ជាតិ
សេដ្ឋកិច្ច
ពន្ធដារ ពន្យារពេលការបង់ពន្ធលើប្រាក់ចំណូលប្រចាំឆ្នាំ២០១៦ ដល់ថ្ងៃទី៣០ខែមេសា
× ភ្នំពេញ៖ ការដាក់លិខិតប្រកាស និងបង់ប្រាក់ពន្ធលើប្រាក់ចំណូលប្រចាំឆ្នាំ២០១៦ ត្រូវបានពន្យាររហូតដល់ថ្ងៃទី៣០ខែមេសាឆ្នាំនេះ។ នេះបើតាមសេចក្ដីជូនដំណឹងរបស់អគ្គនាយកដ្ឋានពន្ធដារ នៅថ្ងៃទី៣១ខែមីនា។
ក្រៅពីនេះ អគ្គនាយកដ្ឋានពន្ធដារ បានពន្យារពេល«ការអនុគ្រោះលើកលែងទោសទណ្ឌនានាក្នុងការកែតម្រូវលិខិតប្រកាសពន្ធដោយស្ម័គ្រចិត្តយ៉ាងតិច៣ឆ្នាំ» រហូតដល់ថ្ងៃទី៣០ខែមេសាឆ្នាំនេះ។ ការអនុគ្រោះលើកលែងទោសទណ្ឌនេះ ត្រូវបានកំណត់នៅក្នុងសេចក្ដីជូនដំណឹងរបស់អគ្គនាយកដ្ឋានពន្ធដារ កាលពីថ្ងៃទី១៩ខែមករាឆ្នាំនេះ។ ជាមួយគ្នានេះ ការផ្ដល់របាយការណ៍សវនកម្មឯករាជ្យ ក៏ត្រូវពន្យារពេលរហូតដល់ថ្ងៃទី៣០ខែមិថុនាឆ្នាំនេះផងដែរ។ នេះបើតាមសេចក្ដីជូនដំណឹងដដែលនេះ។
សេចក្ដីជូនដំណឹងរបស់អគ្គនាយកដ្ឋានពន្ធដារបញ្ជាក់ថា ក្នុងករណីសហគ្រាសណាមួយមិនបានបំពេញកាតព្វកិច្ចពន្ធទាន់ពេលវេលាកំណត់ខាងលើ នោះនឹងត្រូវរងទោសទណ្ឌតាមច្បាប់ស្ដីពីសារពើពន្ធ។
សេចក្ដីជូនដំណឹងខាងលើនេះ បានបញ្ជាក់ពីមូលហេតុនៃការពន្យារពេលសម្រាប់កាតព្វកិច្ចពន្ធទាំងនេះ។ អគ្គនាយកដ្ឋានពន្ធដារបានពិនិត្យឃើញថា ការកាន់កាប់បញ្ជិកាគណនេយ្យនិងដាក់លិខិតប្រកាសពន្ធលើប្រាក់ចំណូលប្រចាំឆ្នាំរបស់សហគ្រាសមួយចំនួនបានត្រឹមត្រូវ និងមួយចំនួនទៀតបានស្នើសុំកែតម្រូវបញ្ជិកាគណនេយ្យនិងប្រាក់បង់ពន្ធឡើងវិញជាបន្តបន្ទាប់ដោយស្របតាមសេចក្ដីជូនដំណឹង ចុះថ្ងៃទី១៩ខែមករាឆ្នាំ២០១៧ ស្ដីពីការអនុគ្រោះលើកលែងទោសទណ្ឌនានាក្នុងការកែតម្រូវលិខិតប្រកាសពន្ធដោយស្ម័គ្រចិត្ត។
សេចក្ដីជូនដំណឹងនេះបានបន្តថា សហគ្រាសមួយចំនួនបានស្នើសុំការកែតម្រូវបញ្ជីគណនេយ្យមានរយៈពេលច្រើនឆ្នាំជាប់ៗគ្នា បណ្ដាលឲ្យមានការយឺតយ៉ាវក្នុងការបិទបញ្ជីគណនេយ្យប្រចាំឆ្នាំ២០១៦ផងដែរ ហើយសហគ្រាសមួយចំនួនក៏បានដាក់លិខិតមកស្នើសុំពន្យារពេលដាក់លិខិតប្រកាសពន្ធលើប្រាក់ចំណូលប្រចាំឆ្នាំ២០១៦។ ជាមួយគ្នានេះសហគ្រាសខ្លះបានស្នើសុំពន្យារពេលផ្ដល់របាយការណ៍សវនកម្មឯករាជ្យ៕
Tag:
ពន្ធ
អគ្គនាយកដ្ឋានពន្ធដារ
© រក្សាសិទ្ធិដោយ thmeythmey.com