កីឡាអន្តរជាតិ
អន្តរជាតិ
គ្រូ Leicester អះអាងថាលោកមិនជាប់ទាក់ទងនឹងការដកមេចាស់របស់ខ្លួនឡើយ
×
លោក Claudio Ranieri ដែលត្រូវបានក្រុមការពារតំណែងជើងឯកចាស់ក្របខណ្ឌ Premier League បញ្ឈប់តំណែងកាលពីខែកុម្ភៈនោះ បានប្រលយពាក្យថាមានបញ្ហាជាមួយមនុស្សមួយចំនួននៅក្នុងក្លិប Leicester ប៉ុន្តែលោកមិនបានបញ្ជាក់ឈ្មោះថាជាអ្នកណានោះទេ។
ការលើកឡើងរបស់អ្នកចាត់ការសញ្ជាតិអ៊ីតាលីនេះ បានធ្វើឲ្យគេដាក់ការសង្ស័យទៅលើលោក Craig Shakespeare ដែលកំពុងដឹកនាំក្រុម Leicester City ប្រកួតជាមួយ Atletico Madrid ក្នុងវគ្គ៨ក្រុមចុងក្រោយពាន UEFA Champions League យប់ថ្ងៃអង្គារនេះ។ «ខ្ញុំមិនចង់និយាយថាអ្នកនោះជាអ្នកណានោះទេ។ ខ្ញុំជាមនុស្សស្មោះត្រង់។ អ្វីដែលខ្ញុំបាននិយាយ គឺខ្ញុំនិយាយទល់មុខគ្នារួចហើយ»។ នេះជាការបញ្ជាក់បន្ថែមរបស់លោក Ranieri។
ក្រោយការលើកឡើងរបស់អ្នកចាត់ការវ័យ៦៥ឆ្នាំ ដែលប្រាប់ Sky Sports កាលពីថ្ងៃចន្ទទី១១មេសា ថាមានអ្នកនៅពីក្រោយខ្នងលោក ហើយជំរុញឲ្យក្លិបដកលោកចេញនោះ អតីតជំនួយការរបស់លោក Ranieri និងអ្នកចាត់ការរបស់ Leicester បច្ចុប្បន្នលោក Craig Shakespeare បានបកស្រាយដោយបដិសេធថា លោកមិនធ្លាប់មានការទាស់ទែងគ្នាជាមួយលោក Ranieri ឡើយ។
អ្នកចាត់ការសញ្ជាតិអង់គ្លេស វ័យ៥៣ឆ្នាំបានបញ្ជាក់ដូច្នេះថា៖«ខ្ញុំមិនដែលឈ្លោះប្រកែកគ្នា ឬមានអារម្មណ៍តឹងតែងជាមួយអតីតអ្នកចាត់ការក្រុមកញ្ជ្រោងខៀវលោក Claudio Ranieri នោះទេ។ Claudio ជាមនុស្សល្អនិងពូកែកំប្លែងថែមទៀតផង»។
សូមបញ្ជាក់ថា ក្រោមការដឹកនាំរបស់ Shakespeare បានជួយឲ្យ Leicester ឈ្នះ៥ប្រកួតជាប់គ្នា និងចាញ់មួយប្រកូតប៉ុណ្ណោះ ហើយជួយឲ្យក្រុមនេះអាចឈានទៅវគ្គ៨ក្រុមចុងក្រោយដោយត្រូវជួប Atletico Madrid ជើងទី១ពានរង្វាន់ Champions League ថែមទៀតផង៕
Tag:
បាល់ទាត់
Claudio Ranieri
Leicester
Craig Shakespeare
© រក្សាសិទ្ធិដោយ thmeythmey.com