ជាតិ
សេដ្ឋកិច្ច
×![]()
ភ្នំពេញ៖ ប្រៃសណីយ៍កម្ពុជា នឹងបង្កើតក្រុមហ៊ុនថ្មីមួយទៀតឈ្មោះថា Cambodia Post E-Solution នៅឆមាសទី២ឆ្នាំនេះ ដើម្បីផ្ដល់សេវាទិញ-លក់តាមអនឡាញ។ នេះបើតាមការឲ្យដឹងពីមន្ត្រីជាន់ខ្ពស់ក្រសួងប្រៃសណីយ៍ និងទូរគមនាគមន៍។
លោក អោក បូរ៉ា អគ្គនាយកក្រុមហ៊ុនប្រៃសណីយ៍កម្ពុជា បានថ្លែងក្នុងសន្និបាតបូកសរុបលទ្ធផលការងារប្រចាំឆ្នាំរបស់ក្រសួងប្រៃសណីយ៍ និងទូរគមនាគមន៍ នៅថ្ងៃទី៤ខែមេសា ថា ក្រុមហ៊ុន Cambodia Post E-Solution នឹងផ្ដល់សេវាជាច្រើនមុខតាមអនឡាញ ជាពិសេសសេវាទិញ-លក់តាមអនឡាញ (E-commerce)។ លោកបន្ថែមថា ក្រុមហ៊ុននឹងសហការជាមួយទីផ្សារពាណិជ្ជកម្មអេឡិចត្រូនិកអន្តរជាតិធំៗ ដើម្បីភ្ជាប់សកម្មភាពទិញ-លក់តាមអនឡាញនៅកម្ពុជា ទន្ទឹមនឹង ក្រុមហ៊ុន Cambodia Post E-Solution នឹងផ្ដល់សេវាជាប់ពាក់ព័ន្ធរួមមាន ការដឹកជញ្ជូន និងទូទាត់តាមអនឡាន។
បើតាមលោក អោក បូរ៉ា ក្រុមហ៊ុន Cambodia Post E-Solution នឹងផ្ដល់សេវាតាមអនឡាញផ្សេងទៀត ដូចជា ធនាគារអេឡិចត្រូនិក, លក់សំបុត្រ និងនាំសំបុត្រតាមអនឡាញ និងសេវាអនឡាញទាក់នឹងសេវាសាធារណៈរបស់រដ្ឋាភិបាលជាដើម។
ក្រុមហ៊ុនប្រៃសណីយ៍កម្ពុជា (Cambodia Post) ដែលស្ថិតក្រោមក្រសួងប្រៃសណីយ៍ និងទូរគមនាគមន៍នេះ បានរកប្រាក់ចំណូលសម្រាប់ឆ្នាំ២០១៦ ចំនួន ៩,៤៥លានដុល្លារ កើនឡើង ៧៤ភាគរយ បើធៀបនឹង ៥,៤២ នៅឆ្នាំ២០១៥ ។ ដោយឡែកប្រាក់ចំណេញរបស់ក្រុមហ៊ុនបានកើនដល់ជាង ៥៨ម៉ឺនដុល្លារនៅឆ្នាំមុន កើនឡើង ១៩៥ភាគរយធៀបនឹងឆ្នាំ២០១៥ ៕
Tag:
E-commerce
អោក បូរ៉ា
© រក្សាសិទ្ធិដោយ thmeythmey.com
