ជាតិ
ភ្លៀងនឹងបន្តធ្លាក់ ចាប់ពីថ្ងៃទី៤ខែមេសា!
×
ភ្នំពេញ៖ ភ្លៀងនឹងបន្តធ្លាក់ក្នុងក្របខណ្ឌទូទាំងប្រទេស ចាប់ពីថ្ងៃទី៤ខែមេសាឆ្នាំនេះ ដោយសារនៅថ្ងៃទី៤នឹងមានការប្រសព្វគ្នារវាងជ្រលងសម្ពាធទាប ដែលរុញមកពីផ្នែកខាងត្បងនៃសមុទ្រចិនខាងត្បួង និងជ្រលងសម្ពាធខ្ពស់ដែលរុញមកពីភាគខាងត្បូងនៃប្រទេសចិន ត្រង់តំបន់ដីសណ្ដរទន្លេមេគង្គ។ នេះបើតាមសេចក្ដីជូនដំណឹងបន្ថែមរបស់ក្រសួងធនធានទឹក និងឧតុនិយម ដែលចុះថ្ងៃទី២មេសានេះ។
យោងតាមការព្យាកររបស់ក្រសួងធនធានទឹក និងឧតុនិយម ស្ថានភាពខាងលើនឹងបង្កឲ្យមានភ្លៀងធ្លាក់រាយប៉ាយលើផ្ទៃប្រទេស ក្នុងកម្រិតពីមធ្យមទៅច្រើន។ សេចក្ដីជូនរបស់ក្រសួងមិនបានបញ្ជាក់ថា ការធ្លាក់ភ្លៀងទូទាំងប្រទេសនេះ នឹងបញ្ឈប់នៅថ្ងៃណានោះទេ ប៉ុន្តែបានប្រាប់ថា បណ្ដាខេត្តមួយចំនួននៅតំបន់ទំនាបកណ្ដាលភាគខាងត្បូង តំបន់ខ្ពង់រាបភាគឦសាន និងតំបន់មាត់សមុទ្រ អាចនឹងមានភ្លៀងធ្លាក់ពីកម្រិតបង្គួរទៅច្រើន ចាប់ពីថ្ងៃទី៤ ដល់ថ្ងៃទី៩ខែមេសាឆ្នាំនេះ។
ក្រសួងបានជូនដំណឹងម្ដងរួចហើយ សម្រាប់ការព្យាករអាកាសធាតុចូលខែមេសានេះ។ ក្រសួងប្រាប់ថា ២ថ្ងៃដំបូងនៃខែមេសា ខេត្តមួយចំនួននឹងមានភ្លៀងធ្លាក់ពីកម្រិតមធ្យមទៅច្រើន ដោយលាយឡំបាតុភូតផ្គរ រន្ទះ និងខ្យល់កន្ត្រាក់។ ក្រសួងបន្តថា ចាប់ពីថ្ងៃទី៣ ស្ថានភាពអាកាសធាតុនេះនឹងចាប់ផ្ដើមធូរស្រាលមកវិញ ប៉ុន្តែភ្លៀងនៅបន្តធ្លាក់រាយប៉ាយក្នុងកំឡុងពេលពីរបីថ្ងៃបន្ថែមទៀត៕
© រក្សាសិទ្ធិដោយ thmeythmey.com