ជាតិ
សេដ្ឋកិច្ច
កំពង់ផែព្រះសីហនុ នឹងបោះផ្សាយលក់ភាគហ៊ុន យ៉ាងយូរត្រឹមខែឧសភា
×
ភ្នំពេញ៖ កំពង់ផែស្វយ័តក្រុងព្រះសីហនុ (SAP) គ្រោងបោះផ្សាយលក់ភាគហ៊ុន ឬមូលបត្រជាលើកដំបូង (IPO) ក្នុងអំឡុងខែមេសា ទៅខែឧសភាឆ្នាំនេះ ដើម្បីប្រមូលទុនពង្រីកការវិនិយោគរបស់ខ្លួន។ នេះបើតាមប្រធានក្រុមហ៊ុនរដ្ឋមួយនេះ។
លោក លូ គឹមឈន់ អគ្គនាយកក្រុមហ៊ុនកំពង់ផែស្វយ័តក្រុងព្រះសីហនុ (SAP) បានថ្លែងប្រាប់សារព័ត៌មានថ្មីៗនៅថ្ងៃទី៣១ខែមីនាថា ក្រុមហ៊ុនលោកបានទទួលការឯកភាពពីគណៈកម្មាការមូលបត្រកម្ពុជា (SECC) រួចហើយលើលើការបោះលក់ភាគហ៊ុន។ លោកបន្ថែមថា ចំពោះពេលវេលានៃការបោះលក់ភាគហ៊ុនលើកដំបូង គឺគ្រោងធ្វើឡើងក្នុងអំឡុងខែមេសា ឬខែឧសភាឆ្នាំនេះ ដោយលោកមិនអាចបញ្ជាក់បានពីពេលវេលាជាក់លាក់នោះទេ។
លោក លូ គឹមឈន់ ឲ្យដឹងបន្ថែមថា តាមគម្រោង SAP នឹងបោះផ្សាយលក់ភាគហ៊ុនខ្ទង់ ២២លានហ៊ុន ហើយរំពឹងថាលក់បានជាង ១ដុល្លារក្នុង១ហ៊ុន។ បើមើលតាមតួលេខនេះ SAP អាចរកទុនវិនិយោគបន្ថែមពីការបោះលក់ភាគហ៊ុនរបស់ខ្លួនក្នុងរង្វង់ ២៥លានដុល្លារ។
កំពង់ផែស្វយ័តក្រុងព្រះសីហនុ គឺជាសហគ្រាសគ្រប់គ្រងដោយរដ្ឋទី៣ ដែលបានចុះបញ្ជីក្នុងផ្សារមូលបត្រកម្ពុជា បន្ទាប់ពីរដ្ឋាករទឹកស្វយ័តក្រុងភ្នំពេញ និងកំពង់ផែស្វយ័តភ្នំពេញ។ ហើយក្រៅពីនេះ រួមមានក្រុមហ៊ុនឯកជនពីរទៀតគឺ ក្រុមហ៊ុនកាត់ដេរតៃវ៉ាន់ Grand Twins International និងក្រុមហ៊ុនតំបន់សេដ្ឋកិច្ចពិសេសភ្នំពេញ ដែលបានបោះលក់ភាគហ៊ុន ក្នុងពេលកន្លង៕
Tag:
ភាគហ៊ុន
លូ គឹមឈន់
SAP
© រក្សាសិទ្ធិដោយ thmeythmey.com