កីឡាអន្តរជាតិ
អន្តរជាតិ
អាហ្សង់ទីនបញ្ចប់តំណែងគ្រូបង្វឹកលោក Bauza
×
ក្រុមបាល់ទាត់ជម្រើសជាតិអាហ្សង់ទីន បានបញ្ចប់តំណែងលោក Edgardo Bauza ជាគ្រូបង្វឹកហើយបន្ទាប់ពីដឹកនាំក្រុមក្នុងតំបន់អាមេរិកឡាទីនមួយនេះមិនបានល្អ។
អ្នកចាត់ការសញ្ជាតិអាហ្សង់ទីន វ័យ៥៩ឆ្នាំរូបនេះត្រូវបានដកចេញពីតួនាទីជាគ្រូបង្វឹកជម្រើសជាតិអាហ្សង់ទីន ក្រោយពីដឹកនាំក្រុមនៅតំបន់អាមេរិកខាងត្បូងមួយនេះឈ្នះតែ៣ប្រកួតប៉ុណ្ណោះក្នុងវគ្គជម្រុះ World Cup ចំនួន៨ប្រកួត ។
ការប្រកួតកន្លងមក អាហ្សង់ទីនមាន២២ពិន្ទុ ស្ថិតនៅចំណាត់ថ្នាក់លេខ៥ នាំមុនអេក្វាទ័រ២ពិន្ទុ និងនៅក្រោមក្រុមចំណាត់ថ្នាកលេខ៤&៣ ចំនួន១ពិន្ទុប៉ុណ្ណោះនៃវគ្គជម្រុះនេះ។ អាហ្សង់ទីន អាចមិនបានទៅរុស្ស៊ីដោយស្វ័យប្រវត្តិ បើមិនអាចឈរនៅចំណាត់ថ្នាក់លេខ៤បានទេនោះ។ ក្នុងករណីបានចំណាត់ទី៥ អាហ្សង់ទីន អាចលេងវគ្គខ្វែងជាមួយទ្វីបអូសេអានីបន្តទៀត ដើម្បីដណ្ដើមកៅអីវគ្គផ្ដាច់ព្រ័ត្រ ។
បើក្រុមជម្រើសជាតិមកពីអាមេរិកឡាទីនមួយនេះ ធ្លាក់ទៅដល់លេខ៦នោះ អាស្សង់ទីននឹងមិនអាចឈានទៅប្រកួតពានរង្វាន់ពិភពលោក FIFA World Cup ឆ្នាំ២០១៨នៅរុស្ស៊ីឡើយ។ លោក Edgardo Bauza បានចូលមកដឹកនាំក្រុមជម្រើសជាតិអាហ្សង់ទីនកាលពីខែសីហា ជំនួសលោក Gerardo Martino ដែលលាលែងពីតំណែងក្រោយដឹកនាំចាញ់ក្រុមស៊ីលីក្នុងវគ្គផ្តាច់ព្រ័ត្រពានរង្វាន់ Copa America។ សម្រាប់តំណែងថ្មី គេរំពឹងថាអ្នកចាត់ការទូទៅក្រុម Sevilla លោក Jorge Sampaoli ជាបេក្ខភាពនាំមុនគេដើម្បីដឹកនាំក្រុមអាហ្សង់ទីននេះ។
សូមបញ្ជាក់ថាក្រុមជម្រើសជាតិអាហ្សង់ទីន នៅសល់៤ប្រកួតទៀតក្នុងវគ្គជម្រុះនៅតំបន់អាមេរិកខាងត្បូង ដើម្បីឈានទៅលេង World Cup នៅរុស្ស៊ី ដែលត្រូវជួបក្រុមអ៊ុយរូហ្គាយ វេណេស៊ុយអេឡា ប៉េរូ និងអេក្វាទ័រ៕
Tag:
បាល់ទាត់
អាហ្សង់ទីន
World Cup
© រក្សាសិទ្ធិដោយ thmeythmey.com