ជាតិ
ឱកាសសម្រាប់សិស្សថ្នាក់ទី៩-១២ ក្នុងការប្រកួតប្រជែងរចនាផ្ទាំងរូបភាព STEM
× ភ្នំពេញ៖ ក្រសួងអប់រំ យុវជន និងកីឡា សហការជាមួយ STEM កម្ពុជា បានបើកការប្រកួតប្រជែងរចនាផ្ទាំងរូបភាព ក្រោមប្រធានបទ« លើកកម្ពស់មុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) នៅកម្ពុជា»។ ការប្រកួតប្រជែងនេះ បានផ្ដល់ឱកាសសម្រាប់សិស្សានុសិស្សចាប់ពីថ្នាក់ទី៩ ដល់ថ្នាក់ទី១២។ បេក្ខជនជ័យលាភី នឹងទទួលបានប្រាក់រង្វាន់ផងដែរ។
ការប្រកួតប្រជែងរចនាផ្ទាំងរូបភាព មានការសហការគ្នារវាងក្រសួងអប់រំ យុវជន និងកីឡា ជាមួយ STEM កម្ពុជា ក្នុងគោលបំណង លើកកម្ពស់មុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យានៅកម្ពុជា។ ការប្រកួតប្រជែងនេះ បានផ្ដល់ឱកាសដល់សិស្សានុសិស្សចាប់ពីថ្នាក់ទី៩-១២ ទូទាំងប្រទេសកម្ពុជា ទាំងគ្រឹះស្ថានអប់រំរដ្ឋ និងឯកជន។
ជាមួយគ្នានេះ ផ្ទាំងរូបភាពដែលបេក្ខជនដាក់ប្រកួតប្រជែង ត្រូវបង្ហាញឲ្យបានច្បាស់លាស់លើមុខវិជ្ជាណាមួយនៃ STEM។ ជាពិសេស ផ្ទាំងរូបភាពត្រូវតែមានភាពទាក់ទាញអារម្មណ៍ដល់យុវជនកម្ពុជា និងផ្ដល់នូវខ្លឹមសារដ៏សំខាន់ នៅក្នុងមហោស្រព STEMនេះ។ បន្ថែមលើសនេះ តាមរយៈការរចនាផ្ទាំងរូបភាពនេះ គឺចង់ឲ្យសិស្សានុសិស្សទទួលបាននូវភាពរីករាយ និងជំរុញទឹកចិត្តឲ្យស្វែងរកព័ត៌មានបន្ថែមពី STEM។
គួរបញ្ជាក់ថា ផ្ទាំងរូបភាពបេក្ខជនជ័យលាភី នឹងទទួលបានប្រាក់រង្វាន់ ព្រមទាំងដាក់តាំងបង្ហាញក្នុងមហោស្រព STEM ដែលនឹងប្រព្រឹត្តឡើងនៅថ្ងៃទី២៩-៣០ ខែមេសា ឆ្នាំ២០១៧ នៅមជ្ឈមណ្ឌលសន្និបាត ពិព័រណ៍កោះពេជ្រ។ សម្រាប់ បេក្ខជនជ័យលាភីលេខ១ ទទួលបានថវិកា ២០០ ដុល្លារ, ជ័យលាភីលេខ២ ទទួលបានថវិកា ១៥០ ដុល្លារ និងជ័យលាភីលេខ៣ ទទួលបានថវិកា ១០០ ដុល្លារ។ កម្មវិធីប្រកួតប្រជែងនេះ សិស្សានុសិស្សអាចចូលរួមដោយឥតគិតថ្លៃ ហើយការទទួលពាក្យនឹងផុតកំណត់នៅថ្ងៃទី ០៧ ខែមេសា ឆ្នាំ២០១៧នេះ ។ សម្រាប់ព័ត៌មានបន្ថែម [email protected]៕
© រក្សាសិទ្ធិដោយ thmeythmey.com