ជាតិ
លោក អេង ឆៃអ៊ាង ៖ ក្រសួងមហាផ្ទៃទទួលស្គាល់សមាជបក្ស ប៉ុន្តែជំទាស់លើសមាសភាពមេដឹកនាំបក្ស
× ភ្នំពេញ៖ អនុប្រធានគណបក្សសង្គ្រោះជាតិ លោក អេង ឆៃអ៊ាង បានអះអាងថា ក្រសួងមហាផ្ទៃ បានទទួលស្គាល់សមាជគណបក្សកន្លងមកនេះ គឺអនុវត្តត្រឹមត្រូវតាមច្បាប់ហើយ ។ ប៉ុន្តែអ្វីដែលជាបញ្ហាចោទនោះ ត្រង់ថា ក្រសួងមហាផ្ទៃ មិនទទួលស្គាល់ក្បាលម៉ាស៊ីនដឹកនាំគណបក្សសង្គ្រោះជាតិទៅវិញ។
ក្រោយបញ្ចប់កិច្ចប្រជុំដែលប្រើរយៈពេលជាងមួយម៉ោងនោះ ទាំងគណបក្សសង្គ្រោះជាតិ និងក្រសួងមហាផ្ទៃ មិនទាន់អាចរកដំណោះស្រាយសមរម្យ ជុំវិញភាពចម្រូងចម្រាសនៃសមាជគណបក្សសង្គ្រោះជាតិនោះទេ។ មិនទាន់អាចរកដំណោះស្រាយបាន ដោយសារតែខាងក្រសួងមហាផ្ទៃ ទាមទារឲ្យគណបក្សសង្គ្រោះជាតិ ពិនិត្យមើលឡើងវិញ លើសមាភាពក្បាលម៉ាស៊ីនដឹកនាំគណបក្ស ដែលមានឯកឧត្តម កឹម សុខា ជាប្រធាន។
អនុប្រធានគណបក្សសង្គ្រោះជាតិ លោក អេង ឆៃអ៊ាង បាននិយាយថា ក្រសួងមហាផ្ទៃបានទទួលស្គាល់សមាជ និងការធ្វើវិសោធនកម្មលក្ខន្តិករបស់គណបក្សហើយ ប៉ុន្តែក្រសួងមហាផ្ទៃជំទាស់នឹងសមាសភាពមេដឹកនាំគណបក្សទៅវិញ។ ថ្លែងចំពោះមុខអ្នកកាសែត នាទីស្តីការក្រសួងមហាផ្ទៃ នៅរសៀលថ្ងៃទី២៩ មីនា នេះ លោក អេង ឆៃអ៊ាង បានបញ្ជាក់ដូច្នេះថា៖«តំណាងក្រសួងមហាផ្ទៃ បានបញ្ជាក់ប្រាប់មកខាងខ្ញុំថា ដំណើរការសមាជវិសាមញ្ញនេះស្របច្បាប់។ ហើយការធ្វើវិសោធនកម្មលក្ខន្តិកគណបក្សសង្គ្រោះជាតិ មិនទាស់ទេ ។ ទាស់តែរឿងជ្រើសតាំងក្បាលម៉ាស៊ីនដឹកនាំរបស់គណបក្ស ហើយនិងពាក្យស្លោកគណបក្ស។ ហើយនៅក្នុងករណីនេះ ខាងយើងខ្ញុំបានស្នើសុំឲ្យក្រសួងមហាផ្ទៃ ឲ្យចេញលិខិតមកថា សមាជធ្វើត្រូវ ហើយវិសោធនកម្មលក្ខន្តិកធ្វើត្រូវដែរ។ ប៉ុន្តែក្រសួងមហាផ្ទៃ មិនព្រមចេញឲ្យ…។
បើតាមលោក អេង ឆៃអ៊ាង គណបក្សលោកនឹងយកករណីដែលក្រសួងមហាផ្ទៃលើកឡើងខាងនេះ ទៅពិភាក្សាគ្នានៅក្នុងផ្ទៃក្នុងបក្ស ដើម្បីរកចំណុចរួមដោះស្រាយបញ្ហានេះឲ្យបានត្រឹមត្រូវ។ ប៉ុន្តែអ្វីដែលលោក អេង ឆៃអ៊ាង ងឿងឆ្ងល់នោះត្រង់ថា ក្រសួងមហាផ្ទៃ មកលូកដៃរឿងក្បាលម៉ាស៊ីនគណបក្ស។
«បើនិយាយឲ្យស្រួលស្ដាប់ទៅ សម្រាប់កិច្ចការផ្ទៃក្នុងគណបក្សដូចសមាគម រឿងនេះជារឿងឯកជនគណបក្សទេ។ ប៉ុន្តែឥឡូវនេះក្រសួងមហាផ្ទៃ លូកដៃចូលមកជ្រៅ»។ នេះជាការលើកឡើងរបស់លោក អេង ឆៃអ៊ាង មុននឹងអះអាងថា ភាពចម្រូងចម្រាសនៃសមាជបក្សនេះ នឹងមិនឈានដល់ការរំលាយគណបក្សសង្គ្រោះជាតិ ឬហាមមិនឲ្យគណបក្សចូលរួមក្នុងការបោះឆ្នោតឡើយ។
កាលពីថ្ងៃទី២ ខែមីនា ឆ្នាំ២០១៧ គណបក្សសង្គ្រោះជាតិ បានធ្វើសមាជបក្សវិសាមញ្ញ ដែលបានបោះឆ្នោតជ្រើសតាំងលោក កឹម សុខា ជាប្រធាន លោក ប៉ុល ហំម លោកស្រី មូរ សុខហួរ និងលោក អេង ឆៃអ៊ាង ជាអនុប្រធាន។
តែយ៉ាងណាសម្ដេច ស ខេង បានចេញលិខិតមួយកាលពីថ្ងៃទី២២ មីនា ប្រាប់ទៅគណបក្សសង្គ្រោះជាតិថា សមាជគណបក្ស កាលពីថ្ងៃទី០២ មីនានោះ បានអនុវត្តផ្ទុយនឹងប្រការ៤៧ ត្រេទី២នៃលក្ខន្តិកៈគណបក្ស ដោយអាណត្តិនៅសល់មានរយៈពេលតិចជាង១៨ខែ គិតត្រឹមកាលបរិច្ឆេទដែលលោក សម រង្ស៊ី បានលាលែងចេញពីតំណែងប្រធានគណបក្ស នៅថ្ងៃទី១១ កុម្ភៈ ឆ្នាំ២០១៧៕
Tag:
មហាផ្ទៃ
CNRP
អេង ឆៃអ៊ាង
© រក្សាសិទ្ធិដោយ thmeythmey.com