ជាតិ
សេដ្ឋកិច្ច
ក្រសួងទេសចរណ៍ ដាក់កំហិតឲ្យរមណីយដ្ឋានទេសចរណ៍ទាំងអស់ចូលរួមប្រឡង«រមណីយដ្ឋានទេសចរណ៍គំរូ»
×
ភ្នំពេញ៖ ក្រសួងទេសចរណ៍បានដាក់ចេញនូវចលនាប្រឡងប្រណាំង«រមណីយដ្ឋានទេសចរណ៍គំរូ- Best Tourism Resort» ដែលជាផ្នែកមួយនៃចលនាប្រឡងប្រណាំង«រង្វាន់សម្តេចតេជោនាយករដ្ឋមន្ត្រីសម្រាប់ធុរកិច្ចបៃតងក្នុងវិស័យទេសចរណ៍»។ ចលនាប្រឡងប្រណាំងនេះ មានគោលដៅបង្កើនប្រសិទ្ធភាពក្នុងការអភិវឌ្ឍ និងគ្រប់គ្រងរមណីយដ្ឋានទេសចរណ៍ឲ្យមាននិរន្តរភាព គុណភាព និងប្រកបដោយភាពច្នៃប្រឌិដ្ឋ។
បើតាមសេចក្ដីជូនដំណឹងរបស់ក្រសួងទេសចរណ៍ ដែលចុះថ្ងៃទី២៩ខែមិនា បានបញ្ជាក់ថារមណីយដ្ឋានទេសចរណ៍ទាំងអស់ ត្រូវដាក់ពាក្យចូលរួមប្រឡងប្រណាំង«រមណីយដ្ឋានទេសចរណ៍គំរូ» ជាកាតព្វកិច្ច។
នីតិវិធីប្រឡង ត្រូវបែងចែកជា ៥ ដំណាក់កាល។ ដំណាក់កាលទី១ ចាប់ពីខែមេសាដល់ខែមិថុនាឆ្នាំនេះ៖ រមណីយដ្ឋានទាំងអស់អាចស្នើសុំទម្រង់បែបបទចុះឈ្មោះប្រឡង ដោយផ្ទាល់នៅមន្ទីរទេសចរណ៍រាជធានី ខេត្ត ឬទាញយកពាក្យប្រឡងតាមរយៈ គេហទំព័រ WWW.cambodiacleancity.gov.kh ។ ដំណាក់កាលទី២ ខែមិថុនា ដល់ខែសីហា៖ គណៈកម្មការវាយតម្លៃចលនាប្រឡងប្រណាំងរមណីយដ្ឋានទេសចរណ៍គំរូ ពិនិត្យនិងវាយតម្លៃលើពាក្យសុំឯកសារពាក់ព័ន្ធ និងស្ថានភាពជាក់ស្ដែងរបស់រមណីយដ្ឋានទេសចរណ៍បេក្ខភាព។
ដំណាក់កាលទី៣៖ ខែសីហា ដល់ខែតុលា៖ គណៈកម្មការវាយតម្លៃចលនាប្រឡងប្រណាំងរមណីយដ្ឋានទេសចរណ៍គំរូ ប្រមូលទិន្នន័យនិងរៀបចំរបាយការចុងក្រោយ ដើម្បីឈានទៅប្រកាសលទ្ធផលជ័យលាភី។ ដំណាក់កាលទី៤ ខែតុលា៖ គណៈកម្មការជូនដំណឹងអំពីជ័យលាភីដែលទទួលបានឡាបិលដល់បេក្ខភាព។ ដំណាក់កាលទី៥ ខែវិច្ឆិកាដល់ខែធ្នូឆ្នាំនេះ៖ ក្រសួងទេសចរណ៍នឹងរៀបចំពិធីប្រគល់រង្វាន់ដល់ជ័យលាភីចលនាប្រឡងប្រណាំងរមណីយដ្ឋានទេសចរណ៍គំរូ លើកទី១ ៕
Tag:
ទេសចរណ៍
រមណីយដ្ឋានទេសចរណ៍គំរូ
© រក្សាសិទ្ធិដោយ thmeythmey.com