។
ដោយឡែកនៅឆ្នាំ២០១៦នេះ សមត្ថកិច្ចបង្ក្រាបបានបទល្មើសគ្រឿងញៀន ៤,១៩១ ករណី ក្នុងនោះបទល្មើសប្រើប្រាស់គ្រឿងញៀនជាង១ពាន់ករណី ចាប់ខ្លួនជនសង្ស័យសរុប ៩,៨០២ នាក់ ក្នុងនោះអ្នកប្រើប្រាស់មានគ្រឿងញៀន ៣,៦១១នាក់ និងរឹបអូសគ្រឿងញៀនជាង១៧៥គីឡូក្រាម។ បើតាមអាជ្ញាធរជាតិប្រយុទ្ធប្រឆាំងគ្រឿងញៀន តួលេខនៃការសម្រង់អ្នកប្រើប្រាស់គ្រឿងញៀន មានចំនួន១៨,៥៥៤នាក់ កើនឡើង៤,២៤២នាក់ ស្មើនឹង២៩,៦៣ភាគរយ ធៀបនឹងពេលមុន៕
Tag:
កែ គឹមយ៉ាន
គ្រឿងញៀន
© រក្សាសិទ្ធិដោយ thmeythmey.com